1, 2. (a) Ahofadi ho adwene bɛn na nkurɔfo kura? (b) Dɛn na Bible ka wɔ ahofadi a yɛwɔ no ho? Nsɛmmisa bɛn na yebesusuw ho?

ONYANKOPƆN ama nnipa akyɛde bi nanso ɛnyɛ obiara na ɔpɛ sɛ ɔde yɛ adwuma; ɔde obiara pɛ ama no enti yɛwɔ ahofadi. Da bi, na ɔbea bi ne n’adamfo resusuw asɛm bi ho. Ná ɔpɛ sɛ ohu nea ɛsɛ sɛ ɔyɛ. Onkobue n’ano a, ose: “Me deɛ mempɛ haw, kyerɛ me nea menyɛ kɛkɛ. Ɛnyɛ afei na merebɛdwinnwen ahaw me ho.” Sɛ́ anka ɔbea no de n’adwene anaa akyɛde a Ɔbɔadeɛ no de ama no bɛyɛ adwuma no, na ɔpɛ sɛ n’adamfo no tete aduan hyɛ n’ano anaa ɔkyerɛ no nea ɛsɛ sɛ ɔyɛ. Wo nso ɛ? Ɛyɛ a wopɛ sɛ wo ara wusisi wo gyinae anaa daa gye sɛ obi kyerɛ wo nea ɛsɛ sɛ woyɛ? Ahofadi a Onyankopɔn de ama yɛn no, wubu no sɛn?

² Nkurɔfo de mfe pii abooboo asɛm yi ho. Ebinom kyerɛ sɛ Onyankopɔn mfaa obiara pɛ mmaa no; biribiara a yɛbɛyɛ no, Onyankopɔn na ahyehyɛ ato hɔ. Ebinom mpo deɛ, wɔn asɛm ne sɛ sɛ Onyankopɔn de yɛn pɛ ma yɛn koraa a, ɛno na ɛbɛma yɛade yɛn ho korakora. Sɛ saa na nkurɔfo reka a, ɛnde yɛnhwɛ nea Onyankopɔn Asɛm Bible nso ka. Bible bɛboa yɛn sɛn? Ɛbɛma yɛahu sɛ Yehowa bɔɔ nnipa no, ɔde obiara pɛ maa no. Enti obiara wɔ kwan sɛ osisi ɔno ara ne gyinae. (Kenkan Yosua 24: 15.) Afei Bible ma yenya nsɛmmisa yi ho mmuae: Ahofadi a Onyankopɔn de ama yɛn no, sɛn na ɛsɛ sɛ yɛde yɛ adwuma? Yɛwɔ kwan sɛ yɛyɛ nea yɛpɛ biara anaa? Ɔkwan bɛn so na yebetumi de ahofadi a yɛwɔ no ayɛ adwuma de akyerɛ sɛ yɛdɔ Yehowa? Sɛ obi si gyinae a, dɛn na yɛbɛyɛ de akyerɛ sɛ yebu gyinae a wasi no?

3. Ahofadi a Yehowa wɔ no, ɔde di dwuma sɛn?

³ Yehowa nko ara na ɔde ne ho korakora, ɔnhyɛ obiara ase. Ɛno mpo no, ɔnyɛ biribiara kɛkɛ. Yebetumi asua biribi afi ne hɔ. Nhwɛso bi ni. Onyankopɔn hyɛɛ da yii Israel man de ne din too wɔn so, na wɔbɛyɛɛ “n’agyapade titiriw.” (Deut. 7:6-8) Biribi nti na ɔpaw wɔn. Mfe pii a atwam no, na Yehowa ahyɛ n’adamfo Abraham bɔ sɛ ɔde n’asefo bɛyɛ ne man; enti na ɔredi saa bɔhyɛ no so. (Gen. 22:15-18) Bio nso, ɔdɔ ne atɛntrenee na Yehowa de yɛ biribiara. Sɛ yɛhwɛ sɛnea ɔne Israel man no dii a, yehu saa. Ná wɔtaa fi Yehowa akyi kɔsom anyame foforo nanso sɛ wofi wɔn komam nu wɔn ho na wɔsan ba ne nkyɛn a, ne dɔ ne mmɔborɔhunu nti, ɔmpo wɔn. Ɔteɛ wɔn so na ɔka sɛ: “Mɛsa wɔn yare afi wɔn atuatew ho. Meyi me yam adɔ wɔn.” (Hos. 14:4) Ahofadi a Yehowa wɔ no, yɛhwɛ sɛnea oyi ne yam de boa nkurɔfo a, yɛrentumi nsuasua anaa?

