1. Dɛn nti na mmusua a ɛyɛ den ho hia wɔ adesamma abusua mu?

ABUSUA no ne ahyehyɛde a akyɛ paa wɔ asase so, na edi dwuma titiriw bi wɔ adesamma asetra mu. Wɔ abakɔsɛm nyinaa mu no, mmusua a ɛyɛ den aboa ma aman ayɛ den. Abusua no ne nhyehyɛe a eye sen biara a wɔnam so tete mmofra ma wɔbɛyɛ mpanyimfo a wɔn ho akokwaw.

2-5. (a) Ka ahobammɔ a abofra te nka wɔ abusua a anigye wom mu ho asɛm. (b) Ɔhaw ahorow bɛn na wɔka ho asɛm wɔ mmusua bi mu?

² Abusua a anigye wom yɛ baabi a ahotɔ ne ahobammɔ wɔ. Fa bere tiaa bi yɛ abusua pa ho mfonini wɔ w’adwenem. Bere a wodidi anwummere no, awofo a wodwen wɔn mma ho ne wɔn tra ase susuw nsɛm a  esisii da no ho. Mmofra de anigye woro nsɛm bere a wɔka nea esii sukuu kyerɛ wɔn papa ne wɔn maame no. Bere a wɔbom de gye wɔn ahome no ma obiara san nya ahoɔden ma nea ɔbɛyɛ da foforo wɔ kurom no.

³ Wɔ abusua a anigye wom mu no, abofra nim sɛ sɛ ɔyare a, ne papa ne ne maame bɛhwɛ no, ebia wɔbɛtra ne mpa ho mmiako mmiako anadwo no nyinaa. Onim sɛ obetumi akɔka ɔhaw ahorow a ohyia sɛ abofra no akyerɛ ne maame anaa ne papa ma wanya afotu ne mmoa. Yiw, abofra no te nka sɛ ɔwɔ ahobammɔ ɛmfa ho sɛnea ebia ɔhaw ayɛ abɔnten so ma no.

⁴ Sɛ mmofra nyin a, wɔtaa ware na wonya wɔn ankasa abusua. Apuei fam bɛ bi ka sɛ: “Sɛ obi nya n’ankasa ba a, na ohu sɛnea ɛsɛ sɛ n’ani sɔ n’awofo.” Mmofra a wɔanyinyin no de anisɔ ne ɔdɔ a emu yɛ den bɔ mmɔden sɛ wɔbɛma wɔn ankasa mmusua ani agye, na afei nso wɔhwɛ wɔn awofo a afei de wɔrebɔ nkwakoraa ne mmerewa, a wɔn ani gye sɛ wɔne wɔn mmanana bɛbɔ no.

⁵ Ebia ɛde besi ha no woresusuw ho sɛ: ‘Eye, medɔ m’abusua, nanso ɛnte sɛ nea wɔaka ho asɛm seesei ara no. Me ne me hokafo bere nhyehyɛe nhyia, na yɛntaa nhu yɛn ho. Yɛtaa ka sika ho nsɛnnennen ho asɛm.’ Anaa woka sɛ, ‘Me mma ne me mmanana te kurow foforo mu, na minhu wɔn’? Yiw, esiane nneɛma a mpɛn pii no mmusua mufo ntumi nyɛ ho hwee nti, wɔn abusua asetra fã kɛse no ara nyɛ papa. Nanso, ebinom abusua asetra yɛ anigye. Ɔkwan bɛn so? Biribi wɔ hɔ a ɛde abusua mu anigye ba? Mmuae no yɛ yiw. Nanso ansa na yɛbɛka dekode a ɛyɛ ho asɛm no, ɛsɛ sɛ yebua asɛmmisa titiriw bi.

