Pembuzgani Ŵakuphyoka mu Mtima
Sendelerani kwa Ciuta
Pembuzgani Ŵakuphyoka mu Mtima
‘YEHOVA wanganitemwa yayi.’ Umu ndimo wakayowoyera mwanakazi munyake Mkhristu uyo wakaŵa na suzgo la maghanoghano kwa vilimika vinandi. Iyo wakaghanaghananga kuti Yehova wali kumulazgira nkhonyoro. Kasi Yehova wali nadi kutali na ŵasopi ŵake awo ŵakusuzgika maghanoghano? Zgoro lakupembuzga lili mu mazgu agho wamasalmo Davide wakalemba mwakukhuŵilizgika na mzimu, agho ghali pa Salmo 34:18.
Davide wakamanyanga umo munthu uyo wakusopa Yehova mwakugomezgeka wakuŵira para wali na suzgo la maghanoghano. Apo Davide wakaŵa munyamata, wakabisamangabisamanga cifukwa Sauli wakakhumbanga kumukoma cifukwa ca sanji. Davide wakakabisama mu cigaŵa ca ŵalwani ŵa Ŵaisrayeli, mu msumba wa Ŵafilisiti wa Gath, uko wakaghanaghananga kuti Sauli wangalutako yayi kukamupenja. Kweni ŵanthu mu msumba uwu ŵakamumanya ndipo wakapona cifukwa cakuti wakatetezgera kuti ngwakufuntha. Davide wakalumba Ciuta cifukwa ca kumuponoska, ndipo ivyo vikamucitikira ndivyo vikamupangiska kulemba Salmo 34.
Kasi Davide wakagomezganga kuti Ciuta wakuŵa kutali na awo ŵakujiwona kuti mbakukhumbikwa yayi pamaso pa Ciuta cifukwa ca masuzgo agho ŵalimo? Davide wakalemba kuti: “Yehova wali pafupi na awo mbakuphyoka mu mtima, ndipo wakuponoska awo mbamzimu [wakuteketeka, NW].” (Vesi 18) Tiyeni tiwone umo mazgu agha ghakutipembuzgira ndiposo kutikhozga kuti vinthu viŵenge makora munthazi.
“Yehova wali pafupi.” Buku linyake likuti mazgu agha “ghakung’anamura kuti Fumu yikupulikizga ndiposo kulaŵilira, ndipo njakunozgeka kovwira na kuponoska ŵanthu ŵake.” Nchakukhozga comene kumanya kuti Yehova wakulaŵilira ŵanthu ŵake. Wakumanya masuzgo agho ŵakukumana nagho mu “nyengo zinonono” izi, ndipo wakumanya umo ŵakujipulikira.—2 Timote 3:1; Milimo 17:27.
“Awo mbakuphyoka mu mtima.” Ku vigaŵa vinyake, munthu ‘wakuphyoka mu mtima’ ni uyo wakuwona kuti wakutemweka yayi. Kweni munthu munyake wakusanda Baibolo wakuti apa wamasalmo wakanenanga “munthu uyo wali na citima.” Enya, nanga mbanthu awo ŵakusopa Ciuta mwakugomezgeka ŵangaŵa na masuzgo ghakuru agho ghakuŵaphyora mtima.
“Awo mbamzimu wakuteketeka.” Ŵanthu awo ŵagongoweskeka ŵangamba kujiwona kuti mbambura kuzirwa mwakuti kwakanyengo ŵangaŵavya cigomezgo cakuti vinthu viŵenge makora. Pakuyowoya za ŵanthu aŵa, buku linyake lakovwira awo ŵakung’anamura Baibolo likuti ni “awo palije kawemi ako ŵakulindizga.”
Kasi Yehova wakucita wuli na ŵanthu awo “mbakuphyoka mu mtima” ndiposo awo “mbamzimu wakuteketeka”? Kasi wakuŵalazgira nkhonyoro, kuŵawona kuti mbakwenelera yayi kuŵatemwa? Yayi. Nga ni dada wacitemwa uyo wakunyamura na kupembuzga mwana uyo wakulira, Yehova wali pafupi na ŵasopi ŵake awo ŵakumulilira kuti waŵawovwire. Ngwakunozgeka kuŵapembuzga na kucizga mtima wawo wakuphyoka ndiposo mzimu wawo wakuteketeka. Wangaŵapa vinjeru ndiposo nkhongono izo zikukhumbikwa kuti ŵazizipizge viyezgo vilivyose ivyo ŵangakumana navyo.—2 Ŵakorinte 4:7; Yakobe 1:5.
Mwalekeraci kusambira umo mungasendelelera kwa Yehova? Ciuta walusungu uyu, wakutilayizga kuti: ‘Nkhukhala na uyo ngwa mzimu wakuphyoka na wakujiyuyura, mwakuti ndiwuskeso mzimu wa wakujiyuyura na kupaso umoyo ku mtima wa wakuphyoka.’—Yesaya 57:15.
Vyaputala vya mu Baibolo ivyo Mungaŵazga mu Juni: