Agodi so wɔ mfaso pii nanso ebetumi ahaw wo. Ne nyinaa gyina agodi kõ, ɔkwan a wofa so di agorɔ no, ne bere dodow a wode di agorɔ no so.

•  Mfaso a ɛwɔ so ne sɛn?

•  Emu asiane no bi ne sɛn?

•  Nea w’atipɛnfo ka

 Sɛ woteɛteɛ w’apɔw mu a, ebetumi ama woanya ahoɔden. Bible ka sɛ “apɔwmuteɛteɛ so wɔ mfaso.” (1 Timoteo 4:8) Aberante bi a ɔde Ryan kaa sɛ, “agodi betumi ama obi anya ahoɔden. Eye sen sɛ ɔbɛhyɛ dan mu abɔ video game.”

 Agodi ma wo ne afoforo bom yɛ ade na ɛma wunya ahosodi nso. Bible no de agodi yɛɛ mfatoho de kyerɛɛ biribi a mfaso wɔ so. Ɛka sɛ: “Ammirikatufo a wosi akan nyinaa tu mmirika no de, nanso obiako pɛ na onya nkonimbo no.” Ɛsan ka sɛ: “Obiara a ɔde ne ho hyɛ akansi mu no hyɛ ne ho so nneɛma nyinaa mu.” (1 Korintofo 9:​24, 25) Nea ɛkyerɛ ara ne sɛ, sɛ obi betumi de mmara a ɛwɔ agodi mu ayɛ adwuma a, ɛsɛ sɛ osua ahosodi na osua sɛnea yɛne afoforo bom yɛ ade. Abigail a wadi mfe 17 no gye asɛm yi tom na ɔka sɛ, “agodi boa ma mitumi ne nkurɔfo bom yɛ ade, na mitumi ne wɔn di nkitaho yiye.”

 Agodi betumi ama nnamfo ntam ayɛ den. Agodi tumi ka nnipa bom. Aberante bi ne din de Jordan ka sɛ, “Ɛkame ayɛ sɛ agodi biara, ɛyɛ a akansi kakra wom nanso sɛ yehu no sɛ ɛyɛ ade a yɛde regyigye yɛn ani kɛkɛ a, ɛma adamfofa kɔ yiye.”

 Egyina agodi kõ no so. Dwom 11:5 ka sɛ: “Yehowa na ɔpɛɛpɛɛ ɔtreneeni ne ɔdebɔneyɛfo mu, na obiara a n’ani gye awudisɛm ho no, ne kra kyi no koraa.”

 Agodi bi wɔ hɔ a awudisɛm nko ara. Sɛ nhwɛso no, ababaa bi a ne din de Lauren ka sɛ: “Wohwɛ akuturuku sei a, nea ɛwom ara ne sɛ baako bɛboro ne yɔnko. Kristofo de, yɛnko ntɔkwaw, enti adɛn nti na ɛsɛ sɛ mehwɛ agodi a obi rebobɔ ne yɔnko sɛ mede gyigye m’ani?

 Susuw wei ho hwɛ: Ɛyɛ a wode wo ho hyɛ agodi a awudisɛm wom mu anaa ɛyɛ a wohwɛ bi? Ɛyɛ a wunya adwene sɛ, wei de sɛ́ ɛrentumi mma minni awu? Sɛ saa na wote nka a, kae asɛm a ɛwɔ Dwom 11:5 no. Ɛma yehu sɛ ɛnyɛ obi a odi awu nko ara na Yehowa ani nnye ne ho, na mmom “obiara a n’ani gye awudisɛm” ho nso, okyi no.

 Ɔkwan a wofa so di agorɔ no. Bible ka wɔ Filipifo 2:3 sɛ: “Mommfa mansotwe anaa anuonyamhunupɛ nnyɛ biribiara, na mmom mumfi ahobrɛase mu mmu afoforo sɛ wɔkyɛn mo.”

 Ɛwom, agorɔ biara a afanu na edi no, ɛyɛ a akansi kakra wom. Nanso sɛ obi de si n’ani so sɛ ɔkwan biara so ɛsɛ sɛ odi nkonim a, ɔrennya agodi no mu anigye. Abarimaa bi a ne din de Brian ka sɛ, “Sɛ woanhwɛ yiye a, w’ani betumi abegye akansi ho. Enti sɛ wobɔ mmɔden wɔ agodi bi mu a, ɛsɛ sɛ woyere wo ho sɛ wubenya ahobrɛase.”

 Susuw wei ho hwɛ: Aberante bi a ne din de Chris ka sɛ, “Yɛbɔ bɔɔl nnawɔtwe biara a, nkurɔfo pirapira.” Enti bisa wo ho sɛ, ‘Dɛn na ɛma wopirapira? Dɛn na metumi ayɛ na obi ampira bio?’

 Bere dodow a wode di agorɔ anaa wode hwɛ no, susuw ho. Bible ka sɛ: ‘Hu nneɛma a ehia pa ara no.’​—Filipifo 1:​10.

 Ɛsɛ sɛ wototo wo nneɛma yiye na wode nea ehia di kan; Nyankopɔn som mu nneɛma na ɛsɛ sɛ wode di kan. Woredi agorɔ anaa worehwɛ agorɔ bi a, ebetumi agye wo bere pii. Daria adi mfe 22, na ɔka sɛ, “Na TV hwɛ agye m’adwene, na na minnya bere mfa nyɛ nneɛma a ehia pa ara no, enti na metaa ne me maame nya akasakasa.”

 Susuw wei ho hwɛ: Sɛ w’awofo tu wo fo wɔ nneɛma a agye wo bere ho a, ɛyɛ a wutie? Trina adi mfe 19 na nea ɔwɔ ka ni: “Na me ne me nuanom taa hwɛ agodi, na na yennya bere mfa nyɛ yɛn asɛde. Ɛba saa a, na me maame ka kyerɛ yɛn sɛ, nnipa a wɔresi akan a mote ho rehwɛ wɔn no, sɛ mohwɛ wɔn oo, sɛ moanhwɛ wɔn oo, wobetua wɔn ka. ‘Na mo de, hena na obetua mo ka?’ Nea na ɔrepɛ akyerɛ ni: Saa nkurɔfo no anya adwuma dedaw. Nanso sɛ yɛanyere yɛn ho anyɛ yɛn sukuu dwumadi ne nneɛma foforo a ɛbɛboa yɛn ma yɛanya adwuma ayɛ a, ebewie yɛn sɛn daakye? Nea na maame reka akyerɛ yɛn ara ne sɛ, ɛnsɛ sɛ yɛma agorɔ a yebedi anaa agorɔ a yɛbɛhwɛ ho hia yɛn sen biribiara wɔn yɛn asetena mu.”