6. Mmusua bɛn na yebesusuw ho wɔ nhoma yi mu?

⁶ Wɔ atɔe fam nsase so no, agya, ɛna, ne mma na  wɔka bom yɛ mmusua dodow no ara. Ebia wɔn nananom tra wɔn ankasa afie mu mpɛn dodow a wobetumi ayɛ saa no. Ɛwom sɛ wɔne abusuafo a wɔmmɛn wɔn pii no di nkitaho de, nanso nnwuma a wɔyɛ ma wɔn no sua. Saa abusua yi titiriw na yebesusuw wɔn ho wɔ nhoma yi mu. Nanso, mmusua foforo adɔɔso yiye wɔ nnansa yi mfe mu-awofo a wonni ahokafo abusua, abusua a mmanoma wom, ne abusua a biribi nti awofo no mmom ntra faako.

7. Dɛn ne abusua santen?

⁷ Nea abu so wɔ aman bi mu ne abusua santen. Wɔ nhyehyɛe yi mu no, sɛ ɛbɛyɛ yiye a, mmofra hwɛ wɔn nananom bere nyinaa, na wɔne abusuafo a wɔmmɛn wɔn no nya abusuabɔ a emu yɛ den na wodi wɔn asɛyɛde ahorow ho dwuma. Sɛ nhwɛso no, ebia abusuafo bɛboa ma wɔahwɛ wɔn wɔfasenom, anaa wɔn abusuafo a wɔmmɛn wɔn pɛɛ, atete wɔn na wɔahwɛ wɔn sukuu mpo. Nnyinasosɛm ahorow a yebesusuw ho wɔ nhoma yi mu no fa mmusua santen nso ho.

8, 9. Ɔhaw ahorow bɛn na ɛrekɔ so aman bi mu a ɛkyerɛ sɛ abusua no resakra?

⁸ Ɛnnɛ abusua no resakra-nea ɛyɛ awerɛhow no, ɛnsakra nyɛ papa. Yehu ɛho nhwɛso wɔ India, faako a ebia ɔyere bɛtra ne kunu abusua nkyɛn ayɛ adwuma wɔ fie wɔ ne nsenom akwankyerɛ ase. Nanso, nnansa yi de, ɔyerenom a wɔwɔ India taa kɔhwehwɛ adwuma wɔ kurom. Nanso ɛda adi sɛ wɔda so ara hwɛ kwan sɛ wobedi wɔn tete asɛyɛde wɔ fie no ho dwuma. Asɛm a wobisa wɔ aman pii mu ne sɛ, Sɛ wɔde ɔbea a ɔkɔ adwuma toto abusua no mufo foforo ho a, adwuma dodow ahe na ɛsɛ sɛ wɔhwɛ kwan sɛ ɔyɛ wɔ fie?

⁹ Wɔ Apuei fam aman mu no, abusua santen no  mufo a wɔne wɔn ho bɛbɔ kɛse no ka wɔn amammerɛ ho. Nanso, Atɔe fam su a ɛne tew a ankorankoro tew wɔn ho yɛ ade ne sikasɛm mu ahokyere nkɛntɛnso no ama amammerɛ kwan so abusua santen no resɛe. Enti, nnipa pii bu wɔn abusuafo a wɔn mfe akɔ anim a wɔbɛhwɛ wɔn no sɛ adesoa na ɛnyɛ asɛyɛde anaa hokwan. Wɔyɛ awofo a wɔn mfe akɔ anim no bi ayayade. Nokwarem no, wohu sɛ wɔyɛ wɔn a wɔn mfe akɔ anim no ayayade na wɔnhwɛ wɔn wɔ aman pii mu nnɛ.

10, 11. Nokwasɛm ahorow bɛn na ɛkyerɛ sɛ abusua no resakra wɔ Europa aman mu?

¹⁰ Awaregu redɔɔso. Wɔ Spain no, awaregu dodow kɔɔ soro koduu aware 8 biara mu1 a egu wɔ afeha a ɛto so 20 no mfe du a etwa to no mfiase—nkɔanim kɛse a ɛyɛ 100 biara mu 1 wɔ mfe 25 pɛ a na atwam no mu. Wɔahu sɛ awofo a wonni ahokafo mmusua adɔɔso mpofirim wɔ Britania a wɔka sɛ aware gu wɔ hɔ sen Europa baabiara no (wɔhwɛ kwan sɛ aware 10 mu 4 begu).