4, 5. (a) Hena na Onyankopɔn dii kan de ne pɛ maa no, na ɔde yɛɛ adwuma sɛn? (b) Asɛm bɛn na ɛsɛ sɛ yɛn nyinaa bisa yɛn ho?

⁴ Bere a Yehowa fii ase bɔɔ ade no, ɔdɔ nti ɔde nnipa ne abɔfo pɛ maa wɔn. Saa ahofadi no, n’abakan no na odii kan de maa no. Ɔno ne “Onyankopɔn a wonhu no no suban.” (Kol. 1:15) Ansa na Yesu reba asase so no, odii n’Agya nokware, wamfa ne ho ammɔ Satan antew atua. Ɔbaa asase so nso, wamfa n’ahofadi no anyɛ nea Satan pɛ. Bere a Ɔtamfo kɛse no sɔɔ no hwɛe no, ɔpowee. (Mat. 4:10) Ade rebɛkye ama Yesu awu no, ɔbɔɔ Onyankopɔn mpae denneennen sɛ ɔmmoa no mma ɔnyɛ n’apɛde. Ɔkaa sɛ: “Agya, sɛ wopɛ a, yi kuruwa yi fi me so. Nanso, ɛnyɛ me pɛ, na mmom ma wo pɛ nyɛ.” (Luka 22:42) Momma yensuasua Yesu na yɛmfa ahofadi a Yehowa de ama yɛn no nyɛ n’apɛde na ɛnhyɛ Onyankopɔn anuonyam! Wei boro yɛn so anaa?

⁵ Dabi. Ɛmmoro yɛn ahoɔden so; yebetumi asuasua Yesu. Efisɛ yɛn nso, Onyankopɔn bɔɔ yɛn ne suban so. (Gen. 1:26) Nanso ahofadi a yɛwɔ no, ɛnyɛ biribiara na yebetumi de ayɛ. Yehowa nko ara na ɔde ne ho korakora; nea ɔpɛ biara otumi yɛ. Onyankopɔn Asɛm ka sɛ, yɛn ahofadi wɔ baabi a ekosi. Ɛno nti sɛ Yehowa ka biribi a, ɛsɛ sɛ yedi so pɛpɛɛpɛ. Sɛ yɛba abusua mu sei a, Yehowa aka akyerɛ ɔyerenom sɛ wɔmmrɛ wɔn ho ase nhyɛ wɔn kununom ase. Mmofra nso, ɔka sɛ wɔmmrɛ wɔn ho ase mma wɔn awofo. (Efe. 5:22; 6:1) Esiane sɛ ɛnyɛ biribiara na yɛwɔ kwan sɛ yɛyɛ nti, ɔkwan bɛn so na ɛsɛ sɛ yɛde yɛn ahofadi no yɛ adwuma? Sɛ yebenya nkwa oo, yɛrennya nkwa oo, sɛnea yɛde yɛn ahofadi bɛyɛ adwuma no na ɛbɛkyerɛ.

