E Fakaasi Mai ne te Atua Tena Alofa ki a Tatou

Te alofa tauanoa, [ka] pule ona ko te amiotonu, e takitaki ei tatou ki te ola se gata mai.”—LOMA 5:21.

1, 2. Ne a meaalofa e lua kolā ne fakaasi mai i konei, kae tefea te meaalofa e sili atu?

“ATE meaalofa . . . sili a te kau Loma ki tino kolā ne manumalo i a latou [ko] olotou tulafono mo te lotou kilokiloga me i te olaga e ‵tau o ola e ‵tusa mo te tulafono.” (te tokita ko David J. Williams i te Iunivesiti o Melbourne, Ausetalia) Kae e tiga eiloa koi aoga te mea tenā, e isi se meaalofa telā e sili atu i te tāua. A te meaalofa fakaatua tenei e fakauiga loa ki te mauaga o se tulaga amiotonu i mua o te Atua mo te fakamoemoega e uiga ki te fakaolataga mo te ola se-gata-mai.

² I se kilokiloga e tasi, e isi ne vaega tāua e uiga ki te auala ne tuku mai ei ne te Atua a te meaalofa tenei. I te Loma mataupu e 5, e seki fakamatala mai ne te apositolo ko Paulo a vaega konei e pelā me se fakasologa o tulafono ma‵keke. I lō te fai penā, ne kamata a ia ki te fakatalitonuga fakafiafia, tenei: “Tela la, ne takuamiotonugina tatou i te fakatuanaki, ko maua foki ne tatou te nofo ‵lei mo te Atua i te ‵tou Aliki ko Iesu Keliso.” A latou kolā e maua ne latou a te meaalofa a te Atua e gasue‵sue o taui atu a tena alofa. A Paulo se tokotasi o latou konā. Ne tusi mai a ia: “I te mea ko oti ne ‵ligi mai ne te Atua ki loto o tatou a tona alofa, e alatu i te agaga tapu telā ne tuku mai ki a tatou.”​​—Loma 5:​1, 5.

3. Ne a fesili kolā e mafai o ‵sae aka?

³ Kae kaia ne aoga ei a te meaalofa tenei? Ne mafai pefea o tuku mai ne te Atua a te mea tenei i se auala fai mea tonu? Kae ne a mea e ‵tau o fai ne tino taki tokotasi ke maua ei ne latou a te mea tenā? Ke na onoono nei tatou ki tali fakama‵lie loto kae ke lavea atu a te auala e faka‵mafa mai ei i tali konei a te alofa o te Atua.

Te Alofa o te Atua e Fe‵paki mo te Agasala

4, 5. (a) Se a te auala sili e fakaasi mai ei ne Ieova tena alofa? (e) Se a te iloa telā e fesoasoani mai ke malamalama tatou i pati i te Loma 5:​12?

⁴ I faifaiga o te alofa sili, ne uga mai ei ne Ieova a tena Tama fagasele e tokotasi ke fesoasoani ki tino. Ne faka‵mafa mai ne Paulo i te auala tenei: “Ka ko te Atua ne fakaasi mai ne ia ki a tatou a tona alofa, i te taimi koi fai ei tatou mo tino agasala; me ne mate a Iesu mō tatou!” (Loma 5:8) Mafaufau la ki se manatu e tasi telā ne taku mai: “Koi fai ei tatou mo tino agasala.” E ‵tau mo tino katoa o malamalama i te auala ne fai ei tatou mo tino agasala.

