Talavou—ne A Mea Ka Fai Ne Koutou Ki Otou Olaga?
Talavou—ne A Mea Ka Fai Ne Koutou Ki Otou Olaga?
“E penā foki au māfai e fusu, e se fusu atu fua au ki te matagi.”—1 KOLINITO 9:26, Tusi Paia, Samoa.
1, 2. Ko te mea ke manuia koe i te taimi e gasolo aka ei koe o matua, ne a mea e ‵tau o maua ne koe?
KAFAI ko fanatu koe i se auala telā e se masani koe ki ei, kāti e fia ave ne koe se mape mo se kamupasi. Ka fesoasoani atu a te mape ke iloa ne koe a te koga ko oko koe ki ei kae ke iloa foki ne koe a te auala tonu. Kae e fesoasoani atu a te kamupasi ke tumau eiloa koe i te auala tonu. Kae ko te mape mo te kamupasi ka se aoga malosi māfai e se iloa ne koe a te koga e fanatu koe ki ei. Ko te mea ke se takasese koe, e ‵tau o iloa ‵lei ne koe a te koga e fano koe ki ei.
2 E mafai eiloa o ‵pau a te tulaga e fakafeagai mo koe i te taimi e gasolo aka ei koe o matua. E maua ne koe se mape mo se kamupasi telā e fakatuagagina. A te Tusi Tapu se mape telā e mafai o fesoasoani atu ke iloa ne koe a te auala tonu e ‵tau o fanatu i ei. (Faataoto 3:5, 6) Kafai e akoako faka‵lei, e mafai foki o lasi a te fesoasoani o te loto lagona i te faiga ke tumau koe i te auala tonu. (Loma 2:15) E mafai o fai pelā me se kamupasi. Kae ko te mea ke manuia tou olaga, e ‵tau foki o iloa ne koe a te koga e fanatu koe ki ei. E ‵tau o maua ne koe a fakamoemoega mautinoa.
3. Ne a mea aoga e maua mai i te faiga o fakamoemoega telā ne fakasino atu ki ei a Paulo i te 1 Kolinito 9:26?
3 Ne fakamatala fakatoetoe mai ne te apositolo ko Paulo a te aoga o fakatokaga o fakamoemoega kae taumafai ke oko atu ki ei i te taimi ne tusi mai ei a ia: “A te auala e tele ei au e se tele valevale fua au, e penā foki au māfai e fusu, e se fusu atu fua au ki te matagi.” (1 Kolinito 9:26, Tusi Paia, Samoa) Kafai e isi ne ou fakamoemoega, e mafai o tele atu koe mo te mautinoa. E se leva kae ka fai ne koe a nisi fakaikuga ‵lasi e uiga loa ki te tapuakiga, galuega, fakaipoipoga, mo se kāiga, mo nisi mea aka foki penā. I nisi taimi, e mafai o mafaufau koe me ko fepaki koe mo filifiliga faka‵numi mafaufau e uke. Kae kafai e iloa ‵lei ne koe tou auala, mai i te fakavae o au fakaikuga ki muna‵tonu mo akoakoga fakavae i te Muna a te Atua, ka se mafai eiloa o tofotofogina koe ke fanatu i te auala ‵se.—2 Timoteo 4:4, 5.
4, 5. (a) Ne a mea e mafai o ‵tupu māfai e seki fakatoka ne koe ou fakamoemoega? (e) Kaia e ‵tau ei o takitaki a te faiga o au filifiliga ne se manakoga ke fakafiafia atu ki te Atua?
