‵Talo

2 E ‵Tau o Fai Atu ki a Ai?

E MATA, e lagona ne te Atua a ‵talo katoa faitalia te igoa io me ko te atua e ‵talo atu ki ei a tino? I te lalolagi i aso nei, ko fai faeloa a te mea tenei e pelā me se mea tonu. E fakasino atu a te manatu tenei ki tino e tokouke kolā e aofia i lotu ‵kau fakatasi kae ma‵nako ke talia a lotu katoa, faitalia a te kese‵kese. Kae e mafai o fai atu me e ‵se te manatu tenei?

E akoako mai i te Tusi Tapu me e se ‵talo atu a tino i taimi e uke ki te tino tonu. I te taimi ne tusi ei te Tusi Tapu, se mea masani ke ‵talo atu a tino ki mea fakatusa. Kae ne fakailoa atu faeloa ne te Atua ke ‵teke atu ne latou te faifaiga tenā. E pelā me se fakaakoakoga, e fai mai a te Salamo 115:4-6 e uiga ki tupua, penei: “E isi olotou taliga kae se ‵logo, e isi olotou isu kae se ‵sogi.” E manino eiloa a te manatu tenei. Kaia e ‵talo atu ei ki se atua telā e se mafai o lagona ne ia a koe?

E fakalauefa mai a te manatu tenei i se tala i te Tusi Tapu. Ne tofotofo ne te pelofeta tonu ko Elia a pelofeta a Paala ke ‵talo atu ki te lotou atua, kae mai tua malie ifo ne ‵talo atu ei a Elia ki tena Atua. Ne fai atu a Elia me ka tali mai ne te Atua tonu a ‵talo kae e se ko atua ‵se. Mai te taliaga o te tofotofoga tenei, ne ‵talo malosi atu a pelofeta a Paala, kae ‵tagi paka‵laga​—kae ne seki manuia! E fai mai te tala: “Seai eiloa se tali io me se mea ke lagona atu.” (1 Tupu 18:29) Kae se a te mea ne tupu i te taimi ne ‵talo atu ei a Elia?

I te otiga ne ‵talo a Elia, ne tali atu eiloa tena Atua i te taimi tenā, mai te faka‵to ifo ne ia a te afi mai te lagi ke ‵sunu ei a te taulaga telā ne fakatoka ne Elia. Se a te mea e kese i ei? E tasi eiloa te mea tāua i te ‵talo a Elia, telā ne fakamau i te 1 Tupu 18:36, 37. Se ‵talo toetoe fua​—e 30 fua a pati i te Tusi Tapu faka-Epelu. Kae i mu pati fua konā, ne taku fakatolu atu ei ne Elia a te igoa totino o te Atua, ko Ieova.

A Paala, telā e fakauiga ki te “pule” io me ko te “matai,” ko te atua o tino Kanana, kae e uke ‵ki a vaega o te atua tenei. A ko te igoa, Ieova, se igoa tu ‵kese telā e fakasino atu fua ki a ia tokotasi mai i mea katoa i te lagi mo te lalolagi. Ne fai atu a te Atua tenei ki ana tino: “Ko au tokotasi ko te Aliki [ko Ieova] te otou Atua. E seai aka foki eiloa se atua e ‵malu penei mo au; e se talia lele ne au se tupua ke maua sena vaega i vikiga e aumai ki a au.”​—Isaia 42:8.

E mata, ne talia a te ‵talo a Elia mo ‵talo a pelofeta a Paala faitalia me ne ‵talo atu latou ki atua kese‵kese? Ne fakamasei ne te tapuakiga a Paala a tino ki faifaiga talitagata ke oko foki ki te ofoatuga o tino e pelā me ne taulaga. E ‵kese mai i ei, ne fakatonu atu a Ieova ki ana tino Isalaelu, ke tapuaki atu ki a ia i se auala ‵malu, telā e fakasaoloto ei latou mai i vaegā faifaiga masei penā. Tela la, mafaufau ki te mea tenei: Kafai ne tusi atu sau tusi ki sou taugasoa telā e fakatāua malosi ne koe, e mata, e fakamoemoe koe ke avatu ki se tino telā e ‵kese tena igoa kae e se fetaui foki tena  tulaga mo mea katoa kolā e talitonu ki ei tou taugasoa me e tāua? E mautinoa eiloa me e se fai penā!

Kafai e ‵talo atu koe ki a Ieova, ko ‵talo eiloa koe ki te Mafuaga, te Tamana o tino katoa. * Ne fai mai te pelofeta ko Isaia i se ‵talo, penei: “Ko koe e te Aliki [ko Ieova], te motou Tamana.” (Isaia 63:16) Tenei eiloa a te Tino e tokotasi telā ne faipati ki ei a Iesu i ana pati ki ana soko: “Au e fanake ki a ia telā ko toku Tamana, ko te otou Tamana foki, ko toku Atua, ko te otou Atua foki.” (Ioane 20:17) A Ieova ko te Tamana o Iesu. A ia ko te Atua telā ne ‵talo atu ki ei a Iesu mo te tino telā ne akoako ne Iesu ana soko ke ‵talo atu ki ei.​—Mataio 6:9.

E mata, e fakatonu mai ne te Tusi Tapu ke ‵talo atu tatou ki a Iesu, ki a Malia, ki tino tapu, io me ki agelu? Ikai, e ‵tau fua o ‵talo atu ki a Ieova. Mafaufau ki pogai e lua konei. Muamua la, a te ‵talo se vaega o te tapuakiga, kae e fai mai te Tusi Tapu me e ‵tau o tapuaki katoatoa atu ki a Ieova. (Esoto 20:5) A te lua o pogai, e fakaasi mai i te Tusi Tapu me e taku a ia ki te ‘Tino telā e lagona ne ia a ‵talo.’ (Salamo 65:2) E tiga eiloa e tuku atu ne Ieova a tiute e uke ki nisi tino, tenei eiloa a te tiute ne seki tuku atu ne ia ki se tino. A ia ko te Atua telā e tauto mai me ka fakalogo mai eiloa a ia ki ‵tou ‵talo.

Tela la, kafai e manako koe ke lagona ne te Atua au ‵talo, ke masaua a te fakamalosiga faka-te-Tusi Tapu, tenei: “So se tino e kalaga atu ki te igoa o te Aliki [ko Ieova], ka fakaolagina eiloa a ia.” (Galuega 2:21) Kae e mata, e lagona ne Ieova a ‵talo katoa? Io me e isi aka foki se mea e ‵tau o iloa ne tatou māfai e ma‵nako tatou ke lagona mai ne Ieova ‵tou ‵talo?

[Fakamatalaga fakaopoopo]

[Ata i te itulau e 5]

A te tofotofoga ne Elia a pelofeta a Paala ne fakamaoni mai i ei me i ‵talo katoa e se fai atu ki te koga e tasi