• CAKA ICO WAKABABIKIRA: 1974

• UKO WAKABABIKIRA: CHILE

• IVYO WAKACITANGA: WAKAŴA MULOŴEVU

UMO NKHAŴIRA KALE:

Nkhababikira ku Angol, tawuni yakutowa kumwera kwa Chile. Kawiro adada nindaŵawonepo! Apo nkhaŵa na vyaka vitatu, ine na amama kweniso munung’una wane tikasamira ku msumba ukuru wa Santiago. Tikakhalanga mu kacipinda kacoko comene pa msasa wa ŵanthu awo ŵalije nyumba. Tikalutanga ku cimbuzi ico mukanjiranga waka waliyose ndipo maji tikaneghanga mu mapayipi agho ŵakatekangapo maji gha kuzimyira moto.

Vilimika pafupifupi viŵiri vikati vyajumphapo, boma likatipa nyumba yicoko. Mwasoka, ŵanthu pa malo agha ŵakakhaliranga waka kumwa munkhwala wakuzweteska wongo na moŵa. Kweniso ucigeŵenga na uhule vikazara comene.

Zuŵa linyake amama ŵakakumana na mwanalume munyake ndipo paumaliro ŵakatorana. Adada ŵane ŵaciŵiri aŵa ŵakaŵa ŵaloŵevu. Nyengo zinyake ŵakaŵatimbanga amama na ine wuwo. Kanandi nkhaliranga kwanekha ndipo nkhadokeranga kuŵa na adada kuti ŵanivikilirenge.

Nangauli amama ŵakafwilirangapo kutisangira vyakukhumbikwa, kweni tikaŵa ŵakavu comene. Nyengo zinyake para tili na njara tikawiranga waka mkaka wa ufu na shuga. Pa nkhani ya vyakusanguluska, ine na munung’una wane tikalutanga mwakubisilizga ku nyumba ya ŵazengezgani ŵithu na kukawonelera TV pa windo. Kweni zuŵa linyake ŵakatisanga ndipo tikalekera papo.

Para adada aŵa ŵandaloŵere, nyengo zinyake ŵakatigulirangako tuvyakurya nangauli ivi vikacitikanga kaŵirikaŵiri yayi. Nyengo yinyake ŵakatigulira ka TV kacoko. Iyi njimoza mwa nyengo zicoko waka izo nkhukumbuka kuti nkhaŵapo wakukondwa.

Apo nkhaŵa na vilimika 12, nkhasambira kuŵazga. Cilimika cikati cajumphapo, nkhaleka sukulu na kwamba kugwira nchito. Para nawera ku nchito, nkhalutanga ku viphikiro na ŵanyane ŵa ku nchito. Ku malo agha tikamwanga moŵa na munkhwala wakuzweteska wongo. Pakatora na nyengo wuwo yayi vinthu ivi vikaninjira comene.

Apo nkhaŵa na vyaka 20, nkhakumana na Cati ndipo pamasinda tikatorana. Pakwamba, vinthu vyose vikaŵa makora, kweni nyengo yikati yajumphapo nkhambiraso nkharo zane zakale. Pa nyengo iyi, vinthu vikafika paheni comene. Nkhamba kuwona kuti nyengo yiliyose ningakakika panji kufwa. Kweni ciheni comene cikaŵa  cakuti nkhapangiska kuti mwana wane Víctor wasuzgike na vinthu ivyo ine nkhasuzgika navyo apo nkhaŵa mwana. Nkhajicitira citima, kujikwiyira kweniso nkhajiwonanga kuŵa wambura nchito.

Mu 2001, Ŵakaboni ŵa Yehova ŵaŵiri ŵakiza kunyumba ndipo Cati wakazomera kusambira nawo Baibolo. Wakaniphalirangako ivyo wakasambiranga. Ntheura nkhanweka ndipo nane nkhamba kusambira Baibolo. Mu 2003, Cati wakabapatizika kuŵa Kaboni wa Yehova.