4 Kafai e se fakatoka ne koe ou fakamoemoega, ka mafai eiloa o fakamalosigina koe ne ou taugasoa mo faiakoga ke fai a te mea telā e mafau‵fau latou me e ‵lei mō koe. E tonu, kafai e isi ne ou fakamoemoega mautinoa, koi mafai eiloa o fakaasi atu ne nisi tino olotou kilokiloga. Kafai e fakalogologo koe ki olotou manatu fesoasoani, fesili ifo ki a koe penei, ‘E mata, e fesoasoani mai a fakamoemoega kolā e taku mai ne latou ke masaua ne au toku Mafuaga i te taimi koi talavou ei au io me ka fai ne latou ke fulitua atu au ki a ia?’—Faitau te Failauga 12:1.
5 Kaia e ‵tau ei o takitaki a te faiga o au filifiliga i te olaga ne se manakoga ke fakafiafia atu ki te Atua? E tasi te pogai me ne tuku mai ne Ieova a mea ‵lei katoa kolā e maua ne tatou. (Iakopo 1:17) E tonu, e ‵tau mo tino katoa o loto fakafetai ki a Ieova. (Fakaasiga 4:11) Se a foki la te suā auala ‵lei e mafai o fakaasi atu i ei tou loto fakafetai i lō te masaua ne koe a Ieova i te taimi e fakatoka ei ou fakamoemoega? Ke na mafau‵fau tatou ki fakamoemoega kolā e aoga ke taumafai ki ei mo mea e ‵tau o fai ne koe ke fakataunu a mea konā.
Ne a Fakamoemoega e Mafai o Fakatoka ne Koe?
6. Se a te fakamoemoega fakavae tāua e mafai o fakatoka ne koe, kae kaia?
6 E pelā mo te mea ne taku atu i te mataupu muamua, a te fakamoemoega fakavae tāua e tasi e mafai o fai ne koe ko te fakamaoni aka ne koe me e ‵tonu a mea kolā e fai mai i te Tusi Tapu. (Loma 12:2; 2 Kolinito 13:5) E mafai o tali‵tonu ou taugasoa ki te evolusione io me ko akoakoga a lotu ‵se ona ko te mea ne fai atu a nisi tino me e tenei eiloa te mea e ‵tau o tali‵tonu latou ki ei. Kae e se ‵tau eiloa o talitonu koe ki se mea penā me e ma‵nako fua a nisi tino ke talitonu koe ki ei. Masaua me e manako a Ieova ke tavini atu koe ki a ia mo tou mafaufau kātoa. (Faitau te Mataio 22:36, 37.) E manako a te ‵tou Tamana faka-te-lagi ke fakavae tou fakatuanaki ki fakamaoniga ‵tonu.—Epelu 11:1.
7, 8. (a) Ka fesoasoani atu pefea a te fakatokaga o tamā fakamoemoega ke fakamalosi aka ei tou fakatuanaki? (e) Ne a mea ka maua ne koe i te taimi e kausaki atu ei koe ki nisi tamā fakamoemoega o koe?
7 Ke fakamalosi aka tou fakatuanaki, kaia e se fakatoka ei ne koe ne tamā fakamoemoega? E tasi a te fakamoemoega ko te ‵talo atu i aso katoa. Ke fakatumau a te ‵gali mo te toe‵toe o au ‵talo, e mafai o fakamau i tou mafaufau io me e tusi ne koe ne tamā fakamatalaga o mea ‵tupu i te aso kolā e manako koe ke aofia i au ‵talo. Masaua ke se taku atu fua a mea faiga‵ta kolā ne fe‵paki mo koe kae e pelā foki mo mea kolā ne fiafia koe ki ei. (Filipi 4:6) A te suā fakamoemoega ko te faitau ki te Tusi Tapu i aso katoa. E iloa ne koe me kafai e faitau ne koe a itulau e fa i te aso, ka fakaoti eiloa ne koe a te Tusi Tapu kātoa i se tausaga fua e tasi? * E fai mai te Salamo 1:1, 2: “Amutia latou kolā . . . e fia‵fia o fai‵tau ki Tulafono a te Aliki, kae mafaufau ‵loto foki ki ei i te ao mo te po.”
