Michelle: I te aso nei, e sau‵tala eiloa au mo tino katoa i te koga tenei ki te tamā pepa tenei. E fakaulutala penei, E Fia Iloa ne Koe te Munatonu? Tenei tau ‵kopi.

Sophia: A te mea tenei se mea e uiga ki lotu?

Michelle: Ao. Onoono ki fesili e ono kolā e fakasolo atu i te ‵kava. Ko te fesili fea i fesili konei​—

Sophia: Ke fakagata ne au koe i konā. Ka māumāu fua ou taimi o faipati mai ki a au.

Michelle: Kaia e fai mai ei koe penā?

Sophia: A te tonuga loa, e se iloa ne au i a au ne talitonu ki te Atua.

Michelle: Ko ‵lei la, e amanaia au ki te faipati tonu mai o koe. E mata, e mafai o fesili atu au penei, konā eiloa ou lagonaga i taimi katoa?

Sophia: Ikai, ne fano sāle au ki lotu i taku tupuakaga. Kae ko leva ne fakagata toku fano sāle ki ei.

Michelle: Ia, ko ‵lei la. Talia mai ke fakaasi atu ne au se mea e uiga ki a au. A toku igoa ko Michelle.

Sophia: Au ko Sophia.

Michelle: E fiafia au o fetaui mo koe, e Sophia.

Sophia: E fiafia foki au o fetaui mo koe.

Michelle: Au ne seki vau o faimālō atu oku talitonuga ki a koe, e Sophia. Kae e fia iloa ‵ki ne au. E mata, e isi se mea ne māfua mai i ei tou fakalotolotolua e uiga ki te Atua?

Sophia: Ao. Ne aofia toku mātua i se fe‵pakiga o motoka i te 17 tausaga ko ‵teka.

Michelle: Ko oko eiloa i toku fanoanoa ke lagona atu te mea tenā. E mata, ne pakia tou fafine i ei?

Sophia: Ao, ne ‵pili tou fafine talu mai te taimi tenā.

Michelle: Ko oko eiloa te fakafanoanoa o te mea tenā. Kāti ne māfatia ‵ki eiloa koe i ei.

Sophia: Ao. Tenā te pogai ne manatu aka ei au, kafai e isi se Atua, kaia ne talia ei ne ia ke tupu te mea tenei? Kaia ne talia ei ne te Atua ke logo‵mae tatou penei?

Michelle: Ou lagonaga mo au fesili ne mea masani. Kafai e logo‵mae tatou, se mea masani ke mafaufau me kaia ne tupu ei te mea tenā. A te tonuga loa, a nisi tāgata mo fāfine fakamaoni i taimi o te Tusi Tapu ne mafau‵fau foki penā!

Sophia: E tonu koe?

Michelle: Ao. E mata, e ‵lei ke fakaasi atu ne au ki a koe se fakaakoakoga mai te Tusi Tapu?

Sophia: E fiafia au ki te mea tenā.

Michelle: Onoono me se a te fakamolemole a te pelofeta fakamaoni ko Sapakuka ki te Atua, i te Sapakuka mataupu 1, fuaiupu e 2 mo te 3: “Te Aliki [Ieova], afea e fakalogo mai ei koe ki aku talosaga mō se fesoasoani, o faka‵sao matou mai te fakasauā ne omotou fili? Ai a e fai ei ne koe ke lavea ne au a puapuaga konā?” E mata, e tai ‵pau a fesili konā mo fesili kolā ne sili sāle ne koe?

Sophia: E ‵pau eiloa.

Michelle: Ne seki ‵liko ne te Atua a Sapakuka i te ‵siliatuga o fesili konā, io me ne fai atu ki a Sapakuka me e manakogina fua ne ia se fakatuanaki tai lasi.

Sophia: Ko oko eiloa te gali.

Michelle: E akoako mai te Tusi Tapu i te Atua e lavea ne ia ‵tou logo‵maega kae saga mai a ia ki ei.

Sophia: Se a te mea e fakauiga koe ki ei?

Michelle: Ke fakaasi atu ne au se fakaakoakoga i konei i te Esoto 3:7. E fiafia koe o faitau te fuaiupu tenā?

Sophia: Ko ‵lei la. E fai mai penei: “Ne toe fai mai te Aliki [Ieova] ki a Mose penei, ‘Ko oti ne lavea ne au te fakapologa fi‵ta o tino Isalaelu ne tino Aikupito;  ko oti ne lagona ne au te lotou tagi ke fakasao latou mai te fakapologa ne tagata Aikupito. E iloa ne au olotou puapuaga katoa.’”

