Abrahamu—Munthu Wakujiyuyura

Abrahamu wakakhala pa mfwiri mu hema lake, ndipo kuwaro kukawochanga comene. Apo wakalaŵiskanga kuwaro, capatali wakawona ŵanalume ŵatatu awo ŵakiza mu cigaŵa ici. * Mwaluŵiro, wakacimbira kukakumana na ŵalendo aŵa, ndipo wakaŵaŵeyelera kuti ŵakapumurepo pacoko waka, na kurya. Wakaŵaphalira kuti waŵapenge “kacingwa.” Kweni iyo wakamba kuŵanozgera cakurya cinandi nga ni vibama, suru, mkaka, na nyama yiwemi yiteci. Apo wakapelekanga cakurya ici ku ŵalendo, Abrahamu wakalongora mtima wa kupokelera ŵalendo pera yayi kweniso wakalongora kuti wakaŵa wakujiyuyura nadi.—Genesis 18:1-8.

KASI KUJIYUYURA NI VICI? Kujiyuyura nkhuleka kujitemwa panji kujikuzga. Munthu wakujiyuyura wakuwona kuti munthu waliyose wakumuluska mu nthowa yinyake. (Ŵafilipi 2:3) Wakutegherezga masacizgo gha ŵanji ndipo wakuŵa wakunozgeka kuŵacitira milimo iyo yikuwoneka kuti njapasi.

KASI ABRAHAMU WAKALONGORA WULI KUJIYUYURA? Abrahamu wakateŵeteranga ŵanji mwakukondwa. Nga umo tayowoyera kukwambilira, apo Abrahamu wakawona ŵalendo ŵatatu, mwaluŵiro wakamba kuŵanozgera vinthu vyakukhumbikwira. Mwaluŵiro, muwoli wake Sara wakamba kuphika cakurya. Kweni wonani uyo wakacita mulimo ukuru: Abrahamu wakacimbira kukakumana na ŵalendo, wakaŵapempha kuti wakaŵape cakurya, wakacimbilira ku mskambo na kusankha nyama iyo yingakomeka, ndipo wakaŵakhalikira ŵalendo cakurya cose ico wakanozga. Abrahamu wakalekera ŵateŵeti ŵake kuti ndiwo ŵacite mulimo uwu yayi, kweni munthu wakujiyuyura uyu wakacita yekha mulimo uwu, uwo ukawonekanga wapasi. Wakajiwona kuti ngwakuzirwa comene yayi mwakuti wangaleka kuteŵetera ŵanji.

 Abrahamu wakategherezganga masacizgo gha ŵanji awo ŵakaŵa pasi pake. Baibolo likuyowoya vicoko waka pa ivyo Abrahamu na Sara ŵakadumbiskananga. Kweni kaŵiri kose, tikuŵazga kuti Abrahamu wakapulikira na kucita ivyo Sara wakayowoya. (Genesis 16:2; 21:8-14) Kweni pa nyengo yinyake, ivyo Sara wakasacizga ‘vikamukwiyiska Abrahamu.’ Kweni Yehova wakawona kuti Sara wakayowoya fundo yiwemi. Yehova wakati wayowoya nayo, Abrahamu wakajiyuyura na kupulikira ivyo Sara wakasacizga.

KASI TIKUSAMBIRAPO VICI? Usange ndise ŵakujiyuyura nadi, tikondwenge kuteŵetera ŵanyithu. Tikondwenge kucita cilicose ico tingafiska kuti tiŵawovwire.

Umo tikucitira para ŵanthu ŵanyake ŵayowoya masacizgo ghawo vingalongora usange ndise ŵakujiyuyura panji yayi. Nchiwemi yayi kususka fundo cifukwa cakuti ise tindayighanaghanirepo. Kweni tikwenera kupulikira fundo za ŵanyithu. (Zintharika 15:22) Fundo iyi yikovwira comene ŵanthu awo ŵali na maudindo. John, uyo wali na mulimo wa kulaŵilira ŵanyake, wakuti: “Nkhuwona kuti munthu muwemi uyo wakulaŵilira ŵanyake ni uyo wakupangiska ŵanthu kuti ŵafwatukenge kuyowoya maghanoghano ghawo. Mukwenera kuŵa ŵakujiyuyura kuti muwone kuti munthu uyo wali pasi pinu wangacita makora vinthu vinyake kuluska imwe. Kweniso palije munthu waliyose, nanga wangaŵa mulaŵiliri, uyo fundo zake zekha ndizo ni ziwemi pera.”

Usange tikulondezga Abrahamu mwa kutegherezga ku masacizgo gha ŵanji na kucita milimo iyo yingawoneka yapasi, mbwenu Yehova watitemwenge. Manyani kuti, “Ciuta wakwimikana na ŵakujikuzga, kweni wakupeleka lusungu lukuru ku ŵakujiyuyura.”—1 Petrosi 5:5.

[Mazgu ghamusi]