Nkhababikira mu tawuni ya bata mumphepete mwa Mlonga wa Ohio kumpoto, ca kumanjiliro gha dazi kwa Virginia, U.S.A. Ndine waciŵiri pa ŵana ŵanayi mu nyumba yakwithu. Taŵanyamata tilipo ŵatatu, msungwana yumoza ndipo kanandi tikaŵanga ŵakukondwa. Ŵapapi ŵithu ŵakalimbikiranga comene nchito, ŵakaŵa ŵakugomezgeka kweniso wakatemwanga ŵanji. Tikaŵa ŵasambazi yayi, kweni nyengo zose tikaŵanga na ivyo tikukhumba. Pakuti ŵapapi ŵane ŵakaŵa Ŵakaboni ŵa Yehova, ŵakafwilirapo kutisambizga Baibolo kufuma pa wanici.

Kweni nkhati nakura, mtima wane ukamba kupuluskika ntheura nkhamba kukayikira ivyo nkhasambizgika. Nkhakayikiranga usange munthu wakusanga nadi candulo para wakulondezga fundo za mu Baibolo. Nkhaghanaghananga kuti ningaŵa wakukondwa nadi usange nkhucita cilicose ico nkhukhumba. Nyengo yicoko waka nkhaleka kuluta ku maungano Ghacikhristu. Ŵana ŵakwithu ŵaŵiri nawo ŵakacita ntheura. Ŵapapi ŵithu ŵakayezgayezga kutovwira, kweni vikaphura kanthu yayi.

Nkhamanyanga yayi kuti uwo nkhatenge ni wanangwa, unizgorenge muzga wa nkharo ziheni. Zuŵa linyake apo nkhaweranga ku sukulu munyane munyake wakanipa ndudu ya hona ndipo nkhapoka. Kufuma waka pa zuŵa ili, nkhajizomeleranga waka kucita cilicose. Pamasinda, nkhamba kutemwa comene munkhwala wakutimbanizga wongo, kumwa moŵa mwakujumphizga kweniso kucita uzaghali. Nkhamba kumwa minkhwala yakutimbanizga wongo yankhongono comene iyo yikaninjira ndipo yikamba kuninanga na kunizgora muzga wake. Vimunkhwala ivi vikati vyaninjira comene nkhamba na kuviguliska wuwo kuti nisangenge wovwiri.

Njuŵi yane yikanikumbuskanga kuti ivyo nkhacitanga ni viheni nangauli nkhayezgayezganga kuyizerezga. Nakuti nkhawonanga kuti maji ghathika kale ndipo palije ico ningacita. Nanga ni para naluta ku malo gha viphikiro na vyakwimbakwimba, kanandi nkhacitanga phukwa kweniso kusuzgika maghanoghano. Nyengo zinyake para naghanaghanira kuti ŵapapi ŵane ŵakaŵa ŵankharo yiwemi kweniso ŵakujipwelera, nkhajifumbanga kuti, kasi vikenda wuli kuti nizgeŵe nthena?

Nangauli nkhasulako vyakuti ningasintha na kuŵaso munthu muwemi, kweni ŵanji ndimo ŵakacitira yayi. Mu caka ca 2000, Ŵapapi ŵane ŵakanicemera ku ungano wa cigaŵa wa Ŵakaboni ŵa Yehova. Nkhaluta kweni mwa kucicizgika waka. Nkhazizwa kuwona kuti ŵana ŵakwithu ŵaŵiri ŵakugaluka ŵara nawo ŵakiza ku ungano.

Apo nkhaŵa pa ungano uwu, nkhakumbuka kuti nyengo yinyake nkhaŵaso pa malo gheneghagha apo kukaŵa dansi. Kweni pakaŵa mphambano yikuru ndipo ici cikanikhwaska comene. Pa nyengo ya dansi, pa malo agha viswaswa vikaŵa bwekabweka kweniso josi la hona likaŵa phwititi! Ŵanandi awo ŵakiza ku dansi iyi ŵakaŵa ŵakali, ndipo uthenga wa mu sumu nawo ukaŵa wakukwenyerezga comene. Kweni pa ungano uwu nkhakhala na ŵanthu awo ŵakaŵa ŵakukondwa nadi. Ŵakanipokelera makora nangauli pakajumpha vyaka vinandi tindawonane. Malo agha ghakaŵa ghakutowa ndipo uthenga uwo ŵakayowoyanga ukaŵa wa vinthu viwemi vyamunthazi. Nkhati nawona uwemi wakusambira Baibolo, nkhajifumbanga kuti, cifukwa wuli nkhakana kulisambira?—Yesaya 48:17, 18.

Ungano wacigaŵa ukati wamara, mwaluŵiro nkhaghanaghana vya kuweleraso ku mpingo Wacikhristu. Ŵana ŵakwithu nawo ŵati ŵacontheka mtima na ivyo ŵakawona ku ungano uwu, ŵakacita mwakuyana waka. Tose taŵatatu tikazomera kusambira Baibolo.

Lemba ilo likanicontha comene ni Yakobe 4:8 ilo likuti: “Sendelerani kwa Ciuta, ndipo iyo wasendelerenge kwa imwe.” Nkhamanya kuti usange nkhukhumba kuŵa paubwezi na Ciuta nkhwenera kusintha nkharo zane ziheni. Nkhakhumbikwiranga kuleka kukhweŵa hona kweniso kumwa munkhwala wakutimbanizga wongo na uloŵevu.—2 Ŵakorinte 7:1.

Nkhaleka kucezga na ŵabwezi ŵane ŵakale ndipo nkhamba kucezga na ŵabwezi ŵaphya awo ŵakasopanga Yehova. Munthu uyo wakasambiranga nane Baibolo wakanovwira comene. Kanandi wakaniyimbiranga foni kweniso nyengo zinyake wakizanga kuzakaniwona. Mpaka sono njumoza wa ŵabwezi ŵane ŵa pa mtima.

Mu 2001, nane nkhabapatizika kulongora kuti najipeleka kwa Ciuta nga umo ŵakacitira ŵana ŵakwithu ŵaŵiri aŵa. Ŵapapi pamoza na munung’una withu ŵakakondwa comene apo tose mu mbumba tikamba kusopa Yehova.

Kale nkhaghanaghananga kuti fundo za mu Baibolo zikunifyenyerezga, kweni sono nkhuziwona kuti nchivikiliro capacanya comene. Baibolo likanovwira kuleka kuguliska munkhwala wakuzweteska wongo ndipo sono ndine munthu wakovwira mu cikaya.

Nili na mwaŵi wakuŵa mu gulu la ŵanthu awo ŵakusopa Yehova, awo ŵakupanga ubali wa pa caru cose. Ŵanthu aŵa ŵakutemwana zanadi, ndipo ŵakukolerana pa kuteŵetera Ciuta. (Yohane 13:34, 35) Mu gulu ili nili kusangamo thumbiko lapadera comene ilo ni muwoli wane Adrianne uyo nkhumutemwa comene na kumucindika. Tikukondwa comene pakuteŵetera lumoza Mlengi withu.

M’malo mwa kupenja waka vyakukhumba vyane, sono ndine mupharazgi wa nyengo zose, nkhusambizga ŵanthu umo nawo ŵangasangira candulo na Mazgu gha Ciuta. Mulimo uwu ukunipa cimwemwe cikuru comene kuluska cilicose. Ningayowoya na mtima wose kuti Baibolo lili kusintha umoyo wane. Sono nasanga wanangwa weneko.