¹¹ Ɛte sɛ nea nnipa pii a wɔwɔ Germany no repow wɔn amammerɛ mu abusua no koraa. Wɔahu wɔ 1990 mfe yi mu sɛ nnipa mmiako mmiako pɛ na wɔtete Germanfo afie ɔha biara mu 35 mu na nnipa baanu baanu pɛ na wɔtete emu ɔha biara mu 31 mu. Fransefo nso ntaa nware, na wɔn a wɔware no taa gyae aware na wɔyɛ saa ntɛmntɛm sen bere bi a atwam. Nnipa bebree pɛ sɛ wɔtra bom a wonni aware mu asɛyɛde ho dwuma. Wohu tebea horow a ɛte saa ara wɔ wiase nyinaa.

12. Esiane nnɛyi abusua mu nsakrae nti, ɔkwan bɛn so na mmofra hu amane?

¹² Mmofra nso ɛ? Wɔ United States ne aman foforo pii so no, wo ara na wɔrewo mpena mma, a ebinom yɛ mmofra a wonnii  mfe aduonu mma. Mmeawa a wonnii mfe aduonu pii wɔ mma dodow bi a ɛsono obiara papa. Amanneɛbɔ ahorow a efi wiase nyinaa ka sɛ mmofra ɔpepem pii a wonni baabi te nenam mmɔnten so; wɔn mu pii reguan afi afie a wɔyɛ wɔn ayayade wom mu anaasɛ mmusua a entumi nhwɛ wɔn bio na apam wɔn.

13. Ɔhaw ahorow a abu so bɛn na ɛma mmusua hwere wɔn anigye?

¹³ Yiw, ɔhaw aba abusua no mu. Nea yɛaka dedaw yi akyi no, mmofra atuatew, mmofra a wɔto wɔn mmonnaa, ahokafo a wɔyɛ wɔn ayayade, sadweamyɛ, ne ɔhaw afoforo a emu yɛ den ama mmusua pii ahwere wɔn anigye. Wɔ mmofra ne mpanyimfo pii fam no, abusua no nyɛ baabi a ahobammɔ wɔ koraa.

14. (a) Sɛnea ebinom kyerɛ no, nneɛma bɛn na ɛde abusua mu ɔhaw aba? (b) Afeha a edi kan no mu mmaranimfo bi kaa nnɛ wiase no ho asɛm dɛn, na nkɛntɛnso bɛn na ne nsɛm no mmamu anya wɔ abusua asetra so?

¹⁴ Dɛn nti na ɔhaw aba abusua no mu? Ebinom ka sɛ nnɛyi abusua mu ɔhaw no fi honam fam adwuma a mmea yɛ bi no. Afoforo ka sɛ efi nnɛyi ɔbrasɛe no. Wɔka nneɛma foforo a ɛde ba nso ho asɛm. Bɛyɛ mfe mpem abien ni no, mmaranimfo bi a wɔagye din yiye ka siei sɛ nhyɛso pii bɛba abusua no so, bere a ɔkyerɛw eyi no: “Nna a edi akyiri mu no, mmere a emu yɛ den bɛba. Efisɛ nnipa bɛyɛ ahopɛfo, sikapɛfo, ahohoahoafo, ahantanfo, abususɛnkafo, awofo asɛm ho asoɔdenfo, bonniayɛfo, wɔn a biribiara ho ntew mma wɔn, wɔn a wonni dɔ, apamsɛefo, ntwirifo, wɔn a wɔnhyɛ wɔn akɔnnɔ so, wɔn a wɔyɛ keka, wɔn a wɔmpɛ papa, afatwafo, anuɔdenfo, wɔn a wɔhoman, wɔn a wɔdɔ anigyede sen Nyankopɔn.” (2 Timoteo 3:1-4) Hena na obegye kyim sɛ nsɛm yi nnyaa mmamu nnɛ? Ɛyɛ nwonwa sɛ mmusua pii rehyia ɔhaw wɔ wiase a tebea a ɛte saa wom mu?

