A tino e masani o fakailoga tino ki a latou kolā e ‵kese olotou fenua, itukāiga, matakāiga io me ko ‵gana kae penā foki ki tino kolā e ‵kese olotou talitonuga, tāgata io me ko fāfine, io me ko tulaga o te olaga. A nisi tino e maua ne latou te kilokiloga sē ‵lei ki nisi tino ona ko olotou tausaga, tulaga o akoakoga, te sē katoatoa io me ko olotou foliga. Kae mafau‵fau latou, me i a latou e se fakailoga tino.

E mata, e pokotia koe i te fakailoga tino? A te tokoukega o tatou e faigofie ke lavea ne tatou a te fakailoga tino o nisi tino. Kae faigata ke lavea ne tatou te fakailoga tino i a tatou. A ko te tonuga a tatou katoa e mafai o fakailoga tino. Kafai e maua ne tino se kilokiloga sē ‵lei e uiga ki se potukau kae fakamuli ko fetaui mo se tino i te potukau tenā, e fai mai te polofesa ko David Williams, “e mafai o fakaasi atu ne latou te fakailoga tino ki te tino tenā e aunoa mo te iloa ne latou.”

E pelā me se fakaakoakoga, i fenua o te Balkan telā e nofo i ei a Jovica, e isi se potukau foliki telā e se fia‵fia ki ei a tino. “Au ne mafaufau me seai loa se tino i te potukau tenā se tino ‵lei,” ko ana pati. “Kae ne seki mafaufau au i a au ko fakailoga tino. ‘Kae e se gata i ei,’ ne fai ifo au ki a au, ‘a te mea tenei se mea tonu loa.’”

E uke a malo ne fai ne latou a tulafono ke fakagata te faka‵kese tino mo nisi vaega o te fakailoga tino. Kae ui ei, ne tumau eiloa a tino i te fakailoga tino. Kaia? Me i tulafono konā ne fakasino fua ki faifaiga a tino. E se mafai ne latou o pule atu ki mafaufauga mo lagonaga o tino. Kae ko te fakailoga tino e kamata i te mafaufau mo te loto o te tino. E mata, ko seai loa se fakamoemoega ke fakagata te fakailoga tino? E mata, e isi se faka‵leiga ki te fakailoga tino?