Fumbo ili lafumbika cifukwa Yesu wakalayizga cigeŵenga ico cikapayikika kumphepete kwake kuti camuŵa na iyo mu paradiso. Yesu wakati: “Nadi pano nkhukuphalira muhanya uno, Uzamuŵa na ine mu Paradiso.” (Luka 23:43) Wonani kuti Yesu wakayowoya yayi uko Paradiso ŵamuŵa. Kasi Yesu wakang’anamuranga kuti cigeŵenga ici camuŵa na iyo kucanya?

Cakwamba, tiyeni tiwone usange cigeŵenga ici cikafiskanga ivyo vikukhumbikwa kwa ŵanthu awo ŵakuluta kucanya. Ŵanthu awo ŵali na cigomezgo ca kuluta kucanya, ŵakubapatizika na maji kweniso mzimu utuŵa, ntheura ŵakuŵa ŵasambiri ŵa Yesu kweniso ŵana ŵa Ciuta. (Yohane 3:3, 5) Cinthu cinyake cakukhumbikwa nchakuti ŵakwenera kufiska ivyo Ciuta wakukhumba na kulongora mikhaliro nga nkhugomezgeka na lusungu. (1 Ŵakorinte 6:9-11) Ŵakwenera kugomezgeka kwa Ciuta na kwa Khristu umoyo wawo wose wa pa caru capasi. (Luka 22:28-30; 2 Timote 2:12) Pekha para ŵakulongora mikhaliro iyi ndipo tingati mbakwenelera mulimo uwo ŵamucita kucanya, kuteŵetera nga mbasofi na mafumu pamoza na Khristu na kuwusa ŵanthu pa caru capasi kwa vilimika 1000.—Uvumbuzi 20:6.

Mwakupambana na fundo izi, munthu uyo wakapayikika pamoza na Yesu wakaŵa cigeŵenga ndipo wakafwa nga nchigeŵenga. (Luka 23:32, 39-41) Mbunenesko kuti wakalongora kuti wakacindikanga Yesu apo wakayowoya kuti: “Muzakanikumbuke para mwiza mu ufumu winu.” (Luka 23:42) Kweni wakabapatizika yayi na mzimu utuŵa. Wakalongora yayi kuti wakaŵa na nkharo yiwemi, wakugomezgeka, nesi kuzizipizga. Kasi cingaŵa cakupulikikwa kuyowoya kuti Yesu wakamulayizga umoyo wakucanya pamoza na ŵasambiri ŵake awo ŵalongora kugomezgeka umoyo wawo wose?—Ŵaroma 2:6, 7.

Tiyelezgere kuti munthu munyake uyo wiba ndalama zinu wakumupemphani kuti mumugowokere. Vili kwa imwe kumugowokera panji yayi. Kweni kasi munthu wantheura mungamugomezga kuti ndiyo wendeskenge bizinesi yinu panji kupwelelera mbumba yinu? Mulimo uwu mungapeleka kwa munthu yekha uyo imwe mukumumanya kuti ngwakugomezgeka. Mwakuyana waka, ŵanthu awo ŵali na cilindizga ca kuluta kucanya ni ŵekha awo ŵalongora kuti mbakugomezgeka ndipo ŵamulutilira kudemelera ku fundo zaurunji za Ciuta apo ŵamuwusa ŵanthu pa caru capasi. (Uvumbuzi 2:10) Nangauli cigeŵenga cira cikapempha cigowokero apo cikaŵa pafupi kufwa, kweni palije apo pakulongora kuti camuŵa kucanya.

Kweni kasi Yesu wakati munthu uyu wamuŵa na iyo kucanya zuŵa leneliro? Yayi, cifukwa nanga ni Yesu kuti wakaluta kucanya zuŵa leneliro yayi. Wakaŵa kuti wacali mu “mtima wa caru” panji kuti mu dindi kwa mazuŵa ghatatu. (Mateyu 12:40; Mariko 10:34) Kweniso wati wawuskika wakaŵa pa caru capasi kwa mazuŵa 40 pambere wandalute kucanya. (Milimo 1:3, 9) Ntheura, cigeŵenga cira cikaŵa na Yesu kucanya cara.

Ipo kasi ni Paradiso nju uyo cigeŵenga cira cili kulayizgika? Para cazakawuskika cizamuŵa mu Paradiso pa caru capasi apo Yesu ndiyo wazamuwusa. (Milimo 24:15; Uvumbuzi 21:3, 4) Kuti mumanye vinandi vyakukhwaskana na Paradiso uyu kweniso ivyo Ciuta wakukhumba, kumanani na yumoza wa Ŵakaboni ŵa Yehova.