E MA‵NAKO MALOSI A TINO KI TE ALOFA. E seai eiloa se fesokotakiga fakatauavaga, fakataugasoa io me i loto i te kāiga e mafai o iku manuia e aunoa mo te alofa. Se mea telā ke mafaufau ki ei, me i te alofa e tāua ‵ki ki te ola ‵lei i te feitu faka-te-mafaufau mo te ‵tou fia‵fia. Kae se a la te mea e fakauiga ki ei a te “alofa”?

A te alofa tenei e se ko te alofa fakafāmau, telā se vaega e tāua foki. Kae ko te alofa tenei ko te ‵toe uiga sili telā e fai ei ne ia te tino ke gasuesue o fakaasi atu a te uiga atafai mō te ‵lei o nisi tino, mai te fakamuamua atu o nisi tino i lō latou eiloa. Ko te alofa eiloa telā e takitakigina ne se fakatakitakiga fakavae mai te Atua kae e aofia foki loa i ei a lagonaga atafai masani.

E fai mai se fakamatalaga gali e uiga ki te alofa, penei: “A te alofa e kufaki kae atafai. A te alofa e se loto masei. E se tavae ne ia a ia eiloa, e se ‵fonu i te fakamatamata, e se fakamaualuga, e se salasala ki mea mō tena ‵lei eiloa, e se kaitaua vave. E se ita fakamoemoe. E se fiafia ki te amioga ma‵sei, kae e fiafia eiloa ki te munatonu. E onosai i mea katoa, . . . e fakamoemoe ki mea katoa, e kufaki i mea katoa. A te alofa e se mafai o gata.”—1 Kolinito 13:4-8.

A te alofa tenei “e se mafai o gata” telā ka tumau faeloa ki te se-gata-mai. Kae e mautinoa eiloa me ka gasolo aka eiloa o malosi i te gasologa o taimi. Kae ona la e kufaki, atafai, kae loto fakamagalo, tenā eiloa “te fusi ‵lei katoatoa telā e fai ei ke ‵kau fakatasi a tino.” (Kolose 3:14) Tela la, a fesokotakiga ‵pili kolā e fakavae ki te alofa tenei e maua loa i ei te tokagamalie mo te fiafia, faitalia a vāivāiga o tino taki tokotasi. E pelā me se fakaakoakoga, ke mafau‵fau ki te fesokotakiga fakatauavaga.

Ne akoako mai eiloa ne Iesu Keliso a fakatakitakiga fakavae tāua ki se olaga fakatauavaga. E pelā mo ana pati ne fai mai, penei: “‘Ka tiaki ei ne te tagata tena tamana mo tena mātua kae ka ‵piki ‵mau a ia ki tena avaga, kae ka fai lāua mo fai se foitino e tasi’ . . . Tela la, a lāua kolā ko oti ne fakatasi ne te Atua e se mafai eiloa o ‵tala ne se tino.” (Mataio 19:5, 6) E maua i konei a fakatakitakiga fakavae tāua e lua.

“KA FAI LĀUA MO FAI SE FOITINO E TASI.” E fai eiloa te olaga fakatauavaga mo fai se koga telā e maua ei se fesokotakiga ‵pili ‵ki, kae ko te alofa e mafai eiloa o puipui ne ia mai te uiga sē fakamaoni—telā a te tagata io me ko te fafine e fai mo “foitino e tasi” mo se tino fakaa‵tea aka i lō tena avaga tonu. (1 Kolinito 6:16; Epelu 13:4) A te sē fakamaoni e ofa loa i ei te olaga fakatauavaga mo te loto talitonu. Kafai e aofia loa i ei a tamaliki, ka lasi atu te fakamaseiga o te mea tenā ki lagonaga o latou, ka seai se lagonaga me alofagina latou, seai se tokagamalie, io me ita fakamoemoe.

“LĀUA KOLĀ KO OTI NE FAKATASI NE TE ATUA E SE MAFAI EILOA O ‵TALA NE SE TINO.” A te avaga foki se fesokotakiga ‵malu. A tauavaga kolā e āva ki te fakatokaga tenei e taumafai eiloa ke fakamalosi aka olotou fesokotakiga fakatauavaga. E se fulitua atu latou māfai ko ‵sae aka a fakalavelave faiga‵ta. E malosi eiloa te lotou a‵lofa kae tumau faeloa. A te alofa tenei e “kufaki i mea katoa,” e gasuesue eiloa o faka‵lei aka a fakalavelave faiga‵ta e fe‵paki mo latou ke fakatumau ei se fesokotakiga ‵lei fakatauavaga mo te filemu.

Kafai e maua eiloa ne mātua a te alofa sē fakapito, ka maua eiloa ne so se tamaliki i loto i te kāiga a mea aoga i se auala lasi. Ne fai mai eiloa te tamafine ko Jessica, penei: “A toku tamana mo toku mātua ko lāua loa ko āva kae alofa te suā tino ki te suā tino. Kafai e lavea ne au toku mātua e āva ki toku tamana, maise eiloa māfai e fakafesagai mo matou tama‵liki, e fai loa i ei ke manako au ke ‵pau mo ia.”

A te alofa ko te ‵toe uiga sili o te Atua. Se fakamaoniga tonu mai loto i te Tusi Tapu, telā e fai mai penei: “Me i te Atua ko te alofa eiloa a ia.” (1 Ioane 4:8) Kae se mea fakafiafia me i a Ieova e taku foki pelā me ko “te Atua fiafia.” (1 Timoteo 1:11) Ka fia‵fia foki loa tatou māfai e fakaakoako ki uiga ‵gali o te ‵tou Mafuaga—maise eiloa tena alofa. I te Efeso 5:1, 2, e fai mai eiloa penei: “Tela la, ke fakaakoako koutou ki te otou Atua, e pelā me ne tama‵liki fagasele, kae ke tumau i te sa‵sale i te alofa.”