NEW YORK—Boma la Russia likukhumba kukanizga ntchito ya Ŵakaboni ŵa Yehova mu charu ichi. Ntheura Ŵakaboni ŵa Yehova ŵapempheka kulemba makalata ghakupempha ŵalara ŵaboma ili, kweniso Khoti Likuru Chomene kuti ŵaleke kukanizga ntchito ya Ŵakaboni ŵa Yehova ku Russia. Wupu Wakulongozga wa Ŵakaboni ŵa Yehova ukupempha Ŵakaboni ŵa Yehova ŵakujumpha 8,000,000 pa charu chose kulemba makalata.

Pa March 15, 2017, Unduna wa vya Malango mu charu cha Russia ukamangara ku Khoti Likuru Chomene kuti likanizge Ŵakaboni ŵa Yehova kupharazga na kusopa, kweniso kujara ofesi yawo chifukwa chakuŵaghanaghanira kuti ŵakuchita vinthu mwakutalulira. Unduna uwu ukukhumbaso kujara ofesi ya Ŵakaboni ŵa Yehova. Ntheura usange khoti lingadumura kuyana na ivyo unduna uwu ukukhumba, ndikuti ofesi yikuru ya Ŵakaboni ŵa Yehova iyo yili pafupi na msumba wa St. Petersburg yijalikenge. Kweniso, mawupu ghakwimira Ŵakaboni ŵa Yehova pafupifupi 400 nagho ghamalenge. Ivi vipangiskenge kuti mipingo ya Ŵakaboni ŵa Yehova yakujumpha 2,300 ku Russia yijalike. Vyose ivyo ofesi yikugwiliskiranga ntchito kweniso malo ghose ghakusoperapo gha Ŵakaboni ŵa Yehova, boma lipokenge. Kweniso, Ŵakaboni ŵa Yehova ŵaŵayimbenge mulandu chifukwa cha kusopa na kupharazga uthenga wa Chiuta. Khoti Likuru Chomene ku Russia lizamudumura mulandu uwu pa April 5.

Muyowoyeri wa Ŵakaboni wa Yehova pa ofesi yawo ya pa charu chose, David A. Semonian, wakati: “Wupu Wakulongozga wa Ŵakaboni ŵa Yehova waŵikapo mtima kovwira pa suzgo ili. Boma la Russia latondeka kugwiliskira ntchito makora malango gha boma agho ghakukanizga kuchita vinthu mwakutalulira chifukwa likupeleka mulandu ku ŵanthu awo ŵakupulikira malango ndipo ni vigeŵenga yayi. Ivi vikulongora kuti mulandu uwu, ŵaŵapusikizgira waka.”

Nkhakwamba yayi kuti Ŵakaboni ŵa Yehova pa charu chose ŵalembere boma makalata. Pafupifupi vyaka 20 kumasinda, ŵakalemba makalata kuti ŵawovwire Ŵakaboni ŵa Yehova ŵanyawo apo ŵalara ŵaboma la Russia ŵakachita vyakuyana waka. Kweniso Ŵakaboni ŵa Yehova ŵakalembera ŵalara ŵa boma makalata ghakuti ŵaleke kusuzga Ŵakaboni ŵa Yehova mu vyaru nga Jordan, Korea, na Malawi.

Semonian wakayowoyaso kuti: “Ni mulandu yayi kuŵerenga Baibolo, kwimba na kupemphera lumoza na ŵanyako. Tikugomezga kuti makalata agho Ŵakaboni ŵa Yehova ŵalembenge pa charu chose ghawovwirenge chomene kuti boma la Russia lileke kutambuzga Ŵakhristu ŵanyithu kwambura chifukwa.”

Mungayowoya na:

International: David A. Semonian, Ofice ya Chimanyisko, +1-845-524-3000

Russia: Yaroslav Sivulskiy, +7-812-702-2691