Kafai e fia iloa ‵lei ne koe se tino, se mea ‵lei ke tauloto koe ki mea kolā ne fai ne ia mo mea faiga‵ta kolā ne manumalo i ei. I se auala tai ‵pau, kafai e fia iloa ‵lei ne koe te Atua, e ‵tau o tauloto koe ki mea ne fai ne ia. Kafai e fai koe penā, ka mafai eiloa o ofo koe ke iloa atu me i te ukega o mea kolā ne fai ne ia i aso ko ‵teka e aoga ki a tatou i te taimi nei kae e penā foki i aso mai mua.

A Ieova te Atua ko te Mafuaga Sili, kae e “lavea faka‵lei atu ana uiga sē lavea talu mai te faitega o te lalolagi, me e mafai o lavea atu i ana mea ne faite.” (Loma 1:20) “Ko ia te Atua telā ne faite ne ia te lalolagi i tena ‵mana, ko te Atua telā ne faka‵mautakitaki ne ia te laukele ola ‵lei e auala i tena poto kae ne ‵fola ne ia te lagi e auala i tena malamalama.” (Ielemia 10:12) E fakaasi mai foki i mea fakaofoofogia ne faite a te saga tonu mai o te Atua ki a tatou.

Mafaufau la ki te auala ne faka‵lei aka ne Ieova a ‵tou olaga mai te faitega ne ia o tino “ki tena fakatusa.” (Kenese 1:27) Ko tena uiga, ne fai ne ia ke mafai o fakaasi atu ne tatou i se auala foliki a ana uiga sē fakanafagina. Ne faite ne ia tatou kae tuku mai ne ia te atamai i te feitu faka-te-agaga, io me fai ne ia ke malamalama tatou i ana kilokiloga mo mea kolā e fakatāua ne ia. Kafai e taumafai tatou ke ola e ‵tusa mo mea konei, ka maua eiloa ne tatou te fiafia sili i te olaga. E se gata i ei, ne tuku mai ne ia te atamai ke mafai o ati aka ne tatou se fesokotakiga mo ia.

E fakamaoni mai i mea a te Atua ne faite i te lalolagi a ana lagonaga e uiga ki a tatou. I pati a te apositolo ko Paulo, “ne tuku mai ne [te Atua] se molimau e auala i mea ‵lei ne fai ne ia, mai te tuku [mai ki a tatou] a vaiua mai te lagi mo tau o aso aoga, e fakamalie ne ia [tatou] ki mea‵kai kae faka‵fonu [‵tou] loto ki te fiafia.” (Galuega 14:17) Ne tuku mai ne te Atua a mea e uke atu i lō a mea kolā e manakogina ke ola i ei tatou. Ne tuku mai ne ia a mea kese‵kese e uke ko te mea ke mafai o fia‵fia tatou i te olaga. A te mea tenei se ata foliki fua o mea kolā e manako a ia ke maua ne tatou.

Ne faite ne Ieova a te lalolagi ko te mea ke mafai o ola  i ei a tino ki te se-gata-mai. E fai mai te Tusi Tapu: “Ko oti ne tuku ne ia te lalolagi ki tama a tāgata,” kae “ne seki faite fua ne ia ke se aoga, kae ne faite ke ‵nofo i ei a tino.” (Salamo 115:16; Isaia 45:18) Ko oi ka ‵nofo i ei kae ka pefea te leva? “A tino amio‵tonu ka fai mō latou te lalolagi, kae ka ‵nofo latou i ei ki te se-gata-mai.”—Salamo 37:29.

Tela la, ne faite ne Ieova a te tagata mo te fafine muamua, ko Atamu mo Eva, kae ne tuku atu ne ia lāua ki te lalolagi palataiso “ke galue kae tausi atu ki ei.” (Kenese 2:8, 15) Ne tuku atu ne te Atua ki a lāua a galuega e lua: “Ke fanafanau kae ke fakatokouke, faka‵fonu te lalolagi kae pule atu ki ei.” (Kenese 1:28) Tela la, ne maua ne Atamu mo Eva a te fakamoemoega ke ola i te lalolagi ki te se-gata-mai. Se mea fakafanoanoa, me ne filifili lāua ke sē faka‵logo ki te Atua kae ona ko te pogai tenā, ne ‵galo atu ei i a lāua a te fakamoemoega ke aofia i “tino amio‵tonu” kolā “ka fai mō latou te lalolagi.” Kae e pelā mo te mea ka lavea ne tatou, ne seki ‵fuli eiloa te fuafuaga a Ieova mō tatou io me ko te lalolagi ona fua ko lā faifaiga. Kae ke onoono muamua aka tatou ki se mea telā ne fai ne te Atua.

