A te fia takutakua e mafai o iku atu ki te fakailoga tino. A te tino fia takutakua e fakamatamata i ana mea e fai. E kilo atu ki a ia e pelā me se tino maluga, kae kilo atu ki tino kolā e ‵kese mai i a ia e pelā me ma‵lalo. E mafai so se tino o tō atu ki te malei tenei. E fai mai te Encyclopædia Britannica:  “A te ukega o tino e mafau‵fau me i mea e fai ne latou i olotou olaga, olotou meakai, gatu, amioga, talitonuga, mea e fakatāua ne latou mo nisi mea aka foki, e ‵lei fakafia atu i nisi tino.” E mafai pefea o ‵kalo kea‵tea tatou mai mafaufauga sē ‵lei penei?

“I te loto maulalo mo te manatu me e tāua atu a nisi tino i a koutou.”—FILIPI 2:3.

Se a tena uiga? Ke mo a ma tō fakamatamata, e ‵tau o ati aka ne tatou a te loto maulalo. A te loto maulalo e fai ei ke iloa ne tatou me e ‵lei atu a nisi tino i lō tatou i nisi vaega o te olaga. E seai loa se potukau e fai mai me ko latou fua e ‵lei i mea katoa e fai ne latou penā foki mo olotou uiga.

Mafaufau ki te fakaakoakoga o Stefan. Ne tupu aka a ia i se fenua Kominisi kae ne manumalo a ia i te fakailoga tino ki nisi tino  kolā ne ‵mai i fenua sē Kominisi. Ne fai mai a ia: “Au e talitonu me i te mafaufau me tāua atu a tino ki a koe e tāua ‵ki ke fakafesagai atu koe ki te fakailoga tino. E se ko mea katoa e iloa ne au. E mafai eiloa o tauloto ne au ne mea mai i nisi tino.”

Fai ke maua ne koe se kilokiloga tonu e uiga ki a koe kae ke iloa ne koe ou vāivāiga. Fakaasi ‵tonu me i feitu kolā e vāivāi ei koe e ‵lei atu a nisi tino i ei. Sa mafaufau me i tino katoa mai i se potukau ne tino ma‵sei.

I lō te faite ne koe ne mafaufauga sē ‵lei e uiga ki se tino mai se potukau, fesili ifo ki a koe eiloa:

• ‘E mata, a uiga kolā e se fiafia ei au ki te tino tenā e ma‵sei io me ko te mea fua e ‵kese?’

• ‘E mata, e isi ne mea sē ‵lei e lavea ne te tino tenā i a au?’

• ‘Ne a feitu e ‵lei atu i ei te tino tenei i a au?’

Kafai e tali ne koe a fesili konei mo te fakamaoni, ka se manumalo fua koe i te fakailoga tino, kae ka mafai foki o lavea ne koe a mea ‵gali i te tino tenā.