⁵ Ne faka‵mafa mai ne Paulo te fakalavelave, kamata mai i te manatu tenei: “Ne oko mai te agasala ki te lalolagi i te tagata e tokotasi, ne aumai foki ne tena agasala te mate. Tela la, ko oko ki tino katoa te mate, i te mea ko agasala a tino katoa.” (Loma 5:12) E ‵tau o malamalama tatou i te mea tenei me ne fakamau ki lalo ne te Atua a te auala ne kamata ei te olaga o tino. Ne faite ne Ieova a tino e tokolua, ko Atamu mo Eva. A te Mafuaga e ‵lei katoatoa, e penā foki a te tauavaga muamua, ‵tou tupuga. Ne tuku atu ne Ieova ki a lāua se fakatonuga mautinoa kae fakailoa atu me i te sē faka‵logo ki te tulafono tenā ka mafai o iku atu ki te mate. (Kenese 2:​17) Kae ne filifili lāua ke sē fakamaoni kae ofa ne lāua a te tulafono tāua a te Atua, kae ‵teke ki a ia e pelā me ko te Tino telā ne tuku atu ne ia te tulafono mo te Pule sili i te lagi mo te lalolagi.​​—Teutelonome 32:​4, 5.

6. (a) Kaia ne ‵mate katoa ei a Atamu mo ana tama‵liki mai mua o tuku atu ne te Atua a te tulafono faka-Mose? (e) Se a te mea ne mafai o fakatusa ki ei se masaki telā ne maua ne koe mai ou mātua?

⁶ Ko te taimi fua ne agasala ei a Atamu, kae fai a ia e pelā me se tamana o tama‵liki, kae faka‵solo atu ne ia te agasala mo tena ikuga ki a latou katoa. E tonu, ne seki ofa ne latou a te tulafono a te Atua e pelā mo Atamu, tela la e se ‵pau te lotou fakasalaga; e seki ai foki se fakasologa o tulafono ne tuku atu ki a latou. (Kenese 2:​17) Kae ne fa‵nau mai eiloa a tama‵liki a Atamu mo te agasala. Tela la, ne pule atu te mate i te taimi ne tuku atu ei ne te Atua ki te kau Isalaelu a te fakasologa o tulafono, telā ne fakaasi manino atu i ei i a latou ne tino agasala. (Faitau te Loma 5:​13, 14.) A te ikuga o te tulaga agasala e mafai o fakatusa ki masaki kolā e mafai o maua ne tatou mai ‵tou mātua. E tiga eiloa e maua ne nisi tama‵liki se masaki mai i olotou mātua, e se ko tama‵liki katoa i te kāiga e mafai o maua ne latou te masaki tenā. Kae e se penā eiloa te agasala. Ne maua katoa ne tatou te tulaga agasala mai i a Atamu kae ona ko te mea tenā, ka ‵mate katoa tatou. E mata, e mafai o faka‵lei aka a te fakalavelave tenā?

Te Mea Telā ne Fakatoka ne te Atua e Auala i a Iesu Keliso

7, 8. E mafai pefea o iku atu a auala o tagata ‵lei katoatoa e tokolua ki ikuga kese‵kese?

⁷ Ne fai ne Ieova se fakatokaga alofa mō tino katoa ke ave keatea i ei te tulaga agasala. Ne fakamatala mai ne Paulo me ne mafai fua o fai a te mea tenei e auala i te suā tagata, se tagata ‵lei katoatoa​​—kāti, ko te lua o Atamu. (1 Kolinito 15:45) A ko auala o tagata ‵lei katoatoa konei ne iku atu ki ikuga kese‵kese. E pefea la?​​—Faitau te Loma 5:​15, 16.

⁸ Ne tusi mai a Paulo, penei: “Ka ko te meaalofa faivasaga a te Atua, e se ‵pau mo te ofa tulafono Atamu.” Ne agasala Atamu i te ofa ne ia o te tulafono tenā, kae ne maua ne ia se fakasalaga faigata​​—ne mate a ia. Kae e se ko ia fua tokotasi ne mate. E fai‵tau tatou, penei: “I te mea kafai ne tokouke ne ‵mate i te ofa tulafono a te tino e tokotasi.” A te fakasalaga ‵tau telā ne maua ne Atamu e aofia i ei a tatou katoa, ana tama‵liki sē ‵lei katoatoa. Kae e fakamafanafana mai ke iloa atu me ne mafai ne te tagata ‵lei katoatoa, ko Iesu o tuku mai se ikuga gali. Se a te mea ka iku mai i ei? E lavea ne tatou a te tali i te fakamatalaga a Paulo e uiga ki te mauaga o te “ola ne tino katoa.”​​—Loma 5:​18.

