“NE FAKALAVELAVE mai faeloa oku masaki,” ko pati a Ernst telā ko 70 tupu ana tausaga. * E mata, e masani koe mo pati konā? Kafai koe ko matua kae ko lagona ne koe tou foitino ko vāivāi, ko ‵pau eiloa koe mo te tulaga telā e fakamatala mai i te Failauga mataupu e 12. I te fuaiupu 1, a aso o te matua e fakaigoa ki “aso ko toeaina.” E tiga eiloa ko oko koe ki se tulaga matua, kae koi mafai eiloa ne koe o maua se olaga aoga, mai i te tavini atu mo te fiafia ki a Ieova.

Taina mo tuagane pele kolā ko ma‵tua, e se ko koutou fua e fe‵paki mo fakalavelave penā. Ne fe‵paki foki a tavini ma‵tua a Ieova i aso o te Tusi Tapu mo fakalavelave tai ‵pau penā. E pelā me se fakaakoakoga, a Isaako, Iakopo, mo Aita ne ‵kivi. (Kene. 27:1; 48:10; 1 Tupu 14:4) Ne lagona ne Sala tena foitino ko “vāivāi.” (Kene. 18:11, 12) Ne “mokotia faeloa” te Tupu ko Tavita. (1 Tupu 1:1) Ne fai mai a Pasilai se toeaina maumea me ko sē lagona ne ia te gali o ana mea e kai penā foki loa mo leo o tino usu pese. (2 Samu. 19:32-35) Ne fanoa‵noa a Apelaamo mo Naomi i te ‵galo atu o lā avaga.—Kene. 23:1, 2; Luta 1:3, 12.

Se a te mea ne fesoasoani atu ki a latou taki tokotasi ke tumau i te fakamaoni ki a Ieova kae fia‵fia? I te taimi ko matua ei a ia, ne talitonu a Apelaamo ki tautoga a te Atua, kae “malosi a ia ona ko tena fakatuanaki.” (Lo. 4:19, 20) E ma‵nako foki tatou ki te fakatuanaki malosi. E se faka‵na te vaegā fakatuanaki tenā ki ‵tou tausaga, ‵tou mea e mafai o fai, io me ko ‵tou fakanofonofoga. E pelā me se fakaakoakoga, ne fakaasi atu loa ne Iakopo a tena fakatuanaki ki tautoga a te Atua faitalia te vāivāi o tena foitino,‵kivi, kae ko se maua foki ne ia o sasale. (Kene. 48:1-4, 10; Epe. 11:21) I aso nei, a Ines telā ko 93 ana tausaga ne pokotia i se masaki ki ga‵kano, ne fai mai penei: “I aso katoa e maua ne au a fakamanuiaga e uke mai i a Ieova. E mafaufau faeloa au ki te palataiso i aso katoa. E tuku mai ei ki a au se fakamoemoega.” Se fakaakoakoga gali ‵ki o te loto malosi!

E fakamalosi ne tatou ‵tou fakatuanaki mai i te ‵talo, sukesuke ki te Muna a te Atua, kae ‵kau ki fakatasiga Kelisiano. Ne ‵talo atu faeloa te pelofeta matua ko Tanielu fakatolu taimi i te aso, kae ne tumau i te sukesuke ki te Muna a te Atua. (Tani. 6:10; 9:2) A Ana se fafine matua telā ko mate tena avaga “seki galo lele a ia mai te faletapu.” (Luke 2:36, 37) Kafai e kau atu koe ki fakatasiga i so se taimi telā e mafai ne koe, kae fai ou tusaga ki te ‵toe mea e mafai ne koe o fai, ka fakamalosi ne koe a koe eiloa penā foki mo tino kolā e ‵kau atu ki te fakatasiga. Ka fiafia faeloa a Ieova ki au ‵talo, faitalia loa e foliki fua tou tusaga e mafai o fai.—Faata. 15:8.

