A Estelle * ne fano sāle ki te lotu fakatasi mo nāi tamaliki. Muna a tou fafine: “Au ne fai ki toku faifeau i a au e manako o tauloto ki te Tusi Tapu.” Kae seki fai mai eiloa tou tagata ke akoako ne ia au. Fakamuli ifo loa, ne fakagata a tena fano ki te lotu. Ne toe fai mai tou fafine: “Ne tusi mai a tino pulepule o te lotu kae fai mai me kafai au e se fanatu ki te lotu, ke avatu fua a tupe. Ne mafaufau aka au penei, ‘Kafai foki au e se fano ki te lotu, e se fia manava‵se latou ki ei; e ma‵nako fua latou ki aku tupe.’”

Muna a Angelina, telā ne malosi i mea fakalotu: “I taku lotu, e tolu taimi e fakasolo mai ei te pōla i taimi takitasi e fai ei te tapuakiga, kae fakamoe‵moe matou ke tuku se meaalofa i taimi takitasi konā. Ne fakamolemole mai faeloa latou ki tupe. Ne manatu aka au penei, ‘E se fakatasi te agaga o te Atua ki tino konei.’”

E mata, e fakaaoga ne lotu i te koga telā e nofo koe i ei a auala kese‵kese ke faimālō a tino ke tuku mai a tupe? E mata, e fetaui a te mea tenā mo te Tusi Tapu?

Muna a Iesu, telā ko te fakavae o te lotu Kelisiano: “Ne maua ne koutou a mea konei e aunoa mo se ‵togi, tuku atu foki e aunoa mo se ‵togi.” (Mataio 10:8) A te fekau tāua mai te Tusi Tapu e se mafai o ‵togi ki tupe kae ‵tau o maua ne tino katoa kolā e ma‵nako ki ei.

Ne tausi pefea ne Kelisiano mua a mea tau tupe a te fakapotopotoga?

Ne fakameaalofa atu ne tino taki tokotasi a “te mea telā ko oti ne fakaiku aka i tena loto, ke se fai mo te fameo io me ko te faimalo, me i te Atua e alofa ki te tino telā e tuku atu ana mea mo te loto fiafia.” (2 Kolinito 9:7) Muna a te apositolo ko Paulo: “Ne ga‵lue matou i po mo ao, ko te mea ke mo a ma fakafi‵ta ne matou se tino i a koutou, i te taimi e talai atu ei ne matou te tala ‵lei.” (1 Tesalonia 2:9) Ne galue a Paulo pelā me se “tino faite faleie” ke ‵lago atu ki tena galuega talai.​—Galuega 18:2, 3.

E masani o maopoopo a Molimau a Ieova i olotou fale ‵togi ma‵ma kae sē ‵lasi malosi kolā e fakaigoa ki Kingdom Halls. Ne ‵togi pefea a fale konei? E seai lele ne pōla e fakasolo o ‵tae a sene; io me ave ne latou ne teutusi akai ke maua mai ne sene fesoasoani. I lō te fai penā, e tuku ne so se tino telā e loto fakafetai ki te polokalame faka-te-agaga se meaalofa ki loto i te pokisi meaalofa i te Kingdom Hall.

E manino ‵lei i te mekesini tenei e ‵togi ki tupe a te ‵lomiga mo te aveavega. E ui i ei, ka sē lavea lele ne koe se faka‵pulaga io me se akai i ei ke maua a tupe. A te mea telā e faka‵mafa i ei ko te fakaokoatuga o te munatonu i te Tusi Tapu.

Se a tau faka‵tau: E mata, e olo tasi a te auala tenei e maua ei a tupe mo pati a Iesu mo te fakaakoakoga a Kelisiano mua?