Caka cilicose ŵapapa, na ŵalongozgi ŵanji ŵa visopa ŵakupharazga uthenga wa mtende, ndipo ŵakuŵa na cigomezgo cakuti nyengo ya Khisimasi yifiskenge mazgu agho mungelo wakayowoya ghakuti: “Pa caru capasi mtende pakati pa ŵanthu awo wakukondwa nawo.” Ŵanji ŵakwenda maulendo ghatali kuti ŵakasope ku malo agho ngakupatulika kwa iwo.

Mtende wa pa Khisimasi ukulutilira yayi. Mwaciyelezgero, mu Disembala 1914, apo ku Europe kukaŵa Nkhondo Yakwamba ya Caru Cose, ŵasilikari ŵa ku Germany na ŵa ku Britain ŵakafuma ku makululu uko ŵakabisama na kukondwelera Khisimasi pamoza. Ŵakagaŵana vyakurya, vyakumwa, ndudu za hona, kweniso ŵakatimbira lumoza bola. Ndipouli, mtende uwu ukalutilira yayi. Mu kalata yinyake msilikari wa ku Britain wakayowoya ivyo msilikari wa ku Germany wakamuphalira, wakati: “Mwahuno tili pa mtende, kweni namacero iwe uzamulwera caru cako, ine cane.”

“Kwababika kwa ise mwana . . . zina lake tiliŵenge . . . Karonga wa Cimango. Wandanyi wa ufumu wake na wa cimango kuti wamkumara cara.” (Yesaya 9:6, 7) Kasi ucimi wa mu Baibolo wakuyowoya za Yesu Khristu uwu ngwakukhozga yayi? Yesu wakababika pa caru capasi kuti wiziske mtende wa zuŵa limoza caka cilicose yayi. Pakuŵa Themba la kucanya, Yesu wazamukhazikiska mtende uwo uzamumara cara.

“Kwizira mwa ine [Yesu] muŵe na mtende. Mu caru muli na suzgo, kweni khwimani mtima! Ine natonda caru.” (Yohane 16:33) Nanga ni sono nthena Yesu wakovwira ŵalondezgi ŵake kuŵa ŵamtende. Ŵakhristu ŵaunenesko ŵakusangana na masuzgo nadi. Kweni Baibolo likuŵawovwira kupulikiska cifukwa ico paliri masuzgo ndiposo umo Yesu wizirenge na mtende weneco. Ntheura ŵakuŵa na mtende wa mu maghanoghano.

Pakuti ŵakucita mwakukolerana na ivyo Yesu wakasambizga, Ŵakaboni ŵa Yehova pa caru cose ŵali na mtende uwu, nangauli ŵakupambana vyaru, mtundu, mitheto panji ciyowoyero. Mphanyi mwaluta ku maungano ghawo ku Nyumba ya Ufumu kuti mukajiwonere mwekha. Panji namwe nga umo ŵanji ŵacitira, mwamuzomerezga kuti mtende uwo ŵali nawo nguwemi kuluska uwo ŵanthu ŵakusanga pa Khisimasi.