Michelle: Fakafetai. E ‵tusa mo te tusi siki tenei, e mata, e lavea ne te Atua ana tino māfai ko logo‵mae?

Sophia: Ao, e foliga mai me lavea ne ia.

Michelle: Kae sē fai pelā me e se mautinoa i a ia a mea e ‵tupu. Toe onoono ki te vaega fakaoti o te fuaiupu tenā. Muna a te Atua: “E iloa ne au olotou puapuaga.” E mata, e ‵tagi mai a pati konā e pelā mo pati a se Atua e seai ne ana lagonaga io me sē fia saga mai?

Sophia: Ikai, e se fai penā.

Michelle: E tonu, e se lavea fua ne te Atua a ‵tou fakalavelave kae e lagona foki ne ia te fanoanoa māfai e isi ne ‵tou fakalavelave.

Sophia: E tonu.

Michelle: A koi masaua a te mea tenā, ke fai‵tau tāua ki te suā mea telā ne logo‵mae ei a tino o te Atua. E tusi i te Isaia 63:9, NW. E fai mai penei te vaega muamua o te fuaiupu tenā: “I taimi katoa ne puapuaga ei latou ne fakalogo‵mae atu ki a ia.” E mata, ka fai aka koe i te Atua ne pokotia i logo‵maega o ana tino?

Sophia: Ao, e foliga mai penā.

Michelle: Sophia, a te tonuga loa, e lasi ‵ki te atafai mai o te Atua ki a tatou, kae takalialia a ia ma kilo mai ki a tatou e logo‵mae. Kafai e logo‵mae tatou, e logo‵mae foki a ia.

Michelle: A koi tuai au o fano, e isi se suā manatu e fia fakaasi atu ne au ki a koe.

Sophia: Ko ‵lei la.

Michelle: Mafaufau ki te mea telā e akoako mai i te Tusi Tapu ki a tatou e uiga ki te malosi o te Atua. A te fuaiupu telā e mafaufau au ki ei ko te Ielemia 10:12. Fakamolemole, faitau mai ne koe?

Sophia: Io. E fai mai penei: “Ne faite ne te Aliki [Ieova] a te lalolagi ki tena ‵mana; ne faite ne ia te lalolagi ki tena poto kae ‵fola foki ne ia a lagi.”

Michelle: Fakafetai. Ke mafau‵fau malie aka tāua ki te fuaiupu tenei. E mata, ne manako te Atua ke lasi tena malosi ke faite ki ei te matugā iunivesi lasi mo mea katoa i ei?

Sophia: Ao.

Michelle: Nei la, kafai e isi se malosi o te Atua o faite a mea katoa i ‵tou tafa, e mata, e se ‵tau mo tatou o fakamoe‵moe me e isi sena malosi o pule atu ki ana mea ne faite?

Sophia: Ao.

Michelle: Toe mafaufau ki tou mātua. Kaia e manavase ei koe ma kilo atu ki tou fafine e logo‵mae?

Sophia: Ona ko au e alofa ki a ia. A ia ko toku mātua.

Michelle: Kae kafai e isi sou malosi o faka‵lei a ia i aso nei, e mata, ka fai ne koe?

Sophia: Ao.

Michelle: Mafaufau ki te uiga o te mea tenā. E akoako mai i te Tusi Tapu me e lavea ne te Atua a ‵tou logo‵maega, e isi ne ana lagonaga mō tatou, kae lasi ‵ki a tena malosi. E mata, e fakaataata ne koe a te lasi o te loto pulea e manakogina ko te mea ke sē oso mai te Atua kae fakaseai fakavave ne ia ‵tou logo‵maega?

Sophia: Ne seki mafaufau muamua au ki ei i te auala tenā.

Michelle: E mata, e fai penā me e isi ne pogai ‵lei ke sē oso mai a ia o fakaseai ‵tou fakalavelave? *

Sophia: Hmm, i taku faka‵tau e isi ne ana pogai ‵lei.

Michelle: E lagona ne au tau telefoni e tagi, tela la, ka toe foki mai au i te suā taimi, kae ka sau‵tala tāua ki mea e uke atu i te mataupu tenei.

Sophia: Fakafetai. E fiafia au ki te mea tenā. *