Ŵaŵazgi Ŵithu Ŵakufumba Kuti . . .

Kasi Haramagedoni ni Vici?

▪ Para ŵanandi ŵapulika lizgu lakuti “Haramagedoni” ŵakughanaghana kuti ni pharanyiko lakofya, ilo lizamucitika cifukwa ca nkhondo ya nyukiliya, masoka ghakofya ghacilengiwa, panji soka ilo lizamucitika cifukwa ca kocha kwa caru. Kweni lizgu ili mu Baibolo likung’anamura vinthu ivi yayi. Ipo, kasi Baibolo likung’anamuraci para likuyowoya za Haramagedoni?

Lizgu lakuti “Haramagedoni” likusangika mu buku la Uvumbuzi. Ni nkhondo yapadera, “nkhondo ya zuŵa likuru la Ciuta Wankhongonozose,” apo “mathemba gha caru cose” ghakuwunjikika kuti gharwe kaumaliro na Ciuta. Pali malemba ghanyake agho ghakuyowoyaso za nkhondo iyi.—Uvumbuzi 16:14-16; Ezekiel 38:22, 23; Joel 3:12-14; Luka 21:34, 35; 2 Petrosi 3:11, 12.

Kasi nkhondo iyi yizamucitika wuli? Buku la Uvumbuzi likuyowoya mwakuyelezgera umo yizamucitikira, likuti: “Mathemba gha caru capasi na ŵankhondo ŵawo ŵakawungana pamoza kuti ŵarwe nkhondo na uyo wakakhala pa haci na ŵankhondo ŵake.” “Uyo wakakhala pa haci” ni Mwana wa Ciuta, Yesu Khristu, uyo wali kusankhika na Ciuta kuti walongozge ŵankhondo ŵake kuti ŵathereske ŵalwani ŵa Ciuta. (Uvumbuzi 19:11-16, 19-21) Lemba la Yeremiya 25:33 likuvumbura unandi wa ŵanthu awo ŵazamuparanyika, likuti: “Ŵakukomeka ŵa Yehova pa zuŵa ilo ŵati ŵaŵepo kufumira ku mphelerekezgo kuyakafika ku mphelerekezgo ya caru capasi.”

Cifukwa wuli nkhondo ya Haramagedoni njakukhumbikwa? Yikukhumbikwa cifukwa cakuti mitundu ya ŵanthu yikukana muwuso wa Ciuta kweni yikukhumba kuti yiwusenge ndiyo. (Salmo 24:1) Lemba la Salmo 2:2 likulongosora nkhwesa zawo, likuti: “Mafumu gha caru ghakujimikira, ndipo ŵakuru ŵakukhalira wupu kwimikana na Yehova ndipo na Wakuphakika wake.”

Nakuti, ŵanthu ŵakugaluka aŵa ŵakuyowoya kuti caru nchawo ndipo ŵakucigwiliskira nchito uheni na kucinanga. Mazuŵa ghano mitundu yikunanga caru ndiposo vinthu ivyo vilimo. Mazgu gha Ciuta ghakayowoyerathu za vinthu viheni ivi, kuti: “Mitundu yikatukutwa, ndipo kutukutwa kwa [Ciuta] kukiza.” Pamanyuma Ciuta ‘wazamuparanya awo ŵakunanga caru capasi.’ (Uvumbuzi 11:18) Ciuta wali kusankha kuti nkhondo ya Haramagedoni ndiyo yizakamazge nkhani yakukhwaskana na uyo ngwakwenelera kuwusa ŵanthu wose.—Salmo 83:18.

Kasi Haramagedoni yizamucitika pawuli? Mwana wa Ciuta wakayowoya mwambura kubisa kuti: “Vya zuŵa ilo na ora palije munthu wakumanya, nanga mbangelo ŵa kucanya nesi Mwana, kweni Ŵadada pera mbwenu.” (Mateyu 24:36) Nangauli tikumanya yayi nyengo iyo Haramagedoni yizirenge, kweni Yesu Khristu, uyo wazamulongozga nkhondo iyi, wakacenjezga kuti: “Wonani! Nkhwiza nga ni munkhungu. Wakukondwa ni uyo wakuŵa maso.” (Uvumbuzi 16:15) Ntheura nkhondo ya caru cose iyi yizamucitika mu nyengo ya kuŵapo kwa Khristu ndipo maucimi gha mu Baibolo ghakulongora kuti nyengo yake ni yino.

Haramagedoni yizamuparanya ŵaheni wose awo ŵakusintha yayi, kweni pazamuŵa “mzinda ukuru” uwo uzamupona. (Uvumbuzi 7:9-14) Mzinda ukuru uzamuwona mazgu agha ghakufiskika, ghakuti: “Kwakhala kanyengo, ndipo muheni kuti tiwaŵepo cara; tiuŵanike malo ghake kweni iye ntha waŵengemo. Ŵakuzika ndiwo tiŵaharenge caru, tiŵakondwenge na kusakata comene.”—Salmo 37:10, 11.

[Mazgu Ghakukhozgera pa peji 10]

“Ŵakuzika ndiwo tiŵaharenge caru, tiŵakondwenge na kusakata comene”