8 A te tolu o tamā fakamoemoega e mafai ne koe o fai ko te fakatokaga o se tali mō fakatasiga takitasi. Muamua la, e mafai ne koe o kamata o faitau atu fua te tali io me se tusi siki. Fakamuli loa, e mafai o fai ne koe a te fakamoemoega ke tali atu i au pati eiloa. E tonu, i taimi takitasi e tali ei koe, e ofo atu ne koe se meaalofa ki a Ieova. (Epelu 13:15) Kafai ko oko atu koe ki nisi fakamoemoega konei, ka gasolo aka tou loto talitonu, tou loto fakafetai ki a Ieova, kae ka toka ‵lei koe mō fakamoemoega tumau.
9. Kafai e seki fai koe mo fai se tino talai o te Malo, ne a fakamoemoega tumau e mafai o fakatoka ne koe?
9 Ne a fakamoemoega tumau e mafai o fakatoka ne koe? Kafai e seki kamata o folafola atu ne koe a te tala ‵lei i mua o tino katoa, a tou fakamoemoega tumau ke fai koe mo fai se tino talai o te Malo. Kafai ko oko atu koe ki te fakamoemoega tāua tenei, ka manako koe ke kau atu faeloa kae ke magoi foki tau galuega, ke mo a ma galo i se masina i te galuega talai. Ka fia fakamasani foki koe ke fakaaoga te Tusi Tapu i te galuega talai. Kafai e fai koe penā, ka mafai o iloa ne koe me e momea aka tou fiafia i te galuega talai. Ko mafai ei o momea aka a te uke o taimi e fakamāumāu ne koe i te galuega mai fale ki fale io me e taumafai ke fai se akoga faka-te-Tusi Tapu. E pelā me se tino talai seki papatiso, se a foki a te suā fakamoemoega e mafai o maua ne koe i lō te fakafetaui faka‵lei aka mō te papatisoga kae ke fai mo fai se Molimau tukugina atu kae papatiso a Ieova te Atua?
10, 11. Ne a fakamoemoega tumau e mafai o fai ne talavou papatiso?
10 Kafai koe se tavini papatiso a Ieova, konei la nisi fakamoemoega tumau e mafai o taumafai koe ki ei. Kāti e manako koe o fesoasoani atu ki fakapotopotoga ke talai atu i koga kolā e se galue ‵soko i ei. E mafai o filifili aka ne koe ke fakaaoga tou malosi mo tou ola ‵lei ke paenia lagolago io me paenia tumau. Ka fai atu ne te fia sefulu afe o paenia fia‵fia me i te taviniga tumau se auala fakafiafia ke masaua ei ne koe tou Mafuaga i te taimi koi talavou ei koe. Konei la a nisi fakamoemoega e mafai o taumafai ki ei i tou fenua. Ka maua foki ne tau fakapotopotoga a mea aoga mai i tou kausaki atu ki ei.
11 E mafai o takitaki atu koe ne fakamoemoega tumau ki nisi mea aoga i tafa fua o tau fakapotopotoga. E pelā mo te faiga o aofaga ke tavini atu i te suā koga io me se isi fenua telā e manakogina a tino talai i ei. Kāti e fia fesoasoani atu koe ki te faitega o Kingdom Halls io me ko ofisa lagolago i nisi fenua. Kāti e mafai o ulu atu koe ki te taviniga i te Peteli io me ke fai mo fai se misionale. E tonu, a te ‵toe fakamoemoega tāua muamua e ‵tau o kausaki atu koe ki ei ko te mea ke mafai o oko atu koe ki toe fakamoemoega tāua konei ko te faiga ke papatiso koe. Kafai e seki papatiso koe, mafaufau la ki mea e aofia i te taumafai ke oko atu ki te ‵toe mea tāua tenei i tou olaga.