UMO BAIBOLO LIKASINTHIRA UMOYO WANE:

Zuŵa linyake nkhaŵazga Lemba la Ruth 2:12, ilo likuti Yehova wakutumbika awo ŵakucita vinthu mu cipulikano na kupenja ciphokwero kwa iyo. Nkhawamo kuti usange ningasintha nikondweskenge Ciuta ndipo wanitumbikenge. Nkhawona kuti kanandi Baibolo likususka uloŵevu. Nkhakhwaskika comene na mazgu gha pa 2 Ŵakorinte 7:1. Vesi ili likuticiska kuti “tijitozge taŵene ku ukazuzi wose.” Ntheura nkhamba kuleka nkharo zane ziheni. Apo nkhambanga kuleka vinthu ivi, kukwambilira nkhakaŵanga yayi kukwiya. Kweni Cati wakaleka yayi kunovwira.

Paumaliro nkhaleka nchito cifukwa ndiko ŵanyane ŵakanicicizganga comene kukhweŵa na kumwa moŵa. Nangauli tikasanganga ndalama zicoko comene nati naleka nchito, kweni nkhaŵa na nyengo yinandi yakusambilira Baibolo. Apa ndipo nkhambira kucitapo kanthu pa ivyo nkhasambiranga mu Baibolo. Cati wakanipemphanga vinandi yayi kuluska ivyo ningakwaniska, panji kuninena cifukwa ca kuŵa na umoyo wambura kukhumba vinandi. Nkhumuwonga comene cifukwa ca kunovwira mwacitemwa.

Pamasinda, nkhamba kucezga comene na Ŵakaboni ŵa Yehova. Ŵakanovwira kupulikiska kuti nangauli nkhasambira viŵi yayi ku caru, kweni Yehova wakuzirwiska khumbo lane la kumuteŵetera. Citemwa kweniso kukolerana uko nkhawona mu mpingo wa Ŵakaboni, vikakhozga comene mbumba yithu. Kulije kunyake uko tikasangako mtende wanthena uwu. Mu Disembala 2004, nane nkhabapatizika.

UMO NASANGIRA CANDULO:

Nawona kuti mazgu gha pa Yesaya 48:17 ngaunenesko. Mazgu agha ghakuti: “Ine ndine Yehova, Ciuta winu uyo wakumusambizgani kuti muwone candulo.” Amama na munung’una wane ŵakakondwa comene na umo nkhasinthira ndipo nawo ŵali kwamba kusambira Baibolo. Ŵazengezgani nawo ŵakukondwa kuwona umo nasinthira kweniso kuti mbumba yithu njakukondwa.

Nili na mwanakazi uyo wakutemwa Ciuta ndipo wakunigomezga comene. Nangauli adada nkhuŵamanya yayi, kweni Baibolo lanovwira kulera makora ŵana ŵane ŵatatu, ndipo ŵakunicindika. Kweni cakuzirwa comene nchakuti, ŵakuwona kuti Yehova ngwanadi ndipo ŵakumutemwa.

Nkhuwonga comene Yehova cifukwa wanovwira kuti niŵe wakukondwa nangauli pa wanici nkhaŵa wambura kukondwa.

• CAKA ICO WAKABABIKIRA: 1974

• UKO WAKABABIKIRA: BULGARIA

• IVYO WAKACITANGA: KUGULISKA MUNKHWALA MWAKUBISIRIZGA

UMO NKHAŴIRA KALE:

Nkhababikira mu tawuni ya Sofia mu caru ca Bulgaria. Mbumba yithu yikaŵa na umoyo uwemiko. Adada ŵakaticimbira apo ine nkhaŵa na vyaka vinkhondi na cimoza. Ici cikanikhwaska ndipo cikaniŵinya comene mu mtima. Nkhajiwonanga kuti najowoleka ndipo ndine wakwenelera yayi kutemweka. Apo nkhakulanga, maghanoghano agha ghakapangiska kuti nigaluke. Nkhaŵa mukali kweniso wakusuzga.