Ne lauiloa te Tusi Tapu e pelā me ko te Muna a te Atua. Kaia ne tuku mai ei ne Ieova a te Tusi Tapu ki a tatou? Muamua la, ko te mea ke mafai ne tatou o tauloto e uiga ki a ia. (Faataoto 2:1-5) E tonu, e se tali mai i te Tusi Tapu a fesili katoa kolā e ma‵nako tatou ki ei e uiga ki te Atua—e seai foki se tusi e mafai ne ia o tali aka ‵tou fesili. (Failauga 3:11) Kae ko mea katoa kolā e aofia i te Tusi Tapu e fesoasoani mai ke iloa ne tatou te Atua. E lavea ne tatou me ko ia se vaegā tino pefea mai te auala e fakafesagai atu a ia ki tino. E tauloto tatou ki vaegā tino kolā e fiafia io me sē fiafia a ia ki ei. (Salamo 15:1-5) E tauloto tatou ki ana kilokiloga e uiga ki te tapuakiga, mea tau amioga, mo kope faka-te-foitino. Kae e tuku mai ne te Tusi Tapu a te ‵toe fakamatalaga manino o uiga o Ieova e auala i pati mo faifaiga a tena Tama, ko Iesu Keliso.—Ioane 14:9.

A te suā pogai ne tuku mai ei ne Ieova tena Muna, ko te Tusi Tapu, ko te mea ke iloa ne tatou te auala ke ola i se olaga fiafia kae aoga. I te Tusi Tapu kātoa, e fakaasi mai ne Ieova te auala ke maua ne tatou se kāiga fiafia, te auala ke maua te lotomalie, mo te auala ke kufaki i te manavase. Kae e pelā mo te mea e fakamatala mai fakamuli i te mekesini tenei, e aofia i te Tusi Tapu a tali ki toe fesili tāua i te olaga, e pelā mo fesili konei: Kaia ko uke katoa i ei penei a logo‵maega? Ne a mea ka ‵tupu i aso mai mua? E fakamatala mai foki i ei a mea kolā ne fai ne te Atua ke fakamautinoa aka me ka fakataunu eiloa a tena fuafuaga telā i te kamataga.

A te Tusi Tapu se tusi telā e tāua ‵ki eiloa—se tusi mai te Atua telā ne sao mai—i auala e uke. Ne tusi i se vaitaimi o tausaga e 1,600 ne se toko 40 tāgata, kae e tumau eiloa te matua tāua i ei me ko te Atua te Tino tonu telā ne aumai ne ia te Tusi Tapu. (2 Timoteo 3:16) E se pelā mo nisi tusitusiga mua, ne sao mai eiloa te Tusi Tapu i te fia o tausaga, e pelā mo te mea ne fakamaoni mai i te fia afe o tusitusiga mua o te Tusi Tapu. E se gata foki i ei, ne sao eiloa te Tusi Tapu mai taumafaiga a tino ke mo a e ‵fuli, tufatufa atu kae fai‵tau ki ei. I aso nei, ko ia eiloa te ‵toe tusi telā ne lasi te tufa mo te ‵fuliga ki ei. A te tumau o te Tusi Tapu ke oko mai ki aso nei, se fakamaoniga me i “muna a te ‵tou Atua e tumau ki te se-gata-mai.”—Isaia 40:8.