9. Ne a mea ne fai ne te Atua ke takuamiotonu ei a tino, e pelā mo te mea ne fakaasi mai i te Loma 5:​16, 18?

⁹ Se a te uiga tonu o pati Eleni kolā e fakavae ki ei te tugapati ko te “takuamiotonugina” mo te ‘takuamiotonugina o tino katoa’? Ne tusi mai se tino ‵fuli Tusi Tapu e tokotasi e uiga ki te tugapati tenā penei: “A te tugapati tenei e isi se vaega o te tulafono i ei. E faipati eiloa ki se ‵fuliga i te tulaga o se tino i tena va mo te Atua, kae e sē se ‵fuliga i loto i te tino . . . E fakaata mai i te fakatusa tenei a te Atua e pelā me se famasino telā ne fai ne ia se fakaikuga mō te ‵lei o te tino telā e sala, telā ne avatu ki te fono maluga i se auala fakatusa, ona ko te sē amiotonu. Kae e fakasaoloto ne te Atua a te tino sala tenā.”

10. Ne a mea ne fai ne Iesu ke fakatoka ei te fakavae mō tino ke takuamiotonugina?

¹⁰ Se a te fakavae ne mafai ei o fakasaoloto ne te “famasino o te lalolagi kātoa” telā e amiotonu a te tino sē amiotonu? (Kenese 18:25) Mai te fakatuakaga o se fakavae, ne uga mai ei ne te Atua mo te alofa a tena Tama fagasele e tokotasi ki te lalolagi. Ne fai ne Iesu te loto o tena Tamana i se auala ‵lei katoatoa, faitalia a tofotofoga, fakatauemuga faiga‵ta, mo fakasauaga. Ne fakamaoni eiloa a ia ke oko ki tena mate i luga i tesataulo. (Epelu 2:​10) Mai te tukuatuga o tena ola ‵lei katoatoa, ne ofo atu ne Iesu se taulaga telā e mafai o fakasaoloto, io me ‵togi ei a tama‵liki a Atamu mai te agasala mo te mate.​​—Mataio 20:28; Loma 5:​6-8.

11. Se a te mea ne fakavae ki ei a te togiola telā e fetaui tonu?

¹¹ I nisi feitu, ne faipati mai a Paulo e uiga ki “se togiola telā e fetaui tonu mō tino katoa.” (1 Timoteo 2:​6, NW) Se a te mea e fetaui tonu mo te mea tenei? Ne aumai ne Atamu a te tulaga sē ‵lei katoatoa mo te mate ki te fia piliona o ana tama‵liki. Se mea tonu me ne fai a Iesu, e pelā me se tagata ‵lei katoatoa, mo fai se māfuaga o te fia piliona o tino ‵lei katoatoa. * Tela la, ne malamalama ‵lei tatou me ne mafai o fai a te ola ‵lei katoatoa o Iesu fakatasi mo ana tama‵liki mo fai se taulaga telā e fetaui tonu mo Atamu mo ana tama‵liki sē ‵lei katoatoa. Kae e se fai mai te Tusi Tapu me e mafai ne so se tamaliki a Iesu telā ka fanau mai fakamuli o fai pelā me se vaega o te togiola. E fakaasi mai i te Loma 5:​15-​19 me ne mafai fua ne te mate o te “tagata e tokotasi” o fakasaoloto a tino katoa. E tonu, e fetaui ‵lei eiloa te ola ‵lei katoatoa o Iesu ki te ola ‵lei katoatoa o Atamu. E ‵tau eiloa ko Iesu Keliso tokotasi te fakavae o te mea tenei. Ko mafai eiloa ne tino katoa o maua te meaalofa faivasaga mo te ola ona ko te “amiotonu” o Iesu, tena fakalogomuna mo tena fakamaoni ke oko ki tena mate. (2 Kolinito 5:​14, 15; 1 Petelu 3:​18) Se a te ikuga o te mea tenā?

