E mata, e lotomalie koe ki te fakamatalaga tenā? E pelā mo Samantha, e fakafesagai atu tatou katoa mo tulaga faiga‵ta penā i nisi taimi. A te auala e ‵saga atu ei tatou ki vaegā tulaga kolā e fakaosooso ei tatou ke sē fakamaoni, ka fakaasi atu ei a te mea e fakatāua ne tatou. E pelā mo te fakatāua ne tatou a te manakoga ke se masiasi tatou, e mafai o ‵kilo atu tatou ki te sē fakamaoni e pelā me se mea faigaluega tāua. Kae i te taimi ko iloa ei te mea tonu, e masani o ma‵sei a ikuga e iku mai i ei. Ke mafaufau ki mea konei.

E ati aka ne te loto talitonu a fesokotakiga. Kafai e maua a te loto talitonu i te va o se tokolua, ka maua ne lāua a te lagonaga saogalemu kae tokagamalie. Kae e se vave a te atiakaga o te loto talitonu. E ati aka ne tino a te loto talitonu māfai ko fakamāumāu ne latou a taimi o kau fakatasi, te aofia i fesokotakiga amiotonu kae kaimalie. E mafai foki o fakamasei a te loto talitonu i se faifaiga fua e tasi o te sē fakamaoni. Kae kafai ko oti ne fakamasei a te loto talitonu tenā, e mafai o faigata ‵ki ke toe ati aka.

E mata, kai fakaloiloigina aka eiloa koe ne se tino telā ne kilo koe ki ei e pelā me se taugasoa ‵lei? Kafai e penā eiloa, ne pefea ou lagonaga? E mautinoa eiloa me ne logo‵mae koe, io me ko oti ne fakatogafitigina koe. E malamalama ‵lei eiloa i te mea tenā. E seai eiloa se fakalotolotolua me i te sē fakamaoni e mafai o fakamasei ne ia se fesokotakiga tāua.

E isi se sukesukega a Robert Innes, se polofesa o mea tau pisinisi i te University of California, kae ne maua ne ia me i te “sē fakamaoni se mea fakamataku ‵ki.” Tela la, e mafai o fakatusa a te sē fakamaoni ki se masaki ‵pisi—ko te lasi o tou fesokotaki mo te tino sē fakamaoni, ko te lasi foki o te avanoaga e maua ke “‵pisi” koe ne te sē fakamaoni.

E mafai pefea o ‵kalo keatea koe mai te malei o te sē fakamaoni? E mafai o fesoasoani atu a te Tusi Tapu. Fakamolemole ke mafaufau ki nai akoakoga fakavae mai te Tusi Tapu.