Kausaki Atu ki te Fakamoemoega ko te Papatisoga
12. Ne a pogai e papatiso ei a nisi tino, kae kaia e se lava ei a pogai konei?
12 E fakamatala mai pefea ne koe a te aoga o te papatisoga? Kāti e mafau‵fau a nisi tino me e puipui ei latou mai i te agasala. E mafau‵fau a nisi tino me e ‵tau o papatiso latou ona ko te mea ko papatiso a olotou taugasoa. Kae kāti e fia fakafiafia atu a nisi talavou ki olotou mātua. Kae ko te papatisoga e sē se feagaiga telā e taofi aka ei koe mai i te fai ‵funa o mea kolā e manako koe ki ei; e se ‵tau foki o papatiso koe ona ko fakamalosiga mai i nisi tino. E ‵tau o papatiso koe māfai ko malamalama katoatoa koe i mea kolā e aofia i te fai mo fai se tokotasi o Molimau a Ieova kae ko mautinoa foki me ko toka kae loto fiafia koe ke tausi atu ki te tiute tenei.—Failauga 5:4, 5.
13. Kaia e ‵tau ei mo koe o papatiso?
13 E tasi te pogai e fai ei a te papatisoga me ne fakatonu atu a Iesu ki ana soko ke ‘fai a soko, kae papatiso atu latou.’ Ne tuku mai foki ne ia se fakaakoakoga e auala i tena papatisoga. (Faitau te Mataio 28:19, 20; Maleko 1:9.) E se gata i ei, a te papatisoga se faiga tāua e tasi mō tino kolā e fia ‵sao. Mai tua o te takuatuga e uiga ki te faitega ne Noa o te vaka telā ne ‵sao ei a ia mo tena kāiga i te Lolo, ne fai atu a te apositolo ko Petelu: “Ko te papatisoga telā e ‵pau mo te mea tenei, e faka‵sao foki i ei koutou . . . e auala i te toetu o Iesu Keliso.” (1 Petelu 3:20, 21) E se fakauiga a te mea tenei me i te papatisoga se fakanofoga i se feagaiga telā e mafai o maua ne koe māfai e tupu se fakalavelave. I lō te fai penā, e papatiso koe ona ko te mea e alofa koe ki a Ieova kae e fia tavini atu koe ki a ia mo tou loto, ola, mafaufau, mo te malosi kātoa.—Maleko 12:29, 30.
14. Kaia e fakatalave ei a nisi tino mai te papatisoga, kae ne a fakamaoniga e maua ne koe?
14 E fakatalave a nisi tino ke papatiso latou ona ko te ma‵taku i a latou ma faka‵tea fakamuli. E mata, e maua ne koe a te vaegā mataku tenei? Kafai e penā loa, e mafai eiloa o aoga a te vaegā mataku tenā. E mafai o fakauiga i ei me e malamalama koe i te ‵mafa o te tiute ke fai mo fai se tokotasi o Molimau a Ieova. E mata, e isi aka foki se pogai? Kāti e seki talitonu koe me i tulaga o te Atua ko te ‵toe auala ‵lei i te olaga. I te feitu tenā, a te mafaufau ki ikuga kolā e oko atu ki tino kolā e fakaseaoga ne latou a tulaga o te Tusi Tapu e mafai o fesoasoani atu ke fai ne koe se fakaikuga. I te suā feitu, e mafai o fai penā ona ko koe e alofa ki tulaga o te Atua kae e se talitonu koe ki a koe eiloa me e mafai o ola e ‵tusa mo mea konā. A te ‵tonuga loa, e mafai o fai a te mea tenā mo fai se fakailoga ‵lei, me e fakaasi atu i ei tou loto maulalo. I tafa i ei, e fai mai te Tusi Tapu me i loto o tino katoa kolā e sē ‵lei katoatoa e faka‵se tino. (Ielemia 17:9) Kae e mafai koe o manumalo māfai e tumau koe i te ‘tausi mo te fakalogo ki te muna a te Atua.’ (Faitau te Salamo 119:9.) Faitalia me se a te pogai e fakatalave ei tou papatisoga, e ‵tau o faka‵lei aka ne koe a vaegā fakalavelave penā, e pelā foki mo mea kolā e manavase koe ki ei. *
15, 16. E iloa pefea ne koe me ko toka koe mō te papatisoga?
