AWO WAKUKOLERANA na fundo yakuti visopa vyose vicitirenge vinthu pamoza, ndimo ŵakuwonera yayi. Munthu munyake wakati: “Niphalirani, nchisopa nchi ico cikuleka kusambizga lusungu . . . , kupwelelera cilengiwa . . . , na kupokelera ŵalendo?”

Ŵabuda, Ŵakatolika, Ŵahindu, Ŵasilamu, na ŵanyake ŵanandi, kanandi ŵakukumana na kudumbiskana nkhani zakupambanapambana. Mwaciyelezgero, ŵakudumbiskana vya ukavu, wanangwa ŵa ŵanthu, kupwelelera cilengiwa na nkhani zinyake. Para ŵakumana ŵakucita viphikiro. Pa viphikiro ivi ŵakubuska makandulo, kwimba, kuvina, kulomba na vinyake vyantheura.

Para ŵakumana pamoza, kasi ndipo ŵakupulikana cimoza? Kasi Baibolo likuzomerezga kuti visopa vicitirenge vinthu pamoza, kuti vinthu viŵeko makora pa caru?

Wupu unyake uwo ukambiska kuti visopa vicitirenge vinthu pamoza, ukuti uli na mamembara mu visopa vyakujumpha 200, mu vyaru 76. Cilato cawo nchakuti “umoza ulutilire pakati pawo.” Kweni vyawoneka kuti ŵakuyowoya waka. Mwaciyelezgero, ŵalongozgi ŵa wupu uwu ŵali kukolerana kuti para ŵakukumana ŵaleke kuyowoya cilicose ico cingakhuŵazga ŵavisopa vinyake. Cifukwa wuli ŵali kukaka fundo iyi? Cifukwa cimoza nchakuti pakaŵa kupambana maghanoghano pa nkhani yakuti ŵazunurenge Ciuta panji yayi. Ntheura ŵakakaka fundo yakuti ŵaleke kuzunura Ciuta panji cilicose cakukhwaskana na Ciuta.

Para Ciuta ŵakumuzunurapo yayi, kasi umoza ungaŵapo wuli nthena? Kasi wupu uwo wazunulika pacanya apa, ukupambana na mawupu ghanyake agho ghakovwira ŵanthu? Yayi, lekani wupu uwu ukukana kuti ngwacisopa, kweni ukuti ukovwira waka kuti paŵe umoza.

Mulara munyake wa wupu uwu wakati: “Visopa vyose vikusambizga kuti ŵanthu ŵatemwanenge, kucitirana lusungu, na kugowokerana.” Wakatiso: “Munthu wakwenera kulongora mikhaliro iyi zuŵa lililose.”

Citemwa, lusungu, na kugowokera, ni mikhaliro yakuzirwa comene. Nakuti Yesu wakayowoya fundo yinyake yakuzirwa pa nkhani iyi, wakati: “Vinthu vyose ivyo mukukhumba kuti ŵanthu  ŵamucitirani, namwe mukwenera kucita mwakuyana waka kwa iwo.” (Mateyu 7:12) Kasi kuŵa na cipulikano canadi vikuthemba pa kusambizga waka nkharo yiwemi?

Pakuyowoya za ŵanthu awo ŵakatenge ŵakusopa Ciuta, Paulosi wakati: “Nkhuŵacitira ukaboni kuti ŵali na mwamphu pakuteŵetera Ciuta; kweni mwakuyana na kumanya makora cara.” Kasi suzgo likaŵa vici? Wakatiso: “Cifukwa ca kuleka kumanya urunji wa Ciuta,” ŵakakhumbanga “kujiŵikira urunji wawo.” (Ŵaroma 10:2, 3) Pakuti ŵakamanyanga makora yayi ivyo Ciuta wakukhumba kuti ŵacitenge, mwamphu na cipulikano cawo vikaŵa vyawaka.—Mateyu 7:21-23.

