KAFAI ne galo atu sou tino pele i te mate, ka pokotia eiloa koe i lagonaga kese‵kese, mai te fanoanoa ki te sē sologa mo te seai o se malosi ke fai se mea. Kāti ka kaitaua koe, ma‵sei ou lagonaga, io me mataku. Kāti ka mafaufau ifo koe me seai se aoga o te olaga.

Ke fakamalosi koe me i te mafatia e sē se vāivāiga. Se fakaasiga fua o te lasi o te alofa o koe ki tou tino pele tenā. Kae e ui i ei, e mata, e mafai eiloa o fakafeoloolo aka a ou lagonaga logo‵mae kae fakafanoanoa konā?

Faitalia e foliga mai me e se mafai o gata atu tou logo‵mae, ka mafai eiloa o fesoasoani atu a auala konei ke fakamafanafana atu ki a koe:

SE MEA GALI KE FAKAASI ATU KI TUA OU LAGONAGA FANOANOA

E kese‵kese a tino mo taimi e fanoa‵noa i ei latou. A te ‵tagi e isi eiloa se fesoasoani ke tai fakafeoloolo aka ei ou lagonaga konā. A Vanessa, telā ne taku mai muamua, ne fai mai, penei: “Nisi taimi e tagi fua au ke faka‵noga aka i ei a toku logo‵mae.” A Sofía, telā ne mate fakapoi foki tena taina, ne fai mai penei: “A te fakafesagai atu ki oku mafaufauga mo lagonaga fanoa‵noa e fakalogo‵mae ‵ki mai ki a au, e pelā eiloa mo te ‵fuluga ke ‵ma o se pakiaga lasi. Ko se mafai o fa‵ki te logo‵mae, kae ko te fai penā ne fai loa i ei ke feoloolo.”

 KE FAKAASI ATU OU MAFAUFAUGA MO LAGONAGA

E sē se mea fou māfai e manako koe o nofo i a koe eiloa tokotasi i ne taimi. Kae ko te loto mafatia se amoga ‵mafa ke amo ne koe tokotasi. A Jared ko sefulu fitu ana tausaga, kae ne mate i ei tena tamana, ne fai mai, penei: “Ne fakaasi atu ne au oku lagonaga ki nisi tino. Kāti ne seki ‵tau o fakaasi atu ne au oku lagonaga ki tino, kae se mea ‵lei me ne fakaasi atu eiloa ne au ki tua i nisi tino.” A Janice, telā ne taku mai i te mataupu i te kamataga, ne fai mai ne ia se suā mea aoga: “A te sau‵tala mo nisi tino ne lasi ‵ki te fakamafanafana mai. Ne iloa ne au me e malamalama a nisi tino i oku lagonaga, kae ne seki mafai fua o kufaki ne au tokotasi.”

TALIA A FESOASOANI

E fai mai se tokita: “A te tino loto mafatia telā e talia ne ia a fesoasoani mai ana taugasoa mo kāiga i te taimi eiloa ne mate ei tena tino pele, ka mafai eiloa o fesoasoani atu ki a ia ke kufaki i tulaga kese‵kese e fepaki ei a ia mo lagonaga logo‵mae konā.” Ke fakaasi ki ou taugasoa a mea kolā e mafai o fai ne latou ke fesoasoani atu ki a koe; me e ma‵nako latou o fesoasoani kae ko te mea fua e se iloa ne latou me ne a olotou mea ka fai.—Faataoto 17:17.

KE FAKAPILIPILI MALOSI ATU KI TE ATUA

E fai mai a Tina: “I te taimi ne mate ei taku avaga ona ko te kenisa, ne seki toe mafai o fakaasi atu ne au oku lagonaga ki a ia, tenā ne fakaasi atu ne au a mea katoa ki te Atua! Ne kamata o fakamolemole atu ki ei i aso katoa ke fesoasoani mai ki a au ke tuku mai te malosi ke fai ne au a mea tāua e manakogina o fai. Kae ne lasi ‵ki tena fesoasoani mai.” A Tarsha, ko 22 ana tausaga kae ne mate i ei tena mātua, ne fai mai, penei: “A te faitau faeloa ki te Tusi Tapu i aso katoa ne fakamafanafana mai eiloa ki a au. Ne tuku mai i ei a fakamalosiga ke mafaufau au ki ei.”

KE MAFAUFAU KI TE FAKAMOEMOEGA KO TE TOETUGA

Ne toe fai mai a Tina: “Muamua loa, ne seki fakamafanafana mai ki a au a te fakamoemoega ki te toe‵tuga o tino mate ona me ne manakogina ne au taku avaga—aku tama tagata e manakogina foki ne latou te olotou tamana—telā ko galo atu. Kae e ui i ei ko tusa nei mo te fa tausaga, ne ‵piki mau eiloa au ki te fakamoemoega tenā. Ko toku ola eiloa tenā. E fakaataata ne au te taimi ka toe fetaui i ei mo ia, kae maua eiloa ne au te fiafia mo te filemu mai i ei!”

Ka se mafai o ‵lei fakavave ou lagonaga fakafanoanoa i te taimi eiloa tenā. E ui i ei, e fakamalosi loto eiloa a te tala o Vanessa. Ne fai mai tou fafine penei, “Ka mafaufau koe me ko sē mafai eiloa o ‵lei ou lagonaga, kae i te gasologa o taimi, ka gasolo eiloa o feoloolo.”

Ke masaua, e tiga e se mafai o fakapuli i a koe tou tino pele, kae koi aoga eiloa tou olaga. Fakatasi mo te fesoasoani atafai mai te Atua, ka mafai eiloa o fia‵fia koe fakatasi mo ou taugasoa kae maua se fakamoemoega i te olaga. E se leva nei ka toe faka‵tu eiloa ne te Atua a tino mai te mate. E manako a ia ke toe fetaui koe mo tou tino pele. Kae ko te logo‵mae i tou loto ka fakaseai atu ki te se-gata-mai!