E mata, e fai te ‵talo mo fai se vaega o tou olaga? E fai eiloa penā ki tino e tokouke, ke oko foki ki tino kolā e se tali‵tonu ki te Atua. Kae kaia e ‵talo ei a tino? E ‵tusa mo te sukesukega i Falani, e nofo ki te āfa o tino Falani e ‵talo atu io me mafau‵fau ‵loto i nisi taimi “ko te mea fua ke ‵lei olotou lagonaga.” E pelā mo te tokoukega o tino Eulopa, e se ‵talo atu latou i fakanofonofoga fakalotu. I lō te fai penā, e taumafai latou ke maua a “te ikuga fakamafanafana loto o te ‵talo.” I te suā feitu, e ‵fuli atu fua a nisi tino tali‵tonu ki te Atua māfai ko ma‵nako latou ki se fesoasoani, kae fakamoe‵moe ke tali fakavave atu ki olotou fakamolemole.—Isaia 26:16.

Kae se a loa tau kilokiloga totino ki te mea tenei? Se a tau faka‵tau, e mata, e fai a te ‵talo mo fai se auala fua ke fakaasi atu ei ou mafaufauga? Kafai e talitonu koe ki te Atua, e mata, e lagona ne koe te fesoasoani o te ‵talo ki tou olaga? Io me e foliga atu ki a koe me e se tali mai au ‵talo? E mafai o fesoasoani atu ki a koe a te Tusi Tapu ke kilo atu koe ki ‵talo, e se pelā me se vailakau telā e maua i ei se lagonaga ‵lei, kae e pelā me se auala tāua ke fakapilipili atu ki te Atua.