Apo nkhaŵa na vilimika 14, nkhacimbira pa nyumba. Kanandi nkhibanga ndalama za amama, abuya na asekuru. Pa sukulu nkhaŵanga mu suzgo pera cifukwa ca ukali na mbembe. Ntheura, pa vyaka vicoko waka nkhasambira mu masukulu ghankhondi cifukwa ca nkharo iyi. Kukati kwakhala vilimika vitatu kuti nipokere dipuloma, nkhaleka sukulu. Nkhaŵa na umoyo waunyankhasi comene. Nkhamba kukhweŵa comene hona na camba. Nkhamwanga comene moŵa na kuluta ku viphikiro nyengo zose. Nkhambaso kuguliska munkhwala wambura kuzomerezgeka na boma. Nkhasuzgikanga comene maghanoghano para nkhuwona ŵanthu ŵakusuzgika na kufwa mu caru ciheni ici. Ntheura, zuŵa lililose nkhacitanga vinthu vyakuti vinikondweske pa zuŵa ilo mbwenu.

Mu 1998, apo nkhaŵa na vilimika 24, ŵapolisi ŵakanikora pa ciŵanja ca ndege ku Brazil, apo nkhaguliskanga munkhwala wakukanizgika na Boma. Ŵakanijalira mu jele kwa vyaka vinayi.

UMO BAIBOLO LIKASINTHIRA UMOYO WANE:

Mu 2000, Ŵakaboni ŵa Yehova ŵakamba kupharazga ku jele ili kamoza pa sabata. Kaboni munyake zina lake Marines, wakanicitira lusungu comene. Kaboni uyu wakapangiska kuti niŵe na khumbo lakuti nisambire vinandi mu Baibolo. Pakuti nkhaŵa kuti nindapulikepo vya Ŵakaboni ŵa Yehova, nkhafumba ŵakayidi ŵanyane kuti ŵanilongosolere vinandi vya iwo. Kweni nkhazizwa, cifukwa ŵanandi ŵakayowoyanga viheni pera vya Ŵakaboni. Ndipo kayidi munyake wakaniphalira kuti: “Unganjira cisopa cilicose kweni ungayezganga yayi kunjira cisopa ca Ŵakaboni ŵa Yehova.” Mazgu agha ghakanikhukiska kuti nimanye vinandi. Nkhakhumbanga kumanya cifukwa ico ŵanthu ŵakutinkhira Ŵakaboni. Pamasinda nkhamanya kuti ŵakutinkhika cifukwa cakuti cisopa cawo nchaunenesko. Nakuti Baibolo likuti waliyose uyo wakukhumba kulondezga Yesu mwakujipeleka watambuzgikenge.—2 Timote 3:12.

Pa nyengo yeneyiyi, ŵakaniphalira kuti nkhagwirenge nchito ku maofesi gha Jele. Zuŵa linyake mu cipinda cakusungiramo vinthu nkhasanga mabokosi gha magazini a ghakale gha Gongwe la Mulinda na Galamukani! Nkhatora magazini agha na kuluta nagho mu cipinda cane nakwamba kughaŵazga. Apo nkhaŵazganga, nkhajipulikanga nga ni munthu uyo wali ku malo gha cipalamba ndipo wasanga tumaji tuwemi. Pakuti nkhaŵa na nyengo yinandi, nkhasambiranga Baibolo zuŵa lililose kwa maora ghanandi.

 Zuŵa linyake ŵakanicema ku ofesi ya jele. Nkhaghanaghananga kuti ŵamunifumiska, ntheura nkhatora tukatundu twane, na kuŵalayira ŵanyane ndipo nkhacimbilira ku ofesi. Kweni nkhati nafika ku ofesi, nkhasanga kuti ŵanijulira mulandu unyake cifukwa ca kusangika na mabuku ghakukanizgika. Ntheura, ŵakasazgirako vyaka vinyake viŵiri.

