Nkhani Yakukondweska ku Ŵakavu

MAZGU GHA CIUTA ghakutisimikizgira kuti: “Ŵasokwano ntha tiŵaluwike mazuŵa ghose.” (Salmo 9:18) Pakuyowoya za Mlengi withu, Baibolo likuti: “Mukujura woko linu na kukhorweska camoyo cose.” (Salmo 145:16) Ivyo Mazgu gha Ciuta ghakulayizga vizamucitika nadi, ni loto waka yayi. Ciuta Wankhongono Zose wangatipa ivyo tikukhumbikwira kuti wamazge ukavu. Kasi ŵakavu ŵakukhumbikwira vici?

Mama munyake wa kuno ku Africa uyo wakumanya za kendeskero ka cuma pa caru cose wakayowoya kuti vyaru vikavu vikwenera kuŵa na muwusi “walusungu kweni wamazaza comene.” Mazgu agha ghakung’anamura kuti ukavu ungamara pekha usange pangaŵa muwusi walusungu ndiposo uyo wali na mazaza panji nkhongono zakumazgira ukavu. Tingasazgirapo kuti muwusi uyo wangamazga ukavu pa caru cose wakwenera kuwusa caru cose cifukwa kanandi vyaru vinyake vikukavuka comene cifukwa cakuti vinthu vya mu caru vikugaŵika mwakuyana yayi. Kweniso, muwusi uyo wangamazga ukavu ni uyo wangamazga mtima wa kujighanaghanira tekha uwo taŵanthu tili nawo, cifukwa ndiwo ukupangiska ukavu. Kasi muwusi wanthena wangasangika nkhu?

Ciuta wakatuma Yesu kuti wazakapharazge makani ghawemi ku ŵakavu. Zuŵa linyake Yesu wakimilira na kuŵazga za mulimo uwo Ciuta wakamupa, wakati: “Mzimu wa Yehova uli pa ine, cifukwa wali kuniphakazga kuti nipharazge makani ghawemi ku ŵakavu.”—Luka 4:16-18.

Kasi Nkhani Yakukondweska Njakuti Wuli?

Ciuta wimika Yesu kuŵa Themba. Iyi ni nkhani yakukondweska nadi. Yesu ni muwusi uyo wangamazga nadi ukavu cifukwa (1) wawusenge ŵanthu wose ndipo wali na nkhongono; (2) ngwalusungu ku ŵakavu ndipo wakusambizga awo ŵakumulondezga kuti nawo ŵapwelelerenge ŵakavu; ndiposo (3) wangamazga ico cikupangiska ukavu, ico ni mtima wa kujighanaghanira tekha. Tiyeni tisande vigaŵa vitatu ivi vya nkhani yakukondweska iyi.

1. Yesu wazamuŵa na mazaza pa caru cose Pakuyowoya za Yesu, Mazgu gha Ciuta ghakuti: “Kwa iye kukapika kuwusa . . . kuti ŵanthu wose, ŵamitundu yose, na mayowoyero ghose ŵamuteŵetere.” (Daniel 7:14) Kasi mwawona uwemi wa kuŵa na boma limoza pa caru cose? Kuŵa na boma limoza kungamazga mphindano ndiposo kulimbirana vinthu ivyo vili mu caru. Waliyose pa caru wazamusanga candulo mwakuyana. Yesu iyomwene wakatisimikizgira kuti wazamuŵa Muwusi wa nkhongono pa caru cose. Wakati: “Mazaza ghose ghapika kwa ine kucanya na caru capasi.”—Mateyu 28:18.

2. Yesu wakulengera lusungu ŵakavu Pa nyengo yose iyo Yesu wakaŵira pa caru capasi, wakacitiranga lusungu ŵakavu. Mwaciyelezgero, mwanakazi munyake mulwari, uyo wakamalira vyose ivyo wakaŵa navyo ku ŵacizgi, wakakhwaska munjilira wa Yesu na cigomezgo cakuti wacirenge. Mwanakazi uyu wakalwara nthenda ya kusulura ndopa kwa vilimika 12 ndipo nchakuwonekerathu kuti wakaŵa na ndopa zicoko mu thupi. Kuyana na Dango, waliyose uyo wakhwaskika na mwanakazi uyu wakaŵanga wakufipirwa. Kweni Yesu wakamucitira lusungu. Wakati: “Wamwana, cipulikano cako cakucizga. Luta mu mtende, ndipo uŵe makora ku ulwari wako wakofya.”—Mariko 5:25-34.

Visambizgo vya Yesu vili na nkhongono ya kusintha nkharo ya ŵanthu mwakuti nawo ŵangacitira lusungu ŵanyawo. Mwaciyelezgero, wonani umo Yesu wakazgolera mwanalume munyake uyo wakakhumbanga kumanya ivyo wangacita kuti wakondweske Ciuta. Mwanalume uyu wakamanyanga kuti Ciuta wakukhumba kuti titemwenge ŵazengezgani ŵithu, kweni wakafumba Yesu kuti: “Kasi mzengezgani wane ni njani comenecomene?”