Yesu wakati: “Mbakukondwa awo mbamtende.” (Mateyu 5:9) Yesu wakacitanga ivyo wakapharazganga. Ntheura wakaciskanga ŵanthu kuti ŵaleke kucita nkhaza, ndipo wakaphaliranga ŵanthu ŵavisopa vyakupambanapambana uthenga wamtende. (Mateyu 26:52) Wose awo ŵakasintha ŵati ŵapulika ivyo Yesu wakasambizganga, ŵakaŵa na citemwa canadi. (Ŵakolose 3:14) Kasi Yesu wakakhumbanga kovwira waka ŵanthu ŵa visopa vyakupambanapambana kuti ŵaŵe pa mtende? Kasi Yesu wakacitiranga nawo vinthu pamoza?

Ŵasaduki na Ŵafarisi ŵakamutinkhanga comene Yesu. Ndipo ŵakakhumba na kumukoma wuwo cifukwa ŵakasuskanga ivyo wakasambizganga. Kasi Yesu wakacita wuli? Wakaphalira ŵasambiri ŵake kuti: “Ŵalekani. Iwo mbalongozgi ŵacibulumutira.” (Mateyu 15:14) Yesu wakakana kucitira vinthu pamoza na ŵanthu aŵa.

Pamasinda, mpingo Wacikhristu ukamba mu Korinte na Girisi. Pakwamba, ŵanthu ŵavisopa vyakupambanapambana mu misumba iyi ŵakazgoŵera kucitira vinthu pamoza. Kasi Ŵakhristu ŵakenera kucita wuli? Paulosi wakaŵaphalira kuti: “Mungakakikanga joko mwakupambana pamoza na ŵambura kugomezga cara.” Cifukwa wuli? Iyo wakati: “Pali kuyana wuli pakati pa Khristu na Beliyali [Satana]? Panji munthu wakupulikana wali na cigaŵa wuli na wambura kugomezga?” Paumaliro, wakaŵacenjezga kuti: “Ntheura fumanipo pakati pawo, ndipo jipaturani mwaŵene.”—2 Ŵakorinte 6:14, 15, 17.

Apa vikulongolerathu kuti Baibolo likuzomerezga cara kuti visopa vicitirenge vinthu pamoza. Kweni panji mungajifumba kuti, ‘Kasi nchivici cingawovwira kuti paŵe umoza?’

Makampani gha vyakuzengazenga ghakuŵa na ŵanchito ŵanandi. Kweni kuti nchito yawo yende makora wose ŵakwenera kwendera pulani iyo ŵasankha.

Cacitima nchakuti ndimo viliri yayi na wupu uwo ukukhozgera kuti visopa vicitirenge vinthu pamoza. Nangauli ŵanthu aŵa ŵakukhumba nga ŵangakolerana, kweni vikutondeka cifukwa ŵakupambana vigomezgo. Lekani waliyose wakwendera vyake para ŵakusambizga vya nkharo panji nkhani zinyake za cisopa.

Baibolo lili na fundo izo tikwenera kulondezga. Fundo izi zingatovwira zuŵa na zuŵa. Ŵanji zaŵawovwira kumazga sankho ilo likuŵapo cifukwa cakupambana visopa. Ndipo ŵasambira kucita vinthu mwamtende na ŵanji. Ciuta wakayowoyerathu kuti: “Nding’anamure kayowoyero ka ŵanthu kuŵa kayowoyero katuŵa, mwakuti wose ŵacemenge pa zina la Yehova na kumuteŵetera Iye na mtima umoza.” “Kayowoyero katuŵa” ndiko kangawovwira kuti paŵe umoza, uko nkhusopa Ciuta umo iyo wakukhumbira.—Zefaniya 3:9; Yesaya 2:2-4.

Ŵakaboni ŵa Yehova ŵakumucemani kuti mwize ku Nyumba ya Ufumu ya kufupi na kwinu kuti muzakajiwonere mwekha mtende na umoza uwo wuli pakati pawo.—Salmo 133:1.