15-17. Wɔ nhoma yi mu no, dɛn na tumi wom a wɔbɛkyerɛ yɛn sɛ ɛde abusua mu anigye ba?

¹⁵ Wofi mmaa nyinaa de sɛnea wobetumi anya abusua mu anigye ho afotu ma. Wɔ Atɔe fam no, ɛho afotu nhoma ne nsɛmma nhoma a wotintim bere nyinaa de afotu ma. Ɔhaw no ne sɛ ɛsono nea afotufo a wɔyɛ nnipa no mu biara ka, na wobetumi abu afotu a wɔde ma nnɛ no sɛ entumi nyɛ adwuma ɔkyena.

¹⁶ Ɛnde, ɛhe na yebetumi anya abusua ho akwankyerɛ a wotumi de ho to so? Wode wo ho bɛto nhoma a wɔkyerɛw wiei bɛyɛ mfe 1,900 ni so? Anaa wobɛte nka sɛ ɛbɛyɛ sɛ nhoma ɛte saa no mu nsɛm atwam koraa? Nokwasɛm no ne sɛ nea ɛde abusua mu anigye ba ankasa no wɔ nhoma a ɛte saa mu.

¹⁷ Saa nhoma no ne Bible. Sɛnea adanse no nyinaa kyerɛ no, Onyankopɔn ankasa na ɔma wɔfaa honhom so kyerɛwee. Yehu asɛm a edi so yi wɔ Bible no mu: “Kyerɛw nyinaa fi Onyankopɔn home mu, na eye ma ɔkyerɛkyerɛ, ntɛnyi, nneɛma a wɔtoto no yiye, ne nteɛso wɔ trenee mu.” (2 Timoteo 3:​16,NW) Wɔ nhoma yi mu no, yɛ bɛhyɛ wo nkuran sɛ susuw sɛnea Bible no betumi aboa wo ma ‘woatoto nneɛma yiye’ ho, bere a wudi nhyɛso ne ɔhaw ahorow a mmusua rehyia nnɛ ho dwuma no.

18. Dɛn nti na ntease wom sɛ yebegye Bible atom sɛ ekura tumi wɔ aware ho afotu mu?

¹⁸ Sɛ wo su ne sɛ wunnye ntom sɛ Bible betumi aboa ma mmusua anya anigye a, susuw eyi ho: Nea ɔma wɔnam honhom so kyerɛw Bible no ne aware nhyehyɛe no Farebae. (Genesis 2:​18-25) Bible ka sɛ ne din ne Yehowa. (Dwom 83:​18) Ɔno ne Ɔbɔadeɛ ne ‘Agya a abusua biara din fi ne hɔ.’ (Efesofo 3:​14, 15) Yehowa ahwɛ abusua asetra fi adesamma mfiase. Onim ɔhaw ahorow a ebetumi asɔre na ɔde afotu a wɔde bedi ho  dwuma ama. Wɔ abakɔsɛm nyinaa mu no, wɔn a wofi wɔn komam de Bible nnyinasosɛm ahorow dii dwuma wɔ wɔn abusua asetra mu no nyaa anigye kɛse.

19-21. Nnɛyi osuahu ahorow bɛn na ɛkyerɛ tumi a Bible wɔ a edi aware mu ɔhaw ahorow ho dwuma?

¹⁹ Sɛ nhwɛso no, na ɔbaa warefo bi a ɔwɔ Indonesia yɛ obi a ontumi nnyae kyakyatow. Obuu n’ani guu ne mma baasa so mfe pii na na ɔne ne kunu ko ntɔkwaw daa. Afei ofii ase suaa Bible no. Nkakrankakra ɔbea no begyee nea Bible kae no dii. Bere a ɔde emu afotu dii dwuma no, ɔbɛyɛɛ ɔyere pa. Ne mmɔdenbɔ a egyina Bible nnyinasosɛm ahorow so no maa n’abusua mũ no nyaa anigye.