15 Kae e iloa pefea ne koe me ko toka koe mō te papatisoga? A te auala e tasi ko te ‵sili ifo o vaegā fesili penei: ‘E mata, e mafai o fakamatala atu ne au a akoakoga faigofie i te Tusi Tapu ki nisi tino? E mata, e kau atu au ki te galuega talai faitalia me e se ‵kau atu oku mātua ki ei? E mata, e taumafai au ke kau atu ki fakatasiga Kelisiano katoa? E mata, e masaua ne au a nisi taimi fakapito ne ‵teke atu ei au ki fakamalosiga mai i taugasoa? E mata, ka tumau eiloa au i te tavini atu ki a Ieova faitalia me e taofi au ne oku mātua mo taugasoa ke fai penā? E mata, ko oti ne ‵talo atu au e uiga ki toku fesokotakiga mo te Atua? Kae e mata, ko oti eiloa ne fai atu ne au se tukuatuga katoatoa ki a Ieova i se ‵talo?’
16 A te papatisoga se faiga e tasi telā e tau atu ki te ola kae e se ‵tau o manatu māmā ki ei. E mata, ko matua ‵lei koe ke mafaufau ‵mafa ki te auala tenei? E uke atu a mea e aofia i te matua ‵lei i lō te mafai o fai a lauga ‵gali mai i te tulaga io me ko tali fakaofoofogia i se fakatasiga. E manakogina i ei a te mafai o fai a fakaikuga kolā e fakavae ki te malamalama i akoakoga fakavae i te Tusi Tapu. (Faitau te Epelu 5:14.) Kafai ko oko atu koe ki se tulaga i te olaga telā ko mafai ne koe o fai a te mea tenā, ko faka‵tali mai i ei i ou mua a te ‵toe tauliaga fakaaloalogina eiloa ko te tavini atu ki a Ieova mo te loto kātoa mo te ola i se auala telā e fakaasi atu i ei me ko oti eiloa ne tuku tonu atu koe ki a ia.
17. Ne a mea ka fesoasoani atu ki a koe ke mafai o fa‵ki i mea faiga‵ta kolā e mafai o oko atu mai tua o tau papatisoga?
17 Mai tua eiloa o te papatisoga, e mafai o maua fakavave ne koe se loto finafinau ke tavini atu ki te Atua. E se leva kae ka fepaki koe mo mea faiga‵ta kolā ka tofotofo aka ei tou fakatuanaki mo tou loto toa. (2 Timoteo 3:12) Ke mo a ma mafaufau koe me e ‵tau o fakafesagai tokotasi atu koe ki mea faiga‵ta konei. Ke ‵sala atu ki te takitakiga a ou mātua. Ke akai atu ki tino ma‵tua i te fakapotopotoga mō se fesoasoani. Ke fakatumau a va fakataugasoa mo latou kolā ka ‵lago atu ki a koe. Ke mo a ma puli me e atafai atu a Ieova ki a koe, kae ka tuku atu ne ia te malosi e manakogina ke fakafesagai atu koe ki so se tulaga e mafai o sae aka.—1 Petelu 5:6, 7.
E Mafai Pefea o Kausaki Atu Koe ki Ou Fakamoemoega?
18, 19. E mafai pefea o maua ne koe a mea aoga mai i te iloiloga o mea kolā e fakamuamua ne koe?
