A te taua o Amaketo e fakasino atu ki te ‵toe taua i te va o pulega a tāgata mo te Atua. A pulega konei mo tino e ‵lago ki ei e ‵teke ki te Atua ke oko foki eiloa ki aso nei mai te ita fitifiti ma faka‵logo ki tena pulega. (Salamo 2:2) A te taua o Amaketo ka aumai i ei te gataga ki pulega a tino.​—Tanielu 2:​44.

 A te pati “Amaketo” e sae fakatasi mai eiloa i te Tusi Tapu i te Fakaasiga 16:16. I se auala fakavaloaga, e fakaasi mai i te tusi o Fakaasiga me ka “fakamaopoopo atu” a “tupu o te lalolagi nofoaki kātoa” “ki te taua i te aso lasi o te Atua Malosi Katoatoa” i te “koga telā e taku faka-Epelu ko Amaketo.”​—Fakaasiga 16:14.

 Ko oi ka taua atu i a Amaketo? Ka takitaki ne Iesu Keliso se kautau faka-te-lagi ke taua atu mo te manumalo i fili o te Atua. (Fakaasiga 19:11-​16, 19-​21) E aofia i fili konei ko tino kolā e ‵teke atu ki te pulega a te Atua kae fakatauemu atu foki ki te Atua.​—Esekielu 39:7.

 E mata, ka fai te taua i a Amaketo i fenua o te Middle East? Ikai. I lō te fakasino atu ki se koga e tasi, a te taua o Amaketo ka fai i te lalolagi kātoa.​—Ielemia 25:32-​34; Esekielu 39:17-​20.

 A Amaketo telā ne ‵fuli i nisi taimi ki “Har–​Magedon” (pati Epelu Har Meghiddohnʹ), e fakasino ki te “Mauga o Mekito.” A Mekito se fa‵kai e tasi i te fenua mua o Isalaelu. E fakaasi mai ne tala mua me ne ‵tupu a taua tāua i konā, e aofia i ei a nisi taua kolā ne fakamau i te Tusi Tapu. (Famasino 5:​19, 20; 2 Tupu 9:​27; 23:29) Kae e se fakasino atu a Amaketo ki se koga tonu i kogā koga i tafa o Mekito mua. E seai se mauga lasi i konā, ke oko ki te kogā koga kātoa tenā i te Vanu o Ieseleelu, e mafai o ofi a tino katoa kolā ka taua atu ki te Atua. I lō te fai penā, e fakasino atu a Amaketo ki te tulaga i te lalolagi kātoa, telā ka ‵kau fakatasi a atufenua i te lotou toe ‵tekeatuga ki te Atua.

 Ne a mea ka ‵tupu i te taua o Amaketo? E tiga eiloa e se iloa ne tatou a te auala ka fakaaoga ne te Atua tena ‵mana, ka fakaaoga eiloa ne ia a nisi meatau kolā ne fakaaoga ne ia i aso ko ‵teka​—vaiua fatu, mafuie, vaiua ‵lotu, afi mo te pauta ‵ka, uila, mo masaki. (Iopu 38:22, 23; Esekielu 38:19, 22; Sapakuka 3:​10, 11; Sakalia 14:12) Ona ko te ‵numi valevale, ne fakatau tamate ne fili o te Atua a latou eiloa, kae ka iloa aka ei ne latou me ko te Atua telā e taua atu ki a latou.​—Esekielu 38:21, 23; Sakalia 14:13.

 E mata, a Amaketo ko te gataga o te lalolagi? E se ko te gataga o te ‵tou paneta, me i te lalolagi ko te koga ‵nofo tumau o tino. (Salamo 37:29; 96:10; Failauga 1:4) I lō te fakaseai atu o tino, e faka‵sao i Amaketo a tino, me ka ‵sao atu “se vaitino tokouke” o tavini a te Atua.​—Fakaasiga 7:​9, 14; Salamo 37:34.

 Kae i tafa o te fakasino atu ki te lalolagi, a te pati “lalolagi” e fakasino sāle atu i te Tusi Tapu i nisi taimi ki tino amio ma‵sei kolā e ‵teke ki te Atua. (1 Ioane 2:​15-​17) Tenā loa te mea e fakauiga ki ei, me ka fakaoko mai i a Amaketo a “te gataga o te lalolagi.”​—Mataio 24:3, Tusi Tapu, Tuvalu.

 Ka tupu māfea a Amaketo? I te taimi ne fakamatala mai ne ia me i te “fakalavelave lasi” ka fakaoti i te taua i a Amaketo, ne fai mai a Iesu: “E seai se tino e iloa ne ia te aso mo te itula tenā, ke oko eiloa ki agelu o te lagi io me ko te Tama, e se iloa katoa ne latou, kae na ko te Tamana fua e iloa ne ia.” (Mataio 24:21, 36) E tiga eiloa te feitu tenā, e fakaasi mai i te Tusi Tapu me ka fai te taua i a Amaketo i te taimi o te fakatasi mai sē matea o Iesu, telā ne kamata i te 1914.​—Mataio 24:37-​39.