Pakuzgora, Yesu wakalongosora ntharika  yakumanyikwa comene yakuyowoya za munthu uyo wakafumanga ku Yerusalemu kuya ku Yeriko, uyo wakatimbika na kulekeka “wakhala pa singo pera.” Musofi munyake wakakhiranga mu msewu wenewura kweni wakajumpha waka kumphepete. Mulevi nayo ntheura pera. “Kweni Musamariya yunji uyo wakendanga mu msewu uwu wakafika pa iyo, ndipo pakumuwona, citima cikamukora.” Wakasuka vilonda vyake, wakamutolera ku nyumba ya ŵalendo, wakapeleka ndalama ku msungiliri wa nyumba iyi kuti wamupwelelere. Yesu wakafumba kuti: “Ni nju . . . wakajizgora mzengezgani kwa munthu uyo wakawira mu ŵakupoka vyaŵene?” Mwanalume uyu wakazgora kuti: “Uyo wakacita cisungusungu kwa iyo.” Ndipo Yesu wakati: “Lutanga ndipo nawe ukacitenge mwakuyana waka.”—Luka 10:25-37.

Ŵanthu awo ŵakuŵa Ŵakaboni ŵa Yehova ŵakusambira visambizgo vya Yesu ndipo ŵakusintha nkharo yawo pa nkhani ya kovwira awo ŵakusuzgika. Mwaciyelezgero, mu buku lake lakucemeka Women in Soviet Prisons, mama munyake wa ku Latvia wakalemba vyakukhwaskana na ulwari wake pa nyengo iyo wakagwiranga nchito pa msasa wakulangirako ŵanthu ku Potma, mu vilimika vya m’ma 1960. Mwanakazi uyu wakalemba kuti: “Pa nyengo yose iyo nkhaŵa mulwari, [Ŵakaboni] ŵakanipwelelera comene. Palije munyake uyo wakate wanipwelelerenge kuluska iwo.” Wakasazgirapo kuti: “Ŵakaboni ŵa Yehova ŵakuwona kuti ni mulimo wawo kovwira waliyose, kwambura kulaŵiska cisopa cake panji uko wakufumira.”

Apo Ŵakaboni ŵanyake ku Ancón, Ecuador ŵakaŵavya nchito panji ndalama cifukwa cakuti cuma cikaleka kwenda makora, Ŵakaboni ŵanyawo ŵakapenja nthowa yakuŵawovwilira na ndalama. Ŵakaphikanga cakurya na kuguliska ku ŵalovi awo ŵakaweranga ku ulovi nausiku (wonani cithuzithuzi kumalyero). Waliyose mu mpingo wakacitangako mulimo uwu, kusazgapo ŵana. Ŵakawukanga 1 koloko mulenji mwakuti cakurya ciŵe canozgeka kale para maboti ghakwiza nyengo ya 4 koloko. Ndalama izo Ŵakaboni ŵakasanga zikagaŵika mwakuyana na ivyo munthu wakusoŵerwa.

Ciyelezgero ici cikulongora kuti ivyo Yesu wakacita na kusambizga vili na nkhongono ya kusintha nkharo ya ŵanthu kuti ŵaŵe na mtima wa kovwira awo ŵakusoŵerwa.

3. Yesu wali na nkhongono zakuwuskirapo kwananga uko tili kuhara Tose tingazomera kuti taŵanthu tili na cizgoŵi ca kujighanaghanira tekha. Mu Baibolo, cizgoŵi ici cikucemeka “kwananga.” Nanga waŵe mpositole Paulosi nayo wakalemba kuti: “Nkhusanga dango ili mwa ine: lakuti para nkhukhumba kucita ico nchakwenelera, ico nchiheni cikuŵa nane.” Ndipo wakayowoyaso kuti: “Ni njani wanithaskenge ku thupi ilo likunilongozgera ku nyifwa iyi? Nkhuwonga Ciuta kwizira mwa Yesu Khristu Fumu yithu!” (Ŵaroma 7:21-25) Apa, Paulosi wakang’anamuranga umo Ciuta kwizira mwa Yesu, wazamuwombolera ŵasopi ŵaunenesko ku zakwananga izo ŵali kuhara. Zimoza mwa zakwananga izi ni mtima wa kujighanaghanira tekha, uwo ukupangiska ukavu. Kasi ici cizamucitika wuli?

Nyengo yinyake pamanyuma pa ubapatizo wa Yesu, Yohane mbapatizi wakati: “Wonani, Mwanamberere wa Ciuta uyo wakuwuskako kwananga kwa caru!” (Yohane 1:29) Sonosono apa, caru cizurenge na ŵanthu awo ŵafwatulika ku zakwananga zakubabika nazo ndiposo ku nkharo ya kujighanaghanira ŵekha pera. (Yesaya 11:9) Yesu wawuskengepo ivyo vikupangiska ukavu.

Tikuŵa ŵakukondwa comene para tikughanaghanira nyengo iyo waliyose wazamuŵa na vyakukhumbikwa pa umoyo. Mazgu gha Ciuta ghakuti: “Tiwakhale munthu yose musi mwa mpheska yake na musi mwa mkuyu wake, kulije yumoza wakuŵawofya.” (Mika 4:4) Mazgu agha ghakulongosora ivyo vizamucitika panyengo iyo munthu waliyose wazamuŵa na nchito yakukhorweska, civikiliro, ndiposo mwaŵi wa kusangwa na umoyo wambura ukavu. Yehova wazamulumbika comene.