Pa October 23, 2020, * Khoti la Oktyabrsky ilo lili ku Kirov, lizamupeleka chigamuro chake pa mulandu wa Mubali Anatoliy Tokarev. Wangazakapika chilango chakuti wakagwire jele vyaka vitatu na hafu.

Anatoliy Tokarev

• Chaka cha kubabikira: 1958 (Baranovskaya, Chigaŵa cha Kirov)

• Mbiri yake: Wakalereka na mama ŵake. Wakagwirapo ntchito yakupanga mapulogiramu gha pa kompyuta. Wakutemwa kujambura vithuzi, kuseŵera tchesi na kulizga chikediyoni. Wakatorana na Margarita mu 1979. Ŵali na ŵana ŵaŵiri

• Wati wasambira chomene sayansi wakamba kugomezga kuti Chiuta kulije. Apo wakaŵa na vyaka 27, wakamba kusambira Baibolo na Ŵakaboni ŵa Yehova, pamanyuma wakawamo kuti ivyo Ŵakhristu ŵakugomezga vikususkana yayi na sayansi

Pa May 24, 2019, ŵamazaza ŵa boma ŵakiza na kusecha mwakuchichizga nyumba ya Tokarev. Ŵamazaza aŵa ŵakamba kumufumba mafumbo Mubali Tokarev, ndipo ŵakamofyaso kuti mbumba yake ŵayipenge mulandu para wakutondeka kuzomera kuti wachitanga vinthu mwakutalulira. Mubali Tokarev ŵakaluta nayo ku ofesi kwawo kuti ŵakamufumbe mafumbo.

Myezi 5 yati yajumphapo, Mubali Tokarev ŵakamupa mulandu pakutolera ivyo vili mu malango gha charu cha Russia. Ŵakuti wali na mulandu wakuti wakupeleka wovwiri wa ndalama ku gulu ilo ‘likuchita vinthu mwakutalulira.’ Ŵamazaza aŵa ŵakugwiliskiraso ntchito mazgu agho ŵakajambura mwakubisilizga mu nyumba ya Tokarev kuti ŵamupeso mulandu wakuti wakapangiskanga ungano uwo ŵakasambiranga mabuku agho ngakukanizgika na boma.

Tikumulombera Mubali Tokarev na banja lake. Tikugomezga kuti Yehova walutilirenge ‘kuchita nawo mwakugomezgeka’.—Salimo 18:25.