A te manai ko te mea‵kai eiloa ne masani o ‵kai ki ei te kau Isalaelu i te 40 tausaga ne ‵nofo ei latou i te koga lavaki. (Eso. 16:35) Ne tuku atu foki ne Ieova a manu eva ko salu mō fai olotou mea‵kai i taimi e lua. (Eso. 16:​12, 13; Nume. 11:31) Kae ne maua foki ne tino Isalaelu a nisi mea‵kai mo olotou ‵kai.

Pelā me se fakaakoakoga, ne ‵taki ne Ieova ana tino i nisi taimi ki “se koga mo olotou malo‵lo” telā ne maua i ei a vai mo mea‵kai ke fakama‵lie aka ei olotou manakoga. (Nume. 10:33) Tasi mai i ei ko te tamā koga lavaki i Elima, “telā e ‵tu i ei a vaipuna e 12 mo lakau ko pama e 70”—kāti se vaegā pama. (Eso. 15:27) E fakamatala mai i te tusi ko te Plants of the Bible me i te vaegā pama tenei, “telā e ola i koga e uke, . . . ko te ‵toe lakau eiloa i te koga lavaki e lasi te fakaaoga mo ‵kai, fai ki ei a sinu, kae faite ki ei a fale o te fia miliona o tino.”

Kāti ne mā‵nava foki a te kau Isalaelu i te ‵toe koga lavaki lasi telā e lauiloa i aso nei me ko te Feiran, se vaega o te vanu ko Feiran. a A te vanu tenei, “e nofo ki se 81 maila [130 km] te loa, se tasi o toe vanu loa, gali ‵ki, kae lauiloa i Sinai,” ko fakamatalaga i te tusi ko te Discovering the World of the Bible. Ne toe fai mai te fakamatalaga: “Mai te kaugutu o te vanu tenā, e nofo ki se 28 maila [45 km] te ‵mao ke oko atu ki te Feiran Oasis, telā se 3-maila- [4.8 km] te loa kae nofo ki se 2,000 futu [610 m] te maluga mai luga o te tai, telā e ola i ei a lakau ko pama. Tenei ko te Fatoaga o Sinai. E tokouke a tino i aso mua ne olo atu faeloa ki konā ona ko te uke o lakau ko pama e ola i ei.”

I te tiakinaga ne tino Isalaelu a Aikupito, ne ave ne latou a palugā falaoa, mea palu falaoa, penā foki a saito mo sinu. E tonu, ka ma‵sei vave a mea konei. Ne ave foki ne tino a “lafu mamoe mo lafu pulumakau, se lafu manu lasi ‵ki eiloa.” (Eso. 12:​34-39) Ona ko te tulaga faigata i te koga lavaki, a te ukega o manu kāti ne ‵mate. Nisi kāti ne fakaaoga mo fai a mea‵kai a te kau Isalaelu. Nisi manu kāti ne ofo atu foki pelā me ne taulaga ki atua ‵se. b (Galu. 7:​39-43) E lavea ne tatou me koi isi loa ne manu a te kau Isalaelu, mai i pati a Ieova ki tino kolā ne fakaasi atu te sē lava o te lotou fakatuanaki: “A otou tama tāgata ka fai pelā me ne tausi mamoe i te  koga lavaki i tausaga e 40.” (Nume. 14:33) Tela la, e mautinoa eiloa me ne maua mai i olotou lafu manu a susu mo meafasi i nisi taimi, kae e se lava ke fagai ki ei se tolu miliona tino i tausaga e 40. c

Tefea te koga ne maua i ei ne manu konā a vai mo mea‵kai? d I te taimi tenā, ne tai uke loa a vaiua mo lakau i te koga lavaki. E fai mai te Insight on the Scriptures, Tusi 1, me i te 3,500 tausaga ko ‵teka, “e uke atu a vai ne maua i kogā koga konei o Arabia ma faka‵pau ki aso nei. A te uke o vanu ‵poko kolā ne fai muamua pelā me ne vaitafe i konā, se fakamaoniga me ne isi eiloa ne vaiua ne ‵to i aso mua kae maua mai i ei a vaitafe konā.” E se gata i ei, a te koga lavaki e se gali kae fakamataku. (Teu. 8:​14-16) E aunoa mo te vai telā ne tuku fakavavega atu ne Ieova, penei ko oti ne ‵mate atu a te kau Isalaelu fakatasi mo olotou manu.—Eso. 15:​22-25; 17:​1-6; Nume. 20:​2, 11.

Ne fai atu a Mose ki te kau Isalaelu me ne fagai ne Ieova latou ki te manai “ko te mea ke iloa ne [latou] me e se ko meakai fua e ola ei te tagata kae ko muna katoa kolā e ‵to mai i te gutu o Ieova e ola ei te tagata.”—Teu. 8:3.