Muamua la, ke maua te fakamafanafanaga mai te munatonu tenei: E lavea ne te Atua a logo‵maega i te lalolagi i aso nei, kae e manako a ia o fai se mea e uiga ki ei. (Salamo 72:13, 14) I tena Muna, ko te Tusi Tapu, e folafola mai te Atua me i tino “kolā e logo‵mae i fakasauaga, ka oko mai eiloa te otou fakatapūga.” Mafea? “I te taimi e fakaasi mai ei te Aliki ko Iesu mai te lagi fakatasi mo ana agelu . . . , o tuku atu te taui ma sui ki a latou kolā e se iloa ne latou te Atua mo latou kolā e se faka‵logo ki te tala ‵lei e uiga ki te ‵tou Aliki ko Iesu.” (2 Tesalonia 1:7, 8) A te taimi tenei e fakaasi mai ei a Iesu, ka tupu eiloa i se taimi mai mua telā e taku ne te Tusi Tapu ki “te taua i te aso lasi o te Atua Malosi Katoatoa,” telā e taku foki ki a Amaketo.—Fakaasiga 16:14, 16.

I te taua tenā i aso mai mua, ka fakaaoga ne te Atua, e se ko tino, kae ko tena Tama, ko Iesu Keliso, e penā foki mo nisi agelu ‵mana ke taua atu ki tino ma‵sei. Ka fakagata atu ne kautau o te lagi a puapuaga katoa.—Isaia 11:4; Fakaasiga 19:11-16.

Ke oko mai eiloa ki te aso nei, e seki ‵fuli eiloa te kilokiloga a te Atua ki taua. Koi kilo atu eiloa a ia ki taua e pelā me se auala ‵lei ke fakagata aka ei a puapuaga mo amioga ma‵sei. Kae e pelā eiloa mo tala fakasolopito, ko te Atua fua e ‵tau o fakaiku aka ne ia a te taimi e fai ei a vaegā taua penā mo tino e ‵kau atu ki ei. E pelā mo te mea ko iloa ne tatou, ko oti eiloa ne  fakaiku aka ne te Atua me i te te taua ke fakagata atu a amioga ma‵sei kae taui atu a faifaiga fakasaua, se taua ka tupu i aso mai mua, kae ka taua atu i ei tena Tama, ko Iesu Keliso. E fakauiga i ei, me e se talia ne te Atua a taua kolā e fai i te lalolagi i aso nei, faitalia me ‵lei te pogai e fai ei.

Ke fai se fakatusaga: Mafaufau me e taua se tautaina i te taimi e galo ei te lā tamana. Ne fakagata malie aka te lā taua kae telefoni atu ki te tamana o lāua. E fai atu te suā tino me ko tena taina ne kamata ne ia te taua, kae fai atu te taina tenā me ne fakasauagina a ia. Ne fai atu lāua pena ki te lā tamana, mo te fakamoemoega ke ‵lago atu te lā tamana ki a lāua i te kinauga tenei. Kae mai tua o te fakalogologo atu ki feitu e lua, ne fai atu te tamana ke fakagata te taua kae faka‵tali ke fanatu a ia o fakatoka te fakalavelave i te taimi e oko atu ei a ia ki te fale. Ne faka‵tali a te tautaina mō se vaitaimi. E seki leva kae ne toe taua foki lāua. I te taimi ne oko atu ei te tamana ki te fale, ne seki fiafia a ia ki a lāua taki tokotasi kae ne fakasala ne ia lāua ona ko te sē faka‵logo.

I aso nei, e fakamolemole atu faeloa a fenua kolā e taua sāle ki te fesoasoani o te Atua. Kae e se kau atu te Atua ki se feitu i taua i aso nei. I lō te fai penā, e fakaasi manino mai ne ia i tena Muna, ko te Tusi Tapu: “Sa taui atu te masei ki te masei,” mo te, “Sa taui ma sui.” (Loma 12:17, 19) E se gata i ei, ko oti ne fakailoa atu ne ia me e ‵tau mo tino o “fifilemu kae fakatalitali” ki a ia ke gasuesue, telā ka fai eiloa a ia penā i Amaketo. (Salamo 37:7) Kafai e fakata‵mala a fenua o faka‵tali ki te taimi e gasuesue ei te Atua kae ‵saga atu o taua, e kilo atu eiloa a ia ki vaegā taua penā e pelā me se faifaiga saua mo te fakamaualuga telā e se fiafia a ia ki ei. Tela la, i Amaketo, ka fakaasi atu ei ne te Atua tena kaitaua kae fakatoka ne ia a kinauga a fenua fakatasi kae mō taimi katoa mai te “fakagata ne ia a taua i te lalolagi kātoa.” (Salamo 46:9; Isaia 34:2) A te ‵tonuga loa, a Amaketo ko te taua telā ka fakagata ei a taua katoa.

A te gataga o taua se fakamanuiaga e tasi mai te fia o fakamanuiaga mai te Malo o te Atua. Ne fakasino atu a Iesu ki te pulega tenā i te ‵talo lauiloa tenei: “Ke oko mai tou Malo. Ke fai te mea e loto koe ki ei i te lalolagi nei e pelā mo te faiga i te lagi.” (Mataio 6:10) Ka se fakagata atu fua ne te Malo o te Atua a taua katoa kae ka fakaseai atu foki ne ia a te pogai fakavae o taua, ko amioga ma‵sei. * (Salamo 37:9, 10, 14, 15) E se tioa eiloa o ‵kilo atu a soko o Iesu mo te olioli ki fakamanuiaga a te Malo o te Atua.—2 Petelu 3:13.

Kae ka pefea te leva e ‵tau ei o faka‵tali tatou ki te Malo o te Atua ke aumai ne ia te gataga ki logo‵maega, puapuaga, mo amioga ma‵sei katoa? E fakaasi mai i te fakataunuga o valoaga i te Tusi Tapu me ko ola nei tatou i “aso fakaoti” o te olaga masei tenei. (2 Timoteo 3:1-5) * E se leva nei, kae ka aumai ei ne te Malo o te Atua a te gataga ki aso fakaoti konei e auala i te taua o Amaketo.

E pelā mo te mea ne lavea atu muamua, a latou kolā e fakaseai atu i te taua fakaoti tenei ko tino kolā e ita fitifiti ke “faka‵logo ki te tala ‵lei e uiga ki te ‵tou Aliki ko Iesu.” (2 Tesalonia 1:8) Kae masaua, e se fiafia a te Atua ke mate so se tino, e aofia i ei a tino ma‵sei. (Esekielu 33:11) Ona ko te mea e “se manako a ia ke fakaseai atu se tino e tokotasi” i te taua fakaoti tenei, e fakamautinoa aka ne ia nei me i te tala ‵lei e uiga ki te ‵tou Aliki ko Iesu, ko “talai atu ki te lalolagi nofoaki kātoa mo fai se molimau ki atufenua katoa” a koi tuai o oko mai te gataga. (2 Petelu 3:8, 9; Mataio 24:14; 1 Timoteo 2:3, 4) Ao, e auala i te galuega talai i te lalolagi kātoa a Molimau a Ieova, ko maua eiloa ne tino i aso nei a te avanoaga ke iloa ne latou a te Atua, ke faka‵logo ki te tala ‵lei e uiga ki a Iesu, kae ke ola ko te mea ke lavea atu ne latou a te aso telā ka se toe ai ei ne taua.