6. Ma mfatoho fa kyerɛ nea enti a ɛnsɛ sɛ yɛyɛ nea yɛpɛ biara.

⁶ Ahofadi a worentumi nyɛ nea wopɛ deɛ, wohwɛ a ɛyɛ ahofadi? Aane. Ɛyɛ ahofadi! Adɛn nti na yɛreka saa? Efisɛ ɛbɔ nnipa ho ban. Ma yɛnyɛ mfatoho bi. Yɛwɔ kwan sɛ yɛde kar kɔ baabiara a yɛpɛ. Nanso, fa no sɛ wonam kwantempɔn bi a kar redi akɔneaba hwiihwii wɔ so so, nea obiara pɛ na ɔfa. Wohwɛ a dɛn na ebetumi asi? Ɛrenyɛ asɛm papa koraa! Wei kyerɛ sɛ, yehia akwankyerɛ na ama ahofadi a  Onyankopɔn de ama yɛn no, yɛanya so mfaso. Sɛ yɛhwɛ Bible mu nso a, yehu sɛ yɛde ahofadi a Yehowa de ama yɛn no yɛ adwuma yiye a, yenya so mfaso kɛse. Momma yɛnhwɛ bi.

7. (a) Nsonsonoe bɛn na na ɛwɔ Adam ne mmoa mu wɔ Eden turom hɔ? (b) Sɛn na Adam de n’ahofadi yɛɛ adwuma?

⁷ Bere a Onyankopɔn bɔɔ Adam, onipa a odi kan no, ɔde ne pɛ maa no sɛnea ɔyɛɛ abɔfo no ara. Wei maa no yɛɛ soronko wɔ mmoa ho efisɛ mmoa deɛ, wɔn awosu na ɛkyerɛ wɔn kwan. Adam nso de n’ahofadi no yɛɛ adwuma pa. Onyankopɔn bɔɔ mmoa no, ɔno ara antoto mmoa no din. Ná ɔpɛ sɛ Adam ani gye enti ɔde “wɔn brɛɛ onipa no sɛ ɔnhwɛ ntoto wɔn nyinaa din.” Adam hwɛɛ sɛnea aboa biara te, na ɔmaa no edin a ɛfata no. Anka Yehowa betumi asesa mmoa no bi din nso wanyɛ saa. Mmom, “edin biara a onipa no de frɛɛ ɔkra a ɛte ase biara no, ɛno ara na ɛbɛyɛɛ ne din.”​—Gen. 2:19.

8. Adam de n’ahofadi yɛɛ adwuma sɛn, na dɛn na akɔfa aba?

⁸ Onyankopɔn san maa Adam adwuma foforo. Ɔno na na ɔbɛhwɛ turom hɔ ne mmoa no. Ɔka kyerɛɛ no sɛ: “Monwo na monnɔɔso na monhyɛ asase so mã na munni so, na . . . mpataa . . . ntuboa ne mmoa a wɔnenam asase so nyinaa, munni wɔn so.” (Gen. 1:28) Nanso awerɛhosɛm ne sɛ, ne nyinaa anyɛ Adam fɛ. Mmom obuu Onyankopɔn mmara so dii aduaba a na wabara sɛ mma onni no. Adam ahofadi a wamfa anni dwuma yiye nti, efi tete besi nnɛ, ɔhaw ne abɛbrɛsɛ nko ara na ɔde abɛto n’asefo nyinaa so. (Rom. 5:12) Ɛsɛ sɛ Adam asɛm no pusuw yɛn ma yɛde yɛn ahofadi no yɛ adwuma yiye na yetie Yehowa.

9. Asɛm bɛn na Yehowa ka kyerɛɛ ne man Israel, na dɛn na wɔyɛɛ wɔ ho?

⁹ Adam ne Hawa asoɔden nti, wɔde bɔne ne owu na agyaw wɔn asefo nyinaa. Nanso ahofadi a Onyankopɔn de ama nnipa no deɛ, wannye amfi yɛn nsam. Yɛhwɛ sɛnea ɔne Israelfo no dii a, yehu no saa. Yehowa faa ne somfo Mose so ka kyerɛɛ ɔman no sɛ, wɔpɛ a ɔde wɔn bɛyɛ n’agyapade titiriw. (Ex. 19:3-6) Dɛn na wɔyɛɛ wɔ ho? Wofi wɔn pɛ mu penee so sɛ Onyankopɔn mfa wɔn nyɛ ne man na ɔmfa ne din nto wɔn so. Wɔn nyinaa de nokoro kaa sɛ: “Nea Yehowa aka nyinaa, yɛbɛyɛ.” (Ex. 19:8) Nanso ɔman no amfa wɔn ahofadi no anni dwuma yiye; ankyɛ koraa na wobuu wɔn bɔhyɛ so. Momma yensua biribi mfi saa asɛm yi mu, na yenso ahofadi a yɛwɔ no mu yiye. Yebetumi ayɛ saa a, gye sɛ yɛbata Yehowa ho na yedi ne mmara so.​—1 Kor. 10:11.

