Pa March 15, 2023, nduna ya vya masambiro ku Rwanda yikalangura kuti ŵana ŵa Ŵakaboni ŵa Yehova ŵawelereso ku sukulu kwambura kutondeka. Ŵana aŵa ŵakaŵalekeska sukulu chifukwa chakukana kuchitako maluso ghanyake gha visopa agho ghakususkana na vigomezgo vyawo. Ŵana pafupifupi 80 ŵakaŵalekeska sukulu.

Nduna ya vya masambiro yikatuma makalata kwa meya wa boma lililose ku Rwanda kweniso ku ŵalaraŵalara ŵa mu sukulu zose. Pakuyowoyapo pa nkhani iyi, nduna iyi yikakora mazgu agho ghali mu malango yakwendeskera charu ichi, agho ghakuti: “Munthu waliyose mu charu cha Rwanda wali na wanangwa wakusambira sukulu. Kweniso munthu wali na wanangwa wakuyowoya maghanoghano ghake, ivyo wakugomezga, chisopa, kweniso ni mwanangwa kuchita ivyo mweneko wakukhumba pa nkhani ya kusopa.” Mu makalata agha wakalembamoso kuti waliyose uyo wakukanizga mwana kunjira mu kilasi “ndikuti wakupalamura mulandu ndipo wakwenera kupokera chilango.” Wakakumbuska ŵalaraŵalara ŵa sukulu kuti “paŵavye mwana uyo ŵamulekeske sukulu chifukwa cha ivyo wakugomezga, chisopa icho walimo panji wanangwa wa kuyowoya ivyo wakughanaghana. . . Ntheura, ŵalaraŵalara ŵa sukulu ŵakwenera kulekerathu kuchitira nkhaza ŵana ŵa sukulu ndipo ŵakwenera kuŵawezgerapo pa sukulu ŵana wose awo ŵakaŵalekeska.”

Munyake uyo wakafumiskikapo pa sukulu ni Mudumbu wachiwukirano, zina lake Jeanette Niyonkuru. Iyo wakuyowoya kuti: “Nkhakhala kwambura kusambira sukulu kwa chaka chimoza. Nangauli nkhasanga mwaŵi wakusambira pa sukulu yinyake, kweni nkhendanga pasi maora ghaŵiri zuŵa lililose kuti nkhasambire sukulu.” Awo vikaŵaŵira vyakusuzga kwenda mtunda utali kukafika ku sukulu zinyake ŵakagongowa na kuleka waka sukulu.

Ŵana ŵatatu ŵa Mubali na Mudumbu Hakizimana ŵakaŵalekeska sukulu chifukwa chakuti ŵakakana kuchitako maluso ya chisopa agho ghakachitikanga pa sukulu. Mubali Hakizimana wakayowoya kuti: “Tikatuma kalata kwa hedimasitara wa pa sukulu iyi, kweni wakatizgora yayi. Pamanyuma tikanozga vyakuti tikumane na uyo wakendeskanga sukulu iyi. Iyo wakategherezganga apo ŵana ŵithu ŵakalongosoranga kufuma mu Baibolo ivyo ŵakugomezga ndipouli, pakaŵavya icho chikasintha. Sono tili ŵakukondwa chomene kupulika ivyo nduna yayowoya pa nkhani iyi. Pamanyuma tikaluta kukakumana na ŵalaraŵalara, ndipo ŵana ŵithu ŵakazomerezgeka kuweleraso pa sukulu.”

Tikuwonga chomene ivyo nduna ya vya masambiro iyi yili kuchita, chifukwa ivi vyawovwira kuvikilira wanangwa wa ŵana ŵithu pa nkhani ya sukulu ku Rwanda. Ŵawukirano aŵa ŵakulutilira “kuŵa na njuŵi yiwemi,” ndipo ivi vyapangiska kuti zina la Yehova lichindikike.—1 Petrosi 3:16.