MATAUPU I TE ‵KAVA | E MATA, E FIAFIA TONU TE ATUA KI A KOE?
E Fia Fesoasoani Atu Faeloa te Atua ki a Koe
“E seai se tino e vau ki a au seiloga ke talia a ia ne te Tamana, telā ne uga mai ne ia au.”—IOANE 6:44.
TE POGAI E FAKALOTOLOTOLUA EI A NISI TINO: E mafau‵fau a tino e tokouke kolā e tali‵tonu ki te Atua me ‵mao latou mai i a Ia. “E kilo atu fua au ki a ia e pelā me ko te Atua telā ne faite ne ia a mea katoa,” ne taku ‵tonu mai a Christina, se fafine mai i Aialani telā ne fanatu ki te lotu i vaiaso katoa. “Kae e se iloa ne au a ia. E seki maua foki eiloa ne au se lagonaga me e pili au ki a ia.”
FAKAMATALAGA MAI TE TUSI TAPU: Kafai ko tai vāi‵vai tatou, e se mafai o ‵fiu a Ieova i a tatou. Ne fai mai ne Iesu se tala fakatusa e uiga ki te alofa o Ieova mō tatou: “Kafai e isi ne mamoe e selau a se tagata kae takasese atu keatea se mamoe e tasi, e mata, ka se tiakina ne ia ana mamoe e iva sefulu iva i luga i te mauga kae fano o ‵sala te mamoe tenā?” Se a te akoakoga tāua? “E penā foki a toku Tamana i te lagi, e se manako ke mate se tokotasi o tino fatauva konei.”—Mataio 18:12-14.
E fakatāua ne te Atua a tino taki “tokotasi o tino fatauva konei.” Kae e mafai la pefea ne te Atua o “‵sala te mamoe” telā ko takasese? E pelā mo te tusi siki i te kamataga, e talia ne Ieova a tino ke aumai ki a Ia.
E mata, ko oi i aso nei e asi atu ki fale o tino io me ko koga e tokouke i ei a tino ke talai atu te fekau mai te Tusi Tapu e uiga ki te Atua?
Ke mafaufau ki te auala e ‵taki mai ei ne Ieova a latou kolā e a‵lofa fakamaoni. I te senitenali muamua T.A., ne uga atu ne te Atua a te soko Kelisiano ko Filipo ke fakapilipili atu ki te kaliota a te Ofisa Aitiope, kae ke sau‵tala mo te ofisa tenā e uiga ki valoaga kolā e faitau ne ia i te Tusi Tapu. (Galuega 8:26-39) Fakamuli ifo, ne uga atu ne te Atua a Petelu ke fanatu o asi ki te fale o te ofisa Loma e igoa ki a Konelio, telā ne ‵talo faeloa kae ne manako ke tapuaki atu ki te Atua. (Galuega 10:1-48) Ne takitaki atu foki ne te Atua a Paulo mo ona taugasoa ki te vaitafe i te fa‵kai o Filipi. I konā, ne fetaui latou mo se fafine e igoa ki a Litia telā ne “tapuaki ki te Atua,” kae “ne ‵tala ne Ieova a tena loto ko te mea ke saga tonu atu.”—Galuega 16:9-15.
Mai mea takitasi konei, e fakamautinoa faeloa ne Ieova me i tino kolā e ‵sala atu ki a ia e maua ne latou te avanoaga ke iloa a ia. E mata, ko oi i aso nei e asi atu ki fale o tino io me ko koga e tokouke i ei a tino ke talai atu te fekau mai te Tusi Tapu e uiga ki te Atua? E tokouke ka tali mai, ko “Molimau a Ieova.” Ke fesili ifo ki a koe eiloa, ‘E mata, e fakaaoga ne te Atua a latou ke fesoasoani mai ki a au?’ E fia fakamalosi atu matou ke ‵talo ki te Atua ke fesoasoani atu ke mafai o saga tonu atu koe mai te fakapilipili atu ki a ia. *
^ pala. 8 Ke maua a nisi fakamatalaga, ke onoono ki te vitio ko te Kaia e ‵Tau ei o Sukesuke ki te Tusi Tapu? i te www.ps8318.com.
You May Also Like
MATOU
Kaia e ‵Tau ei o Sukesuke ki te Tusi Tapu?
E tuku mai i te Tusi Tapu a tali ki toe fesili tāua i te olaga mō te fia miliona o tino i te lalolagi kātoa. E a, e manako koe ke aofia i a latou konā?