²⁰ Ɔbaa warefo bi a ɔwɔ Spain ka sɛ: “Yɛwaree no afe pɛ na yefii ase hyiaa ɔhaw ahorow a emu yɛ den”. Na ɔne ne kunu nyɛ nneɛma pii mmom na na wɔne wɔn ho nkasa ahe biara gye sɛ wɔregye akyinnye. Ɛwom sɛ na wɔwɔ ɔbabea kumaa bi de, nanso wosii gyinae sɛ wɔbɛtetew wɔn aware no mu wɔ mmara kwan so. Nanso, ansa na wɔbɛyɛ saa no, wɔhyɛɛ wɔn nkuran sɛ wɔnhwehwɛ Bible no mu. Wosuaa emu afotu ma mmarima ne mmea awarefo na wofii ase de dii dwuma. Ankyɛ, wotumi bɔɔ nkɔmmɔ asomdwoe mu na na wɔn abusua ketewa no de anigye bom yɛ ade.

²¹ Bible boa mpanyimfo nso. Sɛ nhwɛso no, susuw Japanfo awarefo bi suahu ho. Na okunu no bo haw no, na ɛtɔ mmere bi a na ɔyɛ basabasa. Nea edi kan no, awarefo no mmabea fii ase suaa Bible no ɛmfa ho sɛ wɔn awofo sɔre tiaa wɔn. Afei, okunu no kɔkaa ne mmabea no ho, nanso ne yere no ampene so ara sɛ obesua. Nanso, mfe bi twam no, ohuu nkɛntɛnso pa a Bible nnyinasosɛm anya wɔ n’abusua so no. Ne mmabea no hwɛɛ no yiye, na ne kunu bɛyɛɛ obi a odwo kɛse. Nsakrae a ɛte saa no kaa ɔbea no ma n’ankasa hwehwɛɛ Bible no mu, na enyaa ne so  nkɛntɛnso saa ara. Ɔbea a ne mfe akɔ anim yi kae mpɛn pii sɛ: “Yɛbɛyɛɛ awarefo ankasa.”

22, 23. Ɔkwan bɛn so na Bible boa nnipa a wofi aman nyinaa mu ma wonya anigye wɔ wɔn abusua asetra mu?

²² Saa nnipa yi ka nnipa pii a wɔasua nea ɛde abusua mu anigye ba no ho. Wɔagye Bible afotu atom na wɔde adi dwuma. Nokwarem no, wɔte wiase koro no ara a basabasayɛ, ɔbrasɛe, sikasɛm mu ahokyerɛ wom a obiara te mu no mu bi. Afei nso, wɔnyɛ pɛ nanso wonya anigye wɔ mmɔden a wɔbɔ sɛ wɔbɛyɛ abusua nhyehyɛe no Farebae no apɛde no mu. Sɛnea Bible ka no, Yehowa Nyankopɔn ne “nea ɔkyerɛ wo nea eye ma wo, na ogya wo kɔ ɔkwan a fa so no so.”​—Yesaia 48:17.

²³ Ɛwom sɛ wɔkyerɛw Bible no wiei bɛyɛ mfe mpem abien ni de, nanso emu afotu yɛ ne bere mu de ankasa. Afei nso, wɔkyerɛw maa nnipa nyinaa. Bible no nyɛ Amerikafo anaa Atɔe fam nhoma. Yehowa ‘maa nnipa aman nyinaa fii onipa biako mu,’ na Onim sɛnea nipa a wɔwɔ mmaa nyinaa su te. (Asomafo no Nnwuma 17:​26) Bible nnyinasosɛm ahorow yɛ adwuma ma obiara. Sɛ wode di dwuma a, wo nso wobɛba abehu nea ɛde abusua mu anigye ba.