“Nyengo yikusintha mwaluŵiro chomene. Misumba yikuruyikuru yikuzura na maji ghakututuka. Kukotchanga chomene. Kuli vimphepo vyakofya. Maji ghakusoŵa. Mitundu yinandi ya vyakumera na vinyama yili kwamba kumara. Nakuti uwu ndiwo mbunenesko, palije vyakusazgirako. Ndivyo ŵasayansi ŵakutiphalira kuti vichitikenge chifukwa cha malango agho tili nagho pa nkhani ya vya magesi.”—Wakayowoya ni António Guterres, mulara wa Wupu wa United Nations, pa nkhani ya lipoti la wupu wa Intergovernmental Panel on Climate Change ilo likafumiskika pa April 4, 2022.

 “Ŵasayansi ŵakufipa mtima kuti mu vyaka ivyo vikwiza kunangika kwa vinthu uko kukwiza chifukwa cha kusintha kwa nyengo kungathandazgika na mu malo ghakusungirako vinthu vya chilengiwa ghose 423 [ku United States], agho pasono nthena ghakukhwaskika kale na suzgo la kotcha chomene. Vinthu vyakofya nga ni moto na kututuka kwa maji, kusungunuka kwa maji ghakukhoma, unandi wa maji mu Nyanja na kotcha chomene kwa charu vyazara chomene.”—Kufuma pa nkhani yakuti, “Flooding Chaos in Yellowstone, a Sign of Crises to Come,” Nyuzipepara ya New York Times, June 15, 2022.

 Kasi masuzgo ghakunangika kwa chilengiwa ghangamara? Para ni nthena, ninjani wangaghamazga? Wonani ivyo Baibolo likuyowoya.

 Baibolo likuti Chiuta ‘wazamuparanya awo ŵakunanga charu chapasi.’ (Chivumbuzi 11:18) Vesi la mu Baibolo ili likutiphalira vinthu vitatu:

1.  1. Vyakuchita vya ŵanthu vizamunanga chomene charu.

2.  2. Kunangika kwa charu kuzamumara.

3.  3. Chiuta pera ndiyo wazamumazga suzgo lakunangika kwa charu, ŵanthu yayi.

 Baibolo likuti “charu chapasi chikukhalilira muyirayira.” (Mupharazgi 1:4) Nyengo zose chiŵenge chakuti ŵanthu ŵangakhalamo.

•   “Ŵarunji ŵazamuhara charu chapasi, ndipo ŵazamukhala mwenemumo muyirayira.”—Salimo 37:29.

 Charu chose chizamuŵaso makora.

•   “Mapopa na charu chambura maji vizamusekelera, chipalamba chizamukondwa na kuzota nga ni luŵa la safuroni.”—Yesaya 35:1.