Sika a wiase aman sɛe no ɔko ho no, ɛnyɛ bi ni.

•   “Akokoakoko a ɛkɔɔ so wɔ wiase afe a etwaam no, ɛka a wiase aman bɔɔ wɔ ho no si dɔla ɔpepepepem 2 ne kakra. ($2.2 trillion) Ebi nsii saa da.”—The Washington Post, February 13, 2024.

 Nanso sika no koraa de, momma yɛmfa nto nkyɛn. Owu ne amanehunu a akɔfa aba no koraa na ɛyɛ ahometew no. Wo de, ma yɛmfa Ukraine ko no nko ara na yɛnhwɛ ade.

•   Asogyafo. Nhwehwɛmufo bi kyerɛ sɛ, efi bere a ɔko no hyɛɛ ase mfe mmienu ni no, asogyafo a awuwu ne wɔn a apirapira no rekeka kɔ 500,000.

•   Temanmufo. Amanaman Nkabom no kyerɛ sɛ, temanmufo bɛboro 28,000 na awuwu anaa wɔapirapira wɔ ɔko no mu. Nanso Amanaman Nkabom no panyin baako kaa sɛ: “Ɔhaw ne ateetee a ɔko yi akɔfa abrɛ temanmufo no, yɛrentumi nhu ano.” a

 Akokoakoko a ɛrekɔ so wɔ wiase no, amanehunu a akɔfa abrɛ nnipa no nyɛ asɛm ketewa.

•   Nnipa ɔpepem 114 (114 million). Wei yɛ nnipa dodow a ɛde besi September 2023 no, na ɔko ne basabasayɛ ama wɔaguan afi wɔn fie wɔ wiase nyinaa.

•   Nnipa ɔpepem 783 (783 million). Wei yɛ nnipa dodow a aduan ho ayɛ den ama wɔn paa. “Ade kɛse paa a ɛkɔfa ɔkɔm ba ne ntɔkwaw. Nnipa a ɔkɔm aposaw wɔn wɔ wiase nyinaa no, wuyi edu biara a, emu nson te baabi a ɔko ne basabasayɛ rekɔ so.”—World Food Programme.

 Enti ɔko betumi agyae ama ayɛ yiye? Anidaso wɔ hɔ sɛ asomdwoe bɛba? Ɔdomankoma agyapade bebrebe a ɛwɔ wiase no, bere bi bɛba a yɛde bɛyɛ adwuma yiye de ayi ɔkɔm ne ohia afi hɔ anaa? Dɛn na Bible ka?

 Bible ka too hɔ sɛ akokoakoko bɛdɔɔso wɔ wiase. Ɛkaa ɔko ho asɛm sɛ obi a ɔte pɔnkɔ so. Bible ka sɛ:

•   “Ɛnna ɔpɔnkɔ foforo bi a ɔyɛ kɔkɔɔ bae, na wɔmaa nea ɔte no so no kwan sɛ onyi asomdwoe mfi asaase so sɛnea ɛbɛyɛ a wobekunkum wɔn ho; na wɔmaa no sekan kɛse bi.”—Adiyisɛm 6:4.

 Onipa a ɔte saa pɔnkɔ yi so no, mmienu bi nso tete pɔnkɔ so di n’akyi. Wɔn nso gyina hɔ ma ɔkɔm ne owu a yare ne nneɛma foforo akɔfa aba no. (Adiyisɛm 6:5-8) Saa Bible nkɔmhyɛ yi, sɛ wopɛ sɛ wusua ho ade pii, na wuhu nea enti a yebetumi aka sɛ ɛreba mu wɔ yɛn bere yi so a, kenkan asɛm a yɛato din “Nnipa Nnan a Wɔtete Apɔnkɔ So—Wɔyɛ Nnipa Bɛn?”

 Ɛrenkyɛ, ɔdomankoma agyapade a ɛwɔ asaase so no, nnipa remfa nyɛ ɔko ho adwuma bio. Nanso, ɛnyɛ nnipa na ɛbɛma aba saa. Bible ka sɛ:

•   ‘Onyankopɔn bɛma akodi agyae wɔ asaase nyinaa so.’—Dwom 46:9.

•   Amanehunu a ɔko de aba nyinaa, Onyankopɔn beyi afi hɔ. Bible ka sɛ: “Na ɔbɛpopa wɔn aniwa mu nisu nyinaa, na owu nni hɔ bio, na awerɛhow ne osu ne yaw nso nni hɔ bio. Kan nneɛma no atwam.”—Adiyisɛm 21:4.

•   Onyankopɔn bɛhwɛ ama obiara anya asomdwoe amapa. Bible ka sɛ: “Me manfo bɛtena asomdwoe tenabea, ahotɔ fi, ne kommyɛ ahomegyebea.”—Yesaia 32:18.

 Bible nkɔmhyɛ ma yɛte ase sɛ, akokoakoko ne nneɛma afoforo a ɛrekɔ so nnɛ no kyerɛ sɛ saa asomdwoe bere no abɛn paa.

 Ɔkwan bɛn na Onyankopɔn bɛfa so de asomdwoe aba wiase daakye? Ɔnam n’Ahenni anaa n’aban a ɛwɔ soro no so. (Mateo 6:10) Ahenni no yɛ dɛn, na ɛba a, nhyira bɛn na wubenya? Wopɛ sɛ wunya saa nsɛm yi ho mmuae a, hwɛ video tiawa a yɛato din Dɛn Ne Onyankopɔn Ahenni?