A te mate se mataupu faigata ke fai‵pati ki ei. E sili atu i te ‵lei ki tino e tokouke ke se fai‵pati ki ei. Kae e se leva io me se taimi fakamuli ifo, ka pokotia eiloa tatou i ei. Kae ko te logo‵mae o te mate e makati loa fakaatea kae faka‵mae ‵ki.

E seai se mea e mafai o fakatoka katoatoa ne ia tatou mō te galo atu o se mātua, se avaga, io me se tamaliki. E mafai o tupu fakavave se matugā fakalavelave lasi ‵ki io me e tupu i se taimi leva. Faitalia me se a te tulaga, e se mafai eiloa o ‵sao tatou mai i te faka‵mae loto o te mate, kae e fakafanoanoa loto ‵ki a mea e iku mai i ei.

A Antonio, telā ne galo atu tena tama i se fakalavelave tupu i te auala, ne fai mai: “E pelā eiloa mo se tino telā e ‵pui faka‵lei ne ia tou fale kātoa kae fano mo kī. Ko se mafai eiloa o toe foki atu koe ki te fale. E tasi fua tau mea e fai ko te nofo faeloa o mafaufau ki ei. Tenei eiloa te olaga tonu fou. E tiga eiloa e taumafai koe o se toe mafaufau ki ei​—me ko oko eiloa i te sē ‵lei​—e seai foki loa sau mea e mafai ne koe o fai.”

Ne manako eiloa a Dorothy, telā ne galo atu tena avaga i te taimi ko 47 ei ana tausaga, o ‵sala atu ki nisi tali i te taimi ne fepaki ei a ia mo se vaegā mea penā. E pelā me ko te faiakoga Aso Sa, ne seki mafaufau eiloa tou fafine me ko gata atu a mea katoa i te mate. Kae ne seki maua tonu eiloa ne ia se tali mautinoa ki te mea tenā. “Ne a mea e ‵tupu māfai ko ‵mate tatou?” ne fesili atu a ia ki te faifeau i tena lotu. “E seai eiloa se tino e iloa ne ia,” ko tena tali. “Ko ‵tau fua o faka‵tali tatou kae onoono aka.”

E mata, se mea masei ke “faka‵tali kae onoono” atu fua tatou? E mata, e isi eiloa se auala tonu e mafai ei o iloa ne tatou me e gata atu a mea katoa i te mate?