Kae i te taimi foki tenā, ko oti ne iloa aka ne nisi tino me i tama‵liki kolā e fakamāumāu a taimi e uke i te neti, e masani o . . .

• fakavale‵vale malosi ki olotou tivaisi.

• fai atu ne latou a pati fia ‵mafi i te neti.

• faigofie ke onoono ki ata ma‵sei faitalia me e ma‵nako io me se ma‵nako ki ei.

FAKAVALE‵VALE KI EI

A nisi polokalame i te neti—e pelā mo tafaoga—ne fakatoka ke fakavale‵vale a tino ki ei. “A polokalame i ‵tou telefoni ne fakatoka ko te mea ke ‵saga eiloa tatou ki ‵tou telefoni,” ko pati i te tusi Reclaiming Conversation. Ko te uke o taimi e onoono tatou ki faka‵pulaga a tino faipisinisi i ‵tou telefoni, ko te uke foki olotou tupe e maua.

MAFAUFAU IFO: E mata, ko tō fakavale‵vale au tama‵liki ki olotou tivaisi? E mafai pefea o fesoasoani koe ki a latou ke fakaaoga faka‵lei olotou taimi?—EFESO 5:15, 16.

PATI FIA ‵MAFI I TE NETI

E lavea atu te sē āva o nisi tino i luga i te neti kae fai ne latou a pati sē ‵tau kae ‵mafa i lō te amanaia ki lagonaga o nisi tino—ko vaegā uiga kolā e iku atu ki te fia ‵mafi.

E fakaaoga ‵se ne nisi tino a te neti ona ko te manako malosi ke lauiloa latou. Io me kafai ko iloa ne se tino i a ia e seki ‵kami—kāti ki se pā‵tī—e mafai o fai ei ke logo‵mae a ia kae mafaufau me ko ma‵sei a nisi tino ki a ia.

MAFAUFAU IFO: E mata, e fakaasi atu ne au tama‵liki a uiga ‵lei i luga i te neti? (Efeso 4:31) E pefea olotou lagonaga māfai ko iloa ne latou me e seki ‵kami latou ki se faigāmea?

ATA MA‵SEI

Ko faigofie ke maua kae onoono atu ki ata ma‵sei i te neti. E tiga eiloa e mafai ne mātua o faulu a polokalame kolā e taofi aka a ata sē ‵lei, koi mafai eiloa ne tama‵liki onoono ki ei.

A te lafo atu mo te tausiga o ata ma‵sei i tau telefoni, e mafai o iku atu ki te solitulafono. E ‵tusa mo nisi tulafono a nisi fenua, e fakatapu a tama‵liki kolā e lafo atu io me tausi a ata ma‵sei kae e mafai o fakasala ‵mafa latou.

MAFAUFAU IFO: E fesoasoani atu pefea koe ki au tama‵liki ke ‵teke atu ki te tofotofoga ke onoono io me lafo atu a ata ma‵sei i te neti?—EFESO 5:3, 4.

AKOAKO AU TAMA‵LIKI

E tiga eiloa e faigofie ki tama‵liki ke fakaaoga a poto ‵fou, koi ‵tau eiloa o onoono faka‵lei ki a latou. E fai mai te tusi ko te Indistractable me i te tuku atu o se tivaisi ki au tama‵liki kae e se iloa ne latou o fakaaoga mo te fakaeteete e ‵pau eiloa tena fakamataku mo “te talia ne koe a ia ke eva ki te tai kae se iloa ne ia o ‵kau.”

Onoono ki manatu e manako koe o fakaaoga io me tusi ki lalo ou manatu totino.

• Sau‵tala mo taku tama ki amioga mo uiga ‵lei e ‵tau o fakaasi i te neti

• Fesoasoani ki taku tama ke iloa ne ia a mea e ‵tau o fai māfai ko se aofia a ia i se faigāmea

• Ke ‵teke malosi atu ki polokalame sē ‵lei

• Ke iloilo faeloa te telefoni a taku tama

• Fakatoka se taimi e ‵tau ei o fakaaoga tena tivaisi

• Fakatapu taku tama mai te fakaaogaga o te tivaisi i loto i tena potu, kae maise i te taimi ko ‵tau a ia o moe

• Fakatapu te fakaaogaga o tivaisi i taimi ‵kai