18 Faitalia eiloa au toe taumafaiga ‵lei, e mata, e foliga mai me e se taitai o lava a te taimi ke fai ei ne koe a mea kolā e manako koe ki ei mo mea foki kolā e ‵tau o fai ne koe? Kafai e penā loa, e ‵tau o toe iloilo aka ne koe a mea kolā e fakamuamua ne koe. Ke fai se fakatusa: Ke puke ne koe se paketi lapa kae tuku atu a fatu ‵lasi ki loto i ei. Ka oti, ko faka‵fonu ei ne koe a te paketi ki one. Ko ‵fonu eiloa tau paketi i fatu mo one. Toe tapale la ki tua mo te paketi a mea konā kae tausi loa a one mo fatu. I te taimi tenei, ke faka‵fonu mua a te paketi i one, kae ka oti, ko tuku atu ei a fatu ki loto. E a, e ofi a fatu ki loto? E fai penā ona ko te mea ne tuku atu muamua ne koe a one ki loto.
19 Tenā eiloa te tulaga e fepaki mo koe i te fakaaogaga ou taimi. Kafai e fakamuamua ne koe a fakafiafiaga, ka se lava eiloa a te taimi i tou olaga mō mea tai ‵lasi atu—ko fakamoemoega faka-te-agaga. Kae kafai e tautali koe ki te fakamalosiga i te Tusi Tapu ke “mautinoa i a koutou a mea kolā e sili atu i te tāua,” ka iloa aka ei ne koe me e lava eiloa a taimi mo manakoga o te Malo mo fakafiafiaga foki.—Filipi 1:10.
20. Kafai e manavase kae fakalotolotolua koe i te taimi e kausaki atu ei koe ki ou fakamoemoega, ne a au mea e ‵tau o fai?
20 I te taimi e kausaki atu ei koe ki ou fakamoemoega, e aofia i ei a te papatisoga, e mafai eiloa o manavase kae fakalotolotolua koe i nisi taimi. Kafai e fai koe penā, ke “tuku atu ki te Aliki [ko Ieova] a mea e manavase koe ki ei, me ka fesoasoani a ia ki a koe.” (Salamo 55:22) I te vaitaimi tenei, e maua ne koe te avanoaga ke kau atu ki te ‵toe galuega fakafiafia kae tāua i tala fakasolopito katoa, ko te galuega talai mo te faiga o akoakoga i te lalolagi kātoa. (Galuega 1:8) E mafai ne koe o filifili ke fai mo fai se tino maimoa kae kilokilo atu ki nisi tino kolā e fai ne latou a te galuega tenei. Io me e mafai o fai sou tusaga i te galuega fakafiafia tenei. Ke mo a ma taofi aka a tou atamai i te fakasalalauatuga o manakoga o te Malo. Ka se salamo lele eiloa koe i te tavini atu ki “te Atua telā ne faite ne ia koutou, i aso konei koi ‵tupu ake ei koutou.”—Failauga 12:1.
[Fakamatalaga fakaopoopo]
^ pala. 7 Ke onoono ki Te Faleleoleo Maluga i a Aokuso 1, 2009, te itulau e 15-18.
^ pala. 14 Ke maua se fesoasoani i te feitu tenei, ke onoono ki te tusi ko te Questions Young People Ask—Answers That Work, Tusi i te 2, mataupu e 34.
Ka Tali Mai Pefea ne Koe?
• Kaia e ‵tau ei o fakatoka ne koe ne fakamoemoega?
• Ne a nisi fakamoemoega aoga ke kausaki atu ki ei?
• Ne a mea e aofia i te taumafai atu ki te fakamoemoega ko te papatisoga?
• E mafai pefea o fesoasoani atu a te iloilo aka o mea kolā e fakamuamua ne koe ke oko atu koe ki ou fakamoemoega?
[Fesili mo te Sukesukega]
[Ata i te itulau e 21]
E mata, e isi sou fakamoemoega ke faitau ki te Tusi Tapu i aso katoa?
[Ata i te itulau e 23]
Se a te akoakoga e maua ne koe mai i te fakatusa tenei?