10. Henanom nhwɛso na ɛkyerɛ sɛ nnipa a wɔtɔ sin mpo betumi de ahofadi a Onyankopɔn de ama yɛn no ahyɛ no anuonyam? (Hwɛ mfonini a ɛwɔ adesua yi mfiase no.)

¹⁰ Sɛ yɛhwɛ Hebrifo ti 11 a, yebehu Yehowa asomfo 16 bi a wɔde ahofadi a Onyankopɔn de maa wɔn no yɛɛ adwuma yiye. Ɛno maa wonyaa nhyira pii. Daakye nso, wobenya nkwa. Wɔn mu baako ne Noa. Ná ɔwɔ gyidi kɛse paa wɔ Onyankopɔn mu, na ɔyeree ne ho dii Onyankopɔn mmara so pɛpɛɛpɛ. Onyankopɔn ka kyerɛɛ no sɛ ɔnyɛ adaka na ama ɔne n’abusua ne nnipa foforo anya nkwa. (Heb. 11:7) Abraham ne Sara nso yii wɔn yam tiee Onyankopɔn asɛm, na wɔkɔɔ asase a Onyankopɔn de ahyɛ wɔn bɔ no so. Bere mpo a wosii mu retwa kwan tenten yi no, na wɔwɔ ‘hokwan sɛ wɔsan kɔ’ Ur kurow a emu nnipa di yiye no mu. Nanso gyidi nti wɔde wɔn ani sii Onyankopɔn “bɔhyɛ ahorow no mmamu” so; ‘wɔhwehwɛɛ baabi a eye kyɛn so.’ (Heb. 11:8, 13, 15, 16) Mose dan n’akyi kyerɛɛ nneɛma pa a na ɛwɔ Egypt no, na “ɔpawee sɛ ɔbɛma wɔatan ɔne Onyankopɔn nkurɔfo ani mmom  sen sɛ obenya bɔne mu anigye bere tiaa bi.” (Heb. 11:24-26) Momma yensuasua tetefo yi gyidi na yɛmfa ahofadi a Onyankopɔn de ama yɛn no nyɛ n’apɛde.

11. (a) Ahofadi a Onyankopɔn de ama yɛn no, ɛso mfaso kɛse baako ne sɛn? (b) Dɛn na ɛkanyan wo ma wode ahofadi a Onyankopɔn de ama wo no yɛ adwuma yiye?

¹¹ Ɛwom obiara nyae a, na anka obi asi ne gyinae nyinaa ama no. Nanso sɛ yɛyɛ saa a, ɛremma yennya ahofadi a Onyankopɔn de ama yɛn no so mfaso biara. Yebehu ɛso mfaso kɛse no wɔ Deuteronomium 30:19, 20. (Kenkan.) Nkyekyɛm 19 ka nea Onyankopɔn de sii Israelfo no anim. Nkyekyɛm 20 ma yehu sɛ Yehowa maa wɔn nea wobegyina so ada nea ɛwɔ wɔn komam adi akyerɛ no. Yɛn nso yɛpɛ a, yɛbɛsom Yehowa anaa yɛrensom no. Biribiara nni hɔ a ɛkyɛn sɛ yebegyina ahofadi a Onyankopɔn de ama yɛn no so akyerɛ sɛ yɛdɔ no, na yɛpɛ sɛ yedi no ni na yɛhyɛ no anuonyam!