A te tokoukega o koutou tino fakamaoni e ma‵nako ke lavea ne koutou a mea, faitau kae ke maua te malosi o ‵kau atu ki fakatasiga, kae ko oko loa te faigata io me se maua loa ne koutou o fai penā. Se a la te mea ka fai ne koutou? Ke fakaaoga faka‵lei ne koutou so se mea telā e isi i a koutou. A te tokoukega kolā e se maua o ‵kau ki fakatasiga e fia‵fia o fakalogo‵logo ki polokalame o fakatasiga mai luga i telefoni. Faitalia loa te sē lavea ‵lei ne ia a mea, a Inge telā ko 79 ana tausaga e fakatoka sale ki fakatasiga mai i te fakaaogaga ne ia o ‵kopi kolā ko oti ne faka‵lasi a mataimanu kae tuku atu sale ne se taina i te fakapotopotoga.

E mafai o isi ne mea i a koe kolā e ma‵nako ki ei a nisi tino—e pelā mo te taimi. Kaia e se fakaaoga ei ne koe te taimi ke fakalogologo ki faitauga o te Tusi Tapu mo tusi faka-te-Tusi Tapu, lāuga, mo koniseti fakalogologo? E mafai foki ne koe o telefoni atu ki taina tali‵tonu ke fakaasi atu se meaalofa faka-te-agaga kae fia‵fia o “fakatau fakama‵losi aka ei te ‵tou fakatuanaki.”—Lo. 1:11, 12.

“E fakamataku māfai ko gasolo koe o vāivāi atu i lō aso mua,” ko pati a Christa telā ko 80 tupu ana tausaga.  Kae mafai la pefea ne tino ma‵tua o fakatumau te olotou fia‵fia? Ne fai mai a Peter telā ko 75 ana tausaga, “ke maua se kilokiloga ‵mautinoa, ke mo a eiloa e mafaufau faeloa ki mea kolā ko sē mafai ne koe o fai kae ke fiafia ki mea e mafai ne koe o fai.”

E mata, e mafai o mafaufau koe ki auala kolā koi ma‵tala atu ke mafai ne koe o talai? Ko sē mafai ne Heidi o talai mai fale ki fale e pelā mo te masani. I taimi ko 80 tupu ei ana tausaga, ne tauloto a ia ke fakaaoga te komupiuta mo tusi a tusi. Nisi tino talai ma‵tua ne kamata ne latou a sau‵talaga faka-te-Tusi Tapu i taimi e saga‵saga ei latou i koga ta‵fao io me faka‵tali ki pasi. Io me kafai e nofo atu koe i se fale e tausi ei a tino ma‵tua, e mata, e mafai ne koe o fai sou “koga talai” mai i te talai atu ki tino tausi penā foki mo nisi tino ma‵tua i konā?

I tausaga fakaotioti o tena olaga, ne fakamalosi aka ne te tupu ko Tavita a te tapuakiga ‵ma. Ne fakatoka ne ia a meaalofa tupe mo mea kolā e ‵lago atu ki te faitega o te faletapu. (1 Nofo. 28:11–29:5) E mafai foki o fai koe penā mai i te saga tonu atu ki mea kolā e iloa ne koe e manakogina i te galuega o te Malo i te lalolagi kātoa. Kaia e se ‵lago atu koe ki paenia io me ko tino talai loto finafinau i tau fakapotopotoga e auala i au pati fakamalosi, se tamā meaalofa, io me se ‵kaiga māmā? E mafai foki o aofia i au ‵talo a talavou mo kāiga, latou kolā i te taviniga tumau, tino ma‵saki, mo latou kolā e ‵mafa olotou tiute e fai.

E penā foki loa te lasi o te tāua o koe mo tau taviniga. E se mafai o tiakina ne ‵tou Tamana i te lagi a koutou tino ma‵tua. (Sala. 71:9) E alofa kae fakatāua ne Ieova a koutou. Ko pili fua nei, ka olo tatou o ma‵tua e aunoa mo se tigaina i fakalavelave mo puapuaga. Kae sili atu i ei, ka tavini atu tatou ki te ‵tou Atua alofa ko Ieova ki te se-gata-mai i te malosi katoatoa!