Pakwamba vikanipweteka comene. Kweni mazuŵa ghanandiko ghakati ghajumphapo, nkhamba kuwona kuti ili likaŵa thumbiko. Nangauli nkhasambira vinandi mu Baibolo, kweni mu mtima nkhakhumbanga kuti para nafuma mu jele nkhalutizge umoyo wane wakale. Nkhakhumbikwiranga nyengo yitali kuti nisinthe.

Nyengo zinyake nkhaghanaghananga kuti Ciuta wangazomerezga yayi kuti niŵe muteŵeti wake. Kweni nkhawovwirika comene nati naghanaghanirapo Lemba la 1 Ŵakorinte 6:9-11. Mavesi agha ghakulongora kuti ŵanji mwa Ŵakhristu ŵakwambilira pambere ŵandambe kuteŵetera Yehova ŵakaŵa ŵankhungu, ŵaloŵevu, na ŵakutuka. Kweni Yehova wakaŵawovwira ndipo ŵakasintha. Ivyo vikacitikira ŵanthu aŵa vikanikhozga comene.

Cikaniŵira cipusu kuleka nkharo zane zinyake. Mwaciyelezgero nkhasuzgika viŵi yayi kuleka kumwa munkhwala wakuzweteska wongo. Kweni kuti nileke kukhweŵa pakaŵa gutuli. Nkhafwilirapo kwa cilimika cimoza, ndipo paumaliro nkhaleka hona. Cinyake ico cikanovwira kuti nileke, nkhumanya uheni wa hona mu thupi la munthu. Cakuzirwa comene nchakuti nkhafwilirangapo kulomba kwa Yehova ndipo wali kunovwira kuleka hona.

Apo ubwezi wane na Yehova ukakuranga, maghanoghano ghakuti adada ŵali kutijowora ghakamba kumara. Mazgu gha pa Salmo 27: 10 ghakanikhwaska comene. Vesi ili likuti: “Pakuti ŵadada na ŵamama nanga ŵandiside, kweni Yehova tiwanditorenge.” Nkhawona kuti nasanga Dada muwemi comene uyo wazamunitayapo yayi. Pasono umoyo wane ngwacandulo. Mu Epulero 2004, pati pajumpha myezi 6 nati nafuma mu jele, nkhabapatizika kuŵa Kaboni wa Yehova.

UMO NASANGIRA CANDULO:

Pasono nili wakukondwa cifukwa nili kuleka nkharo izo zikatenge zinangenge umoyo wane. Sono nili na umoyo uwemi kuluska apo nkhaŵa muwukirano. Mbumba yane njakukondwa kweniso nili paubwezi na Dada wane wakucanya Yehova. Mu gulu la ŵanthu awo ŵakusopa Yehova, nasangamo ŵadada, ŵamama, ŵakuru, ŵanung’una, na ŵadumbu. (Mariko 10:29, 30) Nkhuŵawonga comene cifukwa cakuti ŵakawonangamo viwemi mwa ine pambere namwene nindaviwone.

Nyengo zinyake nkhujipa mulandu cifukwa ca viheni ivyo nkhacitanga kumasinda. Kweni nkhukhozgeka kumanya kuti Ciuta wakutilayizga caru ciphya, ndipo vinthu viheni vyose ‘vizamukumbukikaso’ cara. (Yesaya 65:17) Ivyo nkhacitanga kumasinda vikunovwira kuti nicitirenge citima ŵanthu awo ŵali na suzgo lakuyana waka. Mwaciyelezgero, cikuniŵira cipusu kupharazgira ŵanthu awo ŵakumwa munkhwala wakuzweteska wongo, ŵaloŵevu, panji vigeŵenga kwambura kusankha. Nkhuŵa na cigomezgo cose kuti usange ine nkhasintha nakwamba kukondweska Yehova, ipo waliyose wangasintha.