12. Ahofadi a Onyankopɔn de ama yɛn no, dɛn na ɛnsɛ sɛ yɛde yɛ da?

¹² Fa no sɛ wode biribi a ɛsom bo akyɛ w’adamfo bi. Sɛ wote sɛ watow akyɛde no akyene anaa mpo ɔde apira obi a, wunnye nni sɛ ɛbɛhaw wo paa! Ɛnde hwɛ sɛnea Yehowa nso bɛte nka bere a ohu sɛ nnipa pii mfa ahofadi a ɔde ama wɔn no nyɛ adepa na mmom wɔde pira nnipa foforo no. Anokwa, nea Bible kae no ara na abam no, “nna a edi akyiri” mu no, nnipa bɛyɛ “bonniayɛfo.” (2 Tim. 3:1, 2) Momma yɛnyere yɛn ho na yɛammu ahofadi a Yehowa de ama yɛn no adewa anaa yɛamfa anyɛ adebɔne. Ɛnde dɛn na ɛsɛ sɛ yɛyɛ na yɛamfa ahofadi a Onyankopɔn de ama yɛn no anyɛ adebɔne?

13. Ade baako bɛn na yɛyɛ a, ɛbɛma yɛde ahofadi a Onyankopɔn de ama yɛn no ayɛ adebɔne?

¹³ Yɛn nyinaa Onyankopɔn de yɛn pɛ ama yɛn. Enti yɛwɔ hokwan sɛ yɛpaw nnamfo a yɛpɛ, yɛhyɛ atade anaa yesiesie yɛn ho sɛnea yɛpɛ, na saa ara nso na yebetumi apaw anigyede biara a yɛpɛ. Nanso sɛ yɛtena ase ma yɛn honam akɔnnɔ anaa yedi aniwude a wiase no hyɛ ho nkuran akyi a, yɛde yɛn ahofadi no bɛyɛ “bɔne nkataanim.” (Kenkan 1 Petro 2:16.) Sɛ́ anka yɛde yɛn ahofadi no ‘bɛyɛ nnyinasode ama ɔhonam’ no, ɛsɛ sɛ yɛyere yɛn ho sisi gyinae a ɛbɛboa yɛn ama yɛatie afotu yi: ‘Monyɛ nneɛma nyinaa  mfa nhyɛ Onyankopɔn anuonyam.’​—Gal. 5:13; 1 Kor. 10:31.

14. Sɛ yɛde yɛn ho to Yehowa so a, sɛn na yɛde yɛn ahofadi no bɛyɛ adwuma?

¹⁴ Ɔkwan baako a yebetumi afa so abɔ ahofadi a Onyankopɔn de ama yɛn no ho ban ne sɛ yɛde yɛn ho bɛto Yehowa so na yɛadi n’akwankyerɛ nyinaa so. Ɔno nko ara ne yɛn Nyankopɔn, ‘Nea ɔkyerɛ yɛn ade a eye ma yɛn, Nea ogya yɛn fa ɔkwan a ɛsɛ sɛ yɛfa so no so.’ (Yes. 48:17) Ɛsɛ sɛ yefi ahobrɛase mu gye kyerɛwsɛm yi tom: “Ɔdesani kwan nni ne nsam. Enni onipa nsam, sɛnea ɔnam a obetutu n’anammɔn.” (Yer. 10:23) Adam ne Israelfo no de wɔn ho too wɔn ankasa ntease so na ɛmaa wɔtew Onyankopɔn so atua. Ɛnsɛ sɛ yesuasua wɔn. Mmom, ‘momma yɛmfa yɛn koma nyinaa nto Yehowa so.’​—Mmeb. 3:5.

15. Dɛn na yesua fi nnyinasosɛm a ɛwɔ Galatifo 6:5 no mu?

¹⁵ Biribi wɔ hɔ a yɛrentumi mfa yɛn ahofadi no nyɛ; ɛnsɛ sɛ yesi gyinae ma obiara. Ɛsɛ sɛ yɛma obiara kwan ma osi n’ankasa gyinae. Adɛn ntia? Esiane sɛ Onyankopɔn de obiara pɛ ama no nti, ɛrentumi mma da sɛ Kristofo mmienu adwene behyia wɔ biribi ho bere nyinaa. Sɛ yɛba abrabɔ mu anaa Onyankopɔn som mu a, saa na ɛte. Kae Bible nnyinasosɛm a ɛwɔ Galatifo 6:5 no. (Kenkan.) Sɛ yegye tom sɛ ɛsɛ sɛ Kristoni biara “soa n’ankasa adesoa” a, yɛbɛma kwan ama Kristoni biara de ahofadi a Onyankopɔn de ama no no ayɛ adwuma.