Te Fakasaolotoga Telā ne Fakavae ki te Togiola

12, 13. Kaia e manakogina ei ne tino kolā ne takuamiotonugina a te alofa fakamagalo mo te alofa o te Atua?

¹² Ne talia ne Ieova te Atua a te taulaga togiola telā ne ofo atu ne tena Tama. (Epelu 9:​24; 10:​10, 12) A ko soko o Iesu i te lalolagi, e aofia i ei ana soko fakamaoni, ne tumau eiloa i te sē ‵lei katoatoa. E tiga eiloa ne taumafai latou ke ‵kalo keatea mai te fai mea ‵se, kae e se manumalo faeloa latou i ei. Kaia? Me ne maua eiloa ne latou te tulaga agasala. (Loma 7:​18-​20) Kae ne mafai eiloa o fai ne te Atua se mea e uiga ki te mea tenā. Ne talia ne ia a te “te togiola telā e fetaui tonu” kae ne toka o fakagalue ne ia mō ana tavini.

¹³ E seki tuku atu ne te Atua ki apositolo mo nisi tino ke fakagalue ne latou a te togiola ona ko te mea ne fai ne latou a nisi galuega ‵lei. I lō te fai penā, ne fakagalue ne te Atua a te togiola mō latou ona ko tena alofa fakamagalo mo tena alofa sili. Ne filifili ne ia ke fakasaoloto a apositolo mo nisi tino mai te fakasalaga telā ne maua ne latou, mai te kilo atu ki a latou e pelā me ko saoloto mai te fakasalaga. Ne fakaasi manino mai ne Paulo a te mea tenā: “Ne fakaolagina tatou i te alofa tauanoa o te Atua, e alatu i te fakatuanaki. E sē se mea ne fai ne koutou, kae se meaalofa eiloa a te Atua.”​​—Efeso 2:8.

14, 15. Se a te taui ne fakatoka ki a latou kolā ne takuamiotonugina ne te Atua, kae ne a mea koi manakogina ke fai ne latou?

¹⁴ Mafaufau la ki te meaalofa mai te Atua Malosi Katoatoa ke fakamagalo te agasala mo mea ‵se a se tino telā ne fai! E se mafai o lau ne koe a agasala a tino taki tokotasi ne fai a koituai o fai e pelā me ne Kelisiano; kae ona ko te fakavae o te togiola, ne mafai ei o fakamagalo ne te Atua a olotou agasala. Ne tusi mai a Paulo: “Ka ko te alofa tauanoa, telā ne fai mō agasala e uke, ne aumai ne ia te takuamiotonugina.” (Loma 5:16) A apositolo mo nisi tino kolā ne maua ne latou a te meaalofa faivasaga tenei (ke takuamiotonugina) ka mafai o fakatumau te lotou tapuakiga ki te Atua tonu i te fakatuanaki. Kae se a te taui ka maua ne latou i aso mai mua? “A latou kolā ne maua ne latou te alofa tauanoa mo te meaalofa faivasaga o te amiotonu [ka] pule atu e pelā me ne tupu e auala i te tagata e tokotasi, ko Iesu Keliso.” E tonu, e ‵kese eiloa te ikuga o te meaalofa faivasaga e uiga ki te takuamiotonugina mo te ofa tulafono o Atamu. A te ikuga o te meaalofa tenā ko te ola.​​—Loma 5:​17, NW; faitau te Luka 22:​28-​30.

¹⁵ A tino kolā e maua ne latou te meaalofa tenā, ko oti ne takuamiotonugina, kae ko fai mo tama faka-te-agaga a te Atua. E pelā me ne tino kolā ka pule fakatasi mo Keliso, e maua eiloa ne latou a te fakamoemoega ke toe faka‵tu aka ki te lagi e pelā me ne tama faka-te-agaga ‵tonu ke “pule atu e pelā me ne tupu” fakatasi mo Iesu Keliso.​​—Faitau te Loma 8:​15-​17, 23.