Kae ko te suā mea a te Atua ne fai ko te fakatokaga fakapito ke faka‵mautakitaki tena fuafuaga mō tatou katoa. E pelā mo te mea ne fakasae aka muamua, ne manako te Atua ke ola a tino i te lalolagi ki te se-gata-mai. Kae i te taimi ne filifili ne Atamu ke sē fakalogo a ia ki te Atua kae agasala, ne galo atu ei i a ia te avanoaga ke ola ki te se-gata-mai e penā foki ana tama‵liki. “E auala i te tagata fua e tokotasi ne oko mai ei te agasala ki te lalolagi, mo te mate e auala i te agasala tenā, i te auala tenā ne maua ei ne tino katoa te mate i te mea ko agasala a latou katoa.” (Loma 5:12) Ne seki mafai o taunu a te fuafuaga a te Atua ona ko te sē fakalogo o te tagata. Ne saga atu pefea a Ieova ki ei?

Ne seki mafulifuli eiloa a faifaiga a Ieova e ‵tusa mo ana uiga. Ne fakasala ne ia a Atamu mo Eva e ‵tusa mo la mea ne fai i se auala fai mea tonu, kae ne fai ne ia se fakatokaga alofa mō te olaga o lā tama‵liki i aso mai mua. Ona ko tena poto, ne fakaiku aka ne Ieova a te auala ke fakafesagai atu ei ki te tulaga faigata tenā, kae ne faka‵pula fakavave mai ne ia se faka‵leiga ki ei. (Kenese 3:15) Ne ‵togi te agasala mo te mate e auala i te Tama a te Atua, ko Iesu Keliso. Se a te mea ne aofia i ei te mea tenā?

 Ke fakasaoloto a tino mai ikuga o te sē fakalogo o Atamu, ne uga mai ne Ieova a Iesu ki te lalolagi ke akoako a tino ki te auala ki te ola kae ke “tuku atu foki tena ola e pelā me se togiola mō tino e tokouke.” a (Mataio 20:28; Ioane 14:6) E pelā mo Atamu, ne mafai o tuku mai ne Iesu te togiola me i a ia e ‵lei katoatoa. Kae e se pelā mo Atamu, ne tumau eiloa a Iesu i te fakalogo, ke oko eiloa ki tena mate. E tiga eiloa ne seki ‵tau mo Iesu o mate, kae ne toe fakatu aka ne Ieova a ia ki te ola i te lagi. Ko mafai nei ne Iesu o fai a te mea telā ne seki fai ne Atamu—te tukuatuga o te fakamoemoega ke ola ki te se-gata-mai ki tino faka‵logo katoa. “E pelā eiloa mo tino e tokouke ko fai mo tino agasala e auala i te sē fakalogo o te tagata e tokotasi, e penā foki te fai o tino e tokouke mo fai ne tino amio‵tonu e auala i te fakalogo o te tagata e tokotasi.” (Loma 5:19) E auala i te taulaga togiola a Iesu, ka fakataunu ei ne te Atua a tena tautoga ke ola a tino i te lalolagi nei ki te se-gata-mai.

E tauloto tatou ki mea e uke atu e uiga ki a Ieova mai te auala ne fakafesagai atu a ia ki fakalavelave kolā ne fakamāfua aka ne te sē fakalogo o Atamu. E lavea ne tatou me e seai se mea e mafai o taofi ne ia a mea kolā ne kamata ne Ieova; a tena muna ka “manuia eiloa.” (Isaia 55:11) E tauloto foki tatou ki te lasi o te alofa o Ieova mō tatou. “Ne fakaasi mai te alofa o te Atua ki a tatou e auala i te mea tenei, ne uga mai ne te Atua a tena Tama fagasele e tokotasi ki te lalolagi ko te mea ke mafai o maua ne tatou te ola e auala i a ia. Tenei eiloa te alofa, e se ona ko tatou ne a‵lofa ki te Atua, kae ko ia ne alofa mai ki a tatou kae uga mai tena Tama ke fai mo fai te taulaga mō ‵tou agasala.”—1 Ioane 4:9, 10.

A te Atua ne “seki taofi ne ia tena Tama kae ne tuku mai a ia mō tatou katoa,” tela la, e tali‵tonu tatou me ka tuku mai ne te Atua “a nisi mea katoa” kolā ne folafola mai ne ia. (Loma 8:32) Se a te mea ne folafola mai ne te Atua me ka fai ne ia mō tatou? Ke fai‵tau ki ei.