16, 17. (a) Asɛm bɛn na ɛsɔree wɔ Korinto asafo no mu? (b) Dɛn na Paulo yɛe de siesiee asɛm no, na dɛn na ɛma yehu fa ahofadi a obiara wɔ no ho?

¹⁶ Nneɛma bi wɔ hɔ a ɛsɛ sɛ yɛma obiara kwan ma ɔde n’ahonim yɛ adwuma. Yɛnhwɛ Bible nhwɛso bi. Ɛbɛma yɛahu nea enti a ɛsɛ sɛ yɛma yɛn nuanom kwan ma wɔde ahofadi a Onyankopɔn de ama wɔn no yɛ adwuma. Kristofo a na wɔwɔ tete Korinto no, na wɔn adwene nhyia wɔ nam a wɔakum ama abosom a akyiri yi na wɔkɔtɔn wɔ gua so no ho. Ebinom kaa sɛ: ‘Esiane sɛ ɔbosom nyɛ hwee nti, wobetumi awe nam no a wɔn ahonim renhaw wɔn.’ Nanso wɔn a na wɔasom abosom pɛn no deɛ, na wosusuw sɛ sɛ wɔwe nam no a, ɛbɛkyerɛ sɛ wɔresom abosom. (1 Kor. 8:4, 7) Ná ɛyɛ asɛnkɛse paa; anka ɛreyɛ de mpaapaemu aba asafo no mu. Dɛn na Paulo yɛe de boaa Kristofo a na wɔwɔ Korinto no ma wonyaa Onyankopɔn adwene wɔ asɛm no ho?

¹⁷ Nea edi kan no, Paulo maa wɔn nyinaa tee ase sɛ ɛnyɛ aduan na ɛbɛma wɔanya Onyankopɔn anim dom. (1 Kor. 8:8) Afei ɔbɔɔ wɔn kɔkɔ sɛ, ɛnsɛ sɛ wɔma ‘tumi a wɔwɔ sɛ wɔyɛ nea wɔn ankasa pɛ no to wɔn a wɔyɛ mmerɛw no hintidua.’ (1 Kor. 8:9) Akyiri yi, ɔka kyerɛɛ wɔn a wɔn ahonim yɛ mmerɛw no sɛ ɛnsɛ sɛ wobu Kristofo a wɔwe nam a wɔakum ama abosom no atɛn. (1 Kor. 10:25, 29, 30) Wei yɛ asɛm a na ɛfa ɔsom ho, enti na ɛsɛ sɛ Kristoni biara de n’ahonim yɛ adwuma na osi asɛm no ho gyinae. Ɛnde yɛn nso, ɛsɛ sɛ yɛkyerɛ sɛ yebu gyinae biara a yɛn nuanom besisi wɔ nneɛma nketenkete ho mpo no.​—1 Kor. 10:32, 33.

18. Wobɛyɛ dɛn akyerɛ sɛ w’ani gye ahofadi a Onyankopɔn de ama wo no ho?

¹⁸ Yehowa de obiara pɛ ama no, na ama yɛanya ahofadi ankasa. (2 Kor. 3:17) Yɛn ani gye akyɛde yi ho efisɛ ɛma yetumi sisi gyinae ma Yehowa hu sɛ yɛdɔ no. Ɛmmra sɛ yɛbɛkɔ so akyerɛ akyɛde kɛse yi ho anisɔ na yɛde ahyɛ Onyankopɔn anuonyam. Afei nso, ɛsɛ sɛ yɛkyerɛ obu ma sɛnea obiara de n’ahofadi no bɛyɛ adwuma.