Mazuŵa ghano ŵanthu ŵakuchindika yayi ŵanyawo. Mwachiyelezgero, ku chipatala ŵalwari ŵakukalipira madokotala, makasitomara ku resitiranti ghakukalipira ŵantchito awo ŵakupeleka vyakurya, ŵanthu awo ŵakwera ndege ŵakuwukira ŵantchito awo ŵakuŵawovwira mu ndege; ŵana ŵasukulu ŵakuseka, kofya na kutimba ŵasambizgi ŵawo, kweniso ŵandyali ŵanyake ŵakuchita vinthu viheni chomene apo ŵanyake ŵakuyezga kujiwoneska kuti wakuchita makora chomene vinthu.

 Mu Baibolo ndimo muli ulongozgi wakugomezgeka wa umo tingaŵira na nkharo yiwemi. Likulongosoraso chifukwa icho pasono ŵanthu ŵakutondekera kuŵa na nkharo yiwemi.

 Pasono pa charu chose chapasi ŵanthu ŵakuchindika viŵi yayi ŵanyawo.

•   Mwakuyana na kafukufuku uyo wakachitika mwasonosono ku United States ŵasanga kuti pasono nkharo za ŵanthu zanjira pasi chomene kuluska mu vyaka 22 ivyo vyajumpha.

•   Ndipo kafukufuku munyake uyo wakachitika ku ŵanthu ŵakujumpha 32,000 mu vyaru 28, 65 peresenti ya ŵanthu aŵa ŵakayowoya kuti pasono pa charu chose nkharo za ŵanthu zanjira pasi chomene kuluska kumanyuma kose uku.

 Baibolo likayowoyerathu za nkharo izo tikuziwona mazuŵa ghano.

•   “Kweni umanye ichi, kuti mu mazuŵa ghaumaliro kuzamuŵa nyengo zinonono na zakusuzga. Pakuti ŵanthu ŵazamuŵa ŵakujitemwa, ŵakutemwa ndalama, ŵakujiŵikamo, ŵakujikuzga, ŵakuyuyura Chiuta, ŵambura kupulikira ŵapapi, ŵambura kuwonga, . . . ŵambura chitemwa, ŵanonono, ŵakusesa, ŵambura kujikora, ŵakofya.”—2 Timote 3:1-3.

 Kuti mumanye vinandi pa umo uchimi uwu ukufiskikira, ŵazgani nkhani ya mutu wakuti “Kasi Baibolo Likayowoyerathu Umo Ŵanthu Ŵazamughanaghaniranga na Kuchita Vinthu Mazuŵa Ghano?”

 Mu charu icho nkharo za ŵanthu zanjira pasi, ŵanthu ŵanandi ŵasanga kuti Baibolo ndilo lili na ulongozgi uwemi chomene ndipo lingatovwira kuŵa na nkharo yiwemi. Ulongozgi wake ‘nyengo zose ngwakugomezgeka, sono na muyirayira.’ (Salimo 111:8) Wonani viyelezgero vichoko waka ivi:

•   Ivyo Baibolo likuyowoya: “Vinthu vyose ivyo mukukhumba kuti ŵanthu ŵamuchitiraninge, ndivyo namwe muŵachitirenge.”—Mateyu 7:12.

   Ivyo vesi ili likung’anamura: Tikwenera kuŵachitira lusungu ŵanyithu na kuŵachindika nga umo ise tingakhumbira kuti ŵanyithu ŵachitire nase.

•   Ivyo Baibolo likuyowoya: “Sono pakuti mwaleka utesi, waliyose wa imwe wayowoyenge unenesko na mzengezgani wake.”—Ŵaefeso 4:25.

   Ivyo vesi ili likung’anamura: Tikwenera kuŵa ŵanenesko mu vyose ivyo tikuyowoya na kuchita.

 Kuti mumanye vinandi pa nkhani iyi, ŵazgani nkhani mu:

•   Gongwe la Mulinda ya mutu wakuti “Ulongozgi Uwo Tingawugomezga Pakusankha Chiwemi na Chiheni.”

•   Kweniso nkhani ya mutu wakuti “Kasi Baibolo Lingatovwira Wuli Kuti Tizizipizgiranenge?.”