Te Fakaasiga o te Alofa o te Atua ki Nisi Tino

16. E mafai pefea ne tino kolā e fakamoe‵moe ke ola i te lalolagi o maua te meaalofa tenā?

¹⁶ E se ko tino katoa kolā e fakatuanaki kae tavini ki te Atua e pelā me ne Kelisiano fakamaoni e fakamoe‵moe ke “pule atu e pelā me ne tupu” fakatasi mo Keliso i te lagi. E maua ne tino e tokouke a te fakamoemoega telā e fakavae ki te Tusi Tapu kae e tai ‵pau mo te fakamoemoega o tavini a te Atua mai mua o te kau Kelisiano. E fakamoe‵moe latou ke ola ki te se-gata-mai i te lalolagi palataiso. E mata, e mafai o maua nei ne latou se meaalofa faivasaga mai te Atua kae takuamiotonugina latou mo te kilokiloga ke ola ki te se-gata-mai i te lalolagi? E ‵tusa mo pati ne tusi ne Paulo ki te kau Loma, a te tali mautinoa ko te ao!

17, 18. (a) E uiga ki te fakatuanaki o Apelaamo, se a te kilokiloga a te Atua e uiga ki a ia? (e) E pefea te kilokiloga a Ieova e uiga ki te amiotonu o Apelaamo?

¹⁷ Ne fakamatala mai ne Paulo se fakaakoakoga tāua e uiga ki a Apelaamo, se tagata fakatuanaki telā ne ola a koituai o tuku atu ne Ieova se fakasologa o tulafono ki Isalaelu, kae mai mua foki o ‵tala mai ne Keliso te auala ki te ola i te lagi. (Epelu 10:​19, 20) E fai‵tau tatou, penei: “Ne fai feagaiga te Atua ki a Apelaamo mo ana fanau, me ka fai te lalolagi mo olotou tofi, e se i te Tulafono kae i te amiotonu i te fakatuanaki.” (Loma 4:13; Iakopo 2:​23, 24) Tela la, ne taku ne te Atua a Apelaamo telā e fakamaoni e pelā me se tino amiotonu.​​—Faitau te Loma 4:​20-​22.

¹⁸ E se fakauiga a te mea tenā me ne seki agasala eiloa a Apelaamo e tiga eiloa ne tavini atu a ia ki a Ieova mo se fia sefulu tausaga. Ikai, e se amiotonu a ia i te kilokiloga tenā. (Loma 3:​10, 23) Kae ona ko te lasi o tena poto, ne fakatāua ne Ieova a te fakatuanaki tu ‵kese o Apelaamo mo ikuga o ana galuega. I se feitu e tasi, ne fakatuanaki a Apelaamo e uiga ki te “fanau” telā ne folafola mai me vau i tena gafa. Ne fakamaoni mai me i te Fanau tenā ko te Mesia, io me ko te Keliso. (Kenese 15:6; 22:​15-​18) E ‵tusa mo te mea tenā, mai te fakavae o “te togiola telā ne ‵togi ne Keliso Iesu,” ko mafai  ei o fakamagalo ne te Famasino telā ko te Atua a agasala i aso mua. Tela la, e fakatali‵tali nei a Apelaamo mo nisi tino fakatuanaki i taimi o te kau Kelisiano ki te toe‵tuga.​​—Faitau te Loma 3:​24, 25; Salamo 32:​1, 2.

