Nkhakulira ku malo agho ŵanandi ŵakaŵa ŵakavu mu msumba wa Turku uwo ukaŵa pafupi na jiti. Adada ŵakaŵa nkhwantha pa maseŵero gha nkhonya, ndipo ine na munung’una wane nase tikacitangako maseŵera agha. Apo nkhaŵa pa sukulu nkhakaŵanga yayi kutimbana na ŵanthu. Apo nkhaŵa muwukirano, nkhanjira mu gulu la ŵanthu ŵakusuzga, ndipo ivi vikacitiska kuti niŵe wa nkhaza comene. Nkhambaso kutemwa sumu za vyongo, ndipo nkhakhumbanga kuti nizakaŵe nkhwantha ya sumu izi.

Nkhagura ng’oma na kwambiska gulu la kwimba. Nyengo yicoko waka ndine nkhadangiliranga pakwimba mu gulu ili. Ndipo para nkhwimba kunthazi, kanandi nkhacitanga nga ngwavifusi. Pakuti gulu lithu likacitanga vinthu nga ndavifusi kweniso likapomanga comene vyongo pakwimba, ŵanthu ŵanandi ŵakalitemwanga. Tikamba kwimba panthazi pa ŵanthu ŵanandi. Tikajamburapo sumu zicoko waka, ndipo zinyake mwa izo ŵanthu ŵakazilumba. Ca m’ma 1980, tikaluta ku United States kuti tikasazgireko luso lwithu. Tikayimbapo maulendo ghacoko waka ku New York na ku Los Angeles, uko tikaŵa na mwaŵi wa kudumbiskana na makampani gha vyakwimbakwimba pambere tindawelere ku Finland.

Nangauli nkhakondwanga kuŵa mu gulu ili, kweni nkhakhumbanga kumanya cilato ca umoyo. Nkhavuka na nkhaza izo ŵanthu mu makampani gha vyakwimbakwimba ŵakacitanga kweniso nkhajicitiranga citima cifukwa ca nkharo zane zauzereza. Nkhajiwonanga kuŵa munthu muheni, ndipo nkhawopanga kuti ningazakaphya mu gehena. Nkhayezga kupenja mazgoro mu mabuku ghanandi gha visopa na kulomba kufumira pasi pa mtima kuti Ciuta wanovwire, nangauli nkhaghanaghananga kuti palije ico ningacita kuti nimukondweske.

Kuti nisange wovwiri nkhagwiranga nchito pa positi ofesi. Zuŵa linyake nkhamanya kuti munthu uyo nkhagwiranga nayo nchito ni Kaboni wa Yehova. Nkhamuphurunga na mafumbo. Kweni mazgoro ghake ghakudunjika gha mu Malemba ghakanicontha,  ntheura nkhazomera kuti wasambirenge nane Baibolo. Nkhati nasambirapo kwa masabata ghacoko waka, gulu lithu likapika mwaŵi kuti likajambure sumu zithu na kufumiska alibamu ku United States. Nkhawona kuti uwu ni mwaŵi ukuru pa umoyo wane.

Nkhaphalira Kaboni uyo wakasambiranga nane Baibolo kuti nkhukhumba kufumiska alibamu yinyake yimoza ndipo pamanyuma nizamwamba kulondezga fundo za mu Baibolo. Wakayowoyapo kalikose yayi, kweni wakaniphalira waka kuti niŵazge mazgu gha Yesu gha pa Mateyu 6:24. Vesi ili likuti: “Palije uyo wangateŵetera nga ni muzga wa ŵeneco ŵaŵiri.” Nkhazizwa comene nati namanya ico mazgu agha ghakung’anamura. Kweni mazuŵa ghacoko waka ghati ghajumphapo uyo wakasambiranga nane Baibolo ndiyo wakazizwa nati namuphalira kuti naleka vyakwimba cifukwa nkhukhumba kulondezga Yesu.

Baibolo likaŵa nga ni gilasi ndipo likanivumbulira maubudi ghane. (Yakobe 1:22-25) Nkhaŵa na nkharo yawakawaka, mwaciyelezgero, nkhaŵa wakujikuzga, kweniso muryezi. Nkhatukanga, kucita mbembe, kukhweŵa, na kuloŵera comene. Nkhati namanya kuti nkharo zane zikukolerana yayi na fundo za mu Baibolo, nkhajipa mulandu comene. Nangauli vikaŵa vyakusuzga comene kweni nkhaŵa wakunozgeka kusintha.—Ŵaefeso 4:22-24.

Kukwambilira, nkhasuzgikanga comene maghanoghano para nakumbuka viheni ivyo nkhacitanga. Kweni Kaboni uyo wakasambiranga nane Baibolo wakanovwira comene. Wakanilongora ivyo Baibolo likuyowoya pa Yesaya 1:18, apo pakuti: ‘Nanga zakwananga zinu zingaŵa ziswesi, tiziŵenge zituŵa ngati matalala.’ Lemba ili kweniso ghanyake ghakanikhorweska kuti Adada ŵithu ŵa kucanya mbalusungu, ndipo ŵakukhumba kupozga vilonda vya ŵakwananga awo ŵapera.

Nkhati namumanya Yehova na kwamba kumutemwa, nkhasankha kujipeleka kwa iyo. (Salmo 40:8) Ntheura, mu 1992 nkhabapatizika pa ungano wa vyaru vyose wa Ŵakaboni ŵa Yehova uwo ukacitikira ku St. Petersburg, Russia.

Nasanga ŵabwezi ŵawemi pa ŵanthu awo ŵakusopa Yehova. Sono tikwimbira lumoza sumu ziwemi ndipo tikukondwa na cawanangwa cakufuma kwa Ciuta ici. (Yakobe 1:17) Thumbiko lane lapadera ni muwoli wane, Kristina. Na muwoli wane uyu tikucitira vinthu vinandi pamoza, kwali mpha mtende, panji pa masuzgo, kweniso tikuphalirana vyakusingo.

Nilekenge kuŵa Kaboni wa Yehova, mphanyi pasono nili kufwa kale. Kumasinda uku nkhakhaliranga masuzgo pera. Kweni sono nkhumanya cilato ca umoyo ndipo nkhuwona kuti vinthu vili makora.