Te Mea Tonu mo te Mea ‵Se: Se Filifiliga e ‵Tau o Fai ne Koe
A tulaga e uiga ki te mea tonu mo te mea ‵se kolā e filifili ne tatou, ka pokotia malosi i ei a ‵tou olaga. E iloa ‵lei ne Ieova te Atua a te mea tenā. Tenei te pogai e manako a ia ke ola tatou e ‵tusa mo ana tulaga.
E manako a Ieova ke maua ne tatou se olaga filemu kae fiafia.
“Au, Ieova, ko tou Atua, ko te Atua telā e akoako ne ia koe ke ‵lei koe, ko te Atua telā e takitaki ne ia koe ki te auala e ‵tau o sasale ei koe. Moi ne fakalogo mai eiloa koe ki aku fakatonuga! A tou filemu ka fai eiloa e pelā me se vaitafe kae ko tou amiotonu e pelā mo galu o te tai.”—Isaia 48:17, 18.
E pelā me ko te ‵tou Mafuaga, e iloa ne te Atua te ‵toe auala ‵lei e ‵tau o ola i ei tatou. E ‵kami ne ia tatou ke faka‵logo ki tena takitakiga mō te ‵lei o tatou. Kafai e tau‵tali tatou i fakatonuga a te Atua, ka se mafai o fakalotolotolua tatou me ka iku atu ‵tou filifiliga ki te ‵lei io me ikai. Ka fai faeloa ne tatou a filifiliga ‵tonu, kolā e iku atu ki te filemu mo te fiafia.
E se fakamolemole mai a Ieova ke fai ne tatou a mea kolā e se mafai ne tatou o fai.
“A te fakatonuga tenei e fakatonu atu ne au ki a koe i te aso nei e se fai pelā me ko tō ‵mafa mō koe, io me e se mafai o oko atu koe ki ei.”—Teutelonome 30:11.
A te ola e ‵tusa mo tulaga o te Atua e uiga ki te mea tonu mo te mea ‵se e mafai o ‵fuli i ei te auala e mafau‵fau ei tatou penā foki mo ‵tou faifaiga. Kae e se manako a Ieova ke fai ne tatou a mea kolā e se mafai ne tatou o fai. E pelā me ko te ‵tou Mafuaga, e iloa ne ia a mea kolā e mafai ne tatou o fai. Kafai ko iloa ‵lei ne tatou a Ieova, ka lavea i ei ne tatou i “ana fakatonuga e se ‵mafa.”—1 Ioane 5:3.
E tauto mai a Ieova me ka fesoasoani a ia ki a latou kolā e filifili ke ola e ‵tusa mo ana tulaga.
“Au, Ieova tou Atua, e puke ki tou lima fakaatamai, ko te Atua telā e fai atu ki a koe, ‘Sa mataku. Au ka fesoasoani atu ki a koe.’”—Isaia 41:13.
E mafai o ola tatou e ‵tusa mo tulaga o te Atua e uiga ki te mea tonu mo te mea ‵se, me ka fesoasoani mai a ia ki a tatou. E mafai o fesoasoani mai a ia e auala i tena Muna, te Tusi Tapu, telā e maua i ei ne tatou a fakamalosiga mo te fakamoemoega.
Ko oti ne iloa aka ne te fia miliona o tino i te lalolagi kātoa me i te ola e ‵tusa mo tulaga o te Tusi Tapu ne fai ei ke ‵lei olotou olaga. Kaia e se tauloto ei koe ki mea e uke atu e uiga ki manatu fesoasoani ‵lei kolā e maua i te Tusi Tapu? E mafai o kamata koe mai te sukesuke ki te polosiua telā e fakavae ki te Tusi Tapu ko te Ola ki te Se-Gata-Mai! telā e maua i te jw.org. E aofia i ei a mataupu konei:
-
E Fesoasoani Atu Pefea te Tusi Tapu?
-
E Tuku Mai i te Tusi Tapu se Fakamoemoega
-
E Talitonu Koe ki te Tusi Tapu?
I te taimi e sukesuke koe ki te Muna a te Atua, ko te Tusi Tapu, ka lavea ne koe me koi aoga eiloa; e “fakatalitonugina faeloa a mea konā, i te taimi nei ke oko eiloa ki te se-gata-mai.” (Salamo 111:8) A te tau‵tali ki fakatonuga i te Tusi Tapu e uiga ki te mea tonu mo te mea ‵se ko te ‵toe auala ‵lei eiloa ke ola i ei tatou. Kae e se faimālō tatou ne te Atua. (Teutelonome 30:19, 20; Iosua 24:15) A te mea tenā se filifiliga telā e ‵tau o fai ne tatou taki tokotasi.