Ke Maua se Tulaga Amiotonu i te Taimi Nei

19. Kaia e ‵tau ei o fakamalosi mai ki tino e tokouke i aso nei a te kilokiloga a te Atua e uiga ki a Apelaamo?

¹⁹ A te manatu me ne taku ne te Atua alofa a Apelaamo e pelā me se tino amiotonu e ‵tau o fakamalosi mai ki loto o Kelisiano ‵tonu i aso nei. E seki takuamiotonugina ne Ieova a Apelaamo e pelā mo te mea e fai ne ia ki tino kolā e fakaeke ne ia ki te agaga ke “pule fakatasi mo Keliso.” A te aofaki foliki o te potukau tenā e taku ko “tino tapu” kae ne taliagina latou e pelā me ne “tama . . . a te Atua.” (Loma 1:​7, NW; 8:​14, 17, 33) E ‵kese mai ei, ne fai a Apelaamo e pelā me ko te “taugasoa” o Ieova a koituai o ofo atu a te taulaga togiola. (Iakopo 2:​23; Isaia 41:8) Kae e pefea la a Kelisiano ‵tonu kolā e fakamoe‵moe ke ola i te lalolagi Palataiso telā ka toe fakafou?

20. Se a te mea e fakamoemoe ki ei te Atua mai i tino kolā e kilo atu a ia ki ei me e amio‵tonu, e pelā mo te mea ne fai ne ia ki a Apelaamo?

²⁰ A tino konei e seki maua ne latou a te “meaalofa faivasaga o te amiotonu” mo te kilokiloga e uiga ki te ola i te lagi “e auala i te fakasaolotoga telā ne ‵togi ki te togiola a Keliso Iesu.” (Loma 3:​24; 5:​15, 17) Kae e ui i ei, e fakatuanaki malosi latou ki te Atua mo ana fakatokaga, kae fakaasi atu ne latou a te lotou fakatuanaki e auala i galuega ‵lei. E tasi mai i ei ko te “talai atu te Malo o te Atua ki a latou, kae akoako atu a mea e uiga ki te Aliki ko Iesu Keliso.” (Galuega 28:31) Tela la, e mafai o kilo atu a Ieova ki a latou e pelā me e amio‵tonu e pelā mo Apelaamo. A te meaalofa telā e maua ne vaegā tino penā​​—ko te fai taugasoa mo te Atua​​—e ‵kese mai te “meaalofa faivasaga” telā e maua ne tino fakaekegina. Kae e mautinoa eiloa me se meaalofa telā e talia ne latou mo te fiafia lasi.

21. Ne a mea aoga e fakaavanoa mai ona ko te alofa mo te fai mea tonu o Ieova?

²¹ Kafai koe e fakamoemoe ke ola ki te se-gata-mai i te lalolagi, e ‵tau o masaua ne koe me e seki maua ne koe te avanoaga tenei ona ko fakamafulifuliga e fai ne pulega a tino. Kae e fakaasi mai i ei a te fuafuaga poto a te Pule Sili o te iunivesi. Ko oti ne fakatoka ne Ieova a auala ke fakataunu ei tena fuafuaga. A auala konei e fetaui ‵lei eiloa mo fakamasinoga ‵tonu. I tafa o mea konā, ne fakaasi atu ne latou a te alofa sili o te Atua. Tenā eiloa te pogai ne fai mai ei a Paulo, penei: “Ka ko te Atua ne fakaasi mai ne ia ki a tatou a tona alofa, i te taimi koi fai ei tatou mo tino agasala; me ne mate a Iesu mō tatou!”​​—Loma 5:8.

[Fakamatalaga fakaopoopo]

 E Mata, e Masaua ne Koe?

• Se a te mea ne maua ne tama‵liki a Atamu, kae se a tena ikuga?

• Ne fakatoka pefea se togiola telā e fetaui tonu, kae i te kilokiloga fea e fetaui tonu ei a te mea tenei?

• Se a te fakamoemoega e maua ne tatou mai te meaalofa ke takuamiotonugina ei tatou?

[Fesili mo te Sukesukega]

[Ata i te itulau e 17]

Ne agasala a te tagata ‵lei katoatoa ko Atamu. Ne ofo atu ne te tagata ‵lei katoatoa ko Iesu “se togiola telā e fetaui tonu”

 [Ata i te itulau e 18]

Ma‵faga o tala ‵lei—me e auala i a Iesu ko mafai ei o takuamiotonugina tatou!