E ‵kilo atu a tino e tokouke ki te koluse e pelā me se fakailoga lauiloa o te Lotu Kelisiano. E tiga eiloa a Molimau a Ieova ne Kelisiano, e se fakaaoga ne matou a te koluse i omotou tapuakiga. Kaia?

 E tasi te pogai, me e fakaasi mai i te Tusi Tapu i a Iesu e seki mate i luga i se koluse, kae i luga i se lakau ‵tonu. E se gata i ei, e fakatonu malosi mai te Tusi Tapu ki Kelisiano, ke “‵tele kea‵tea mai te ifo ki tupua,” telā e fakauiga i ei me e se ‵tau o fakaaoga a te koluse i tapuakiga.​—1 Kolinito 10:14; 1 Ioane 5:​21.

 Se mea tāua me ne fai mai a Iesu: “Ona ko te mea tenei ka iloa ei ne tino katoa i a koutou ko oku soko, māfai e fakatau a‵lofa koutou.” (Ioane 13:34, 35) Tela la, ne fakaasi mai ne Iesu i konei me ko te alofa sē fakapito​—e se ko te koluse io me ko so se isi fakatusa—ka fakamailoga ki ei ana soko ‵tonu.