Ɛwom sɛ Kristofo betumi ayɛ biribi de abɔ wɔn ho ban deɛ, nanso ɛsɛ sɛ wɔde Bible nnyinasosɛm yɛ adwuma. Bible ma yehu sɛ ɛnsɛ sɛ yɛde akode bi te sɛ tuo bɔ yɛn ho ban fi nnipa ho. Yɛnhwɛ nsɛm a edidi so yi:

Yehowa bu nkwa sɛ ɛsom bo, titiriw nnipa nkwa. Ná odwontofo Dawid nim sɛ Yehowa ne “nkwa nsuti.” (Dw. 36:9) Enti sɛ Kristoni bi yɛ n’adwene sɛ ɔbɛyɛ biribi de abɔ ɔno anaa n’agyapade ho ban a, ɛsɛ sɛ ɔyɛ nea obetumi biara sɛ ɔrenni awu na wanni mogya ho fɔ.​—Deut. 22:8; Dw. 51:14.

Ɛwom, ade biara a obi de bɛbɔ ne ho ban no betumi ama wadi mogya ho fɔ. Nanso sɛ obi wɔ tuo a, ɛnyɛ den koraa sɛ obekum nipa; ebi mpo a na wanhyɛ da. * Afei nso, ebia ɔbɔnefo a ɔreba no ani so ayɛ krakra. Enti sɛ ohu sɛ onii a ɔrekɔ ne so no kura tuo a, ebetumi ama nneɛma agye nsam ama obi ahwere ne nkwa.

Anadwo a etwa to a Yesu rebewu no, ɔka kyerɛɛ n’asuafo no sɛ wɔnkɔpɛ nkrante. Ná ɛnyɛ n’adwene ne sɛ wɔde bɛbɔ wɔn ho ban. (Luka 22:36, 38) Mmom, na Yesu pɛ sɛ ɔde nkrante no kyerɛ wɔn biribi. Ná ɔpɛ sɛ ɔkyerɛ wɔn sɛ, sɛ nkurɔfo a wokura akode  ba wɔn so mpo a, ɛnsɛ sɛ wɔyɛ basabasa. (Luka 22:52) Bere a Petro de nkrante twaa ɔsɔfo panyin no akoa aso no, Yesu ka kyerɛɛ Petro sɛ: “San fa wo nkrante no hyɛ nea ɛhyɛ.” Afei Yesu kaa nokwasɛm bi a ɛho hia paa. Saa asɛm no na n’akyidifo de ayɛ adwuma abesi nnɛ. Ɔkae sɛ: “Wɔn a wɔtwe nkrante nyinaa bewu nkrante ano.”​—Mat. 26:51, 52.

Sɛnea Mika 4:3 ka no, Onyankopɔn nkurɔfo ‘de wɔn nkrante ayɛ nsɔw na wɔde wɔn mpeaw ayɛ kantankrankyi.’ Wei na ɛma yehu sɛ wɔyɛ nokware Kristofo. Ɛne ɔsomafo Paulo asɛm yi hyia: “Mommfa bɔne nntua obiara bɔne so ka. . . . Sɛ ɛbɛyɛ yiye a, mo fam de, mo ne nnipa nyinaa ntena asomdwoe mu.” (Rom. 12:17, 18) Paulo hyiaa ɔhaw pii. Ebi ne sɛ ohyiaa ‘asiane wɔ akwanmukafo’ anaa akorɔmfo nsam. Ne nyinaa akyi no, ɔde ɔno ara n’asɛm a ɔkae yɛɛ adwuma. Wamfa Bible nnyinasosɛm anto nkyɛn anyɛ biribi amfa ammɔ ne ho ban. (2 Kor. 11:26) Mmom, ɔde ne ho too Onyankopɔn ne n’Asɛm so. Ná onim sɛ nyansa a ɛwɔ Onyankopɔn Asɛm mu no “ye sen akode.”​—Ɔsɛnk. 9:18.

Kristofo bu nkwa sɛ ɛsom bo koraa sen honam fam nneɛma. “Ɛnyɛ nneɛma a [onipa wɔ] no mu na ne nkwa fi.” (Luka 12:15) Enti sɛ Kristofo ne akorɔmfo werɛmfo kasa odwo so na anyɛ yiye a, nyansa wom sɛ wɔde Yesu afotusɛm yi yɛ adwuma: “Mo ne ɔbɔnefo nnni asi.” Ebia ebehia sɛ yɛde yɛn atade nhyɛase ne yɛn atade nguguso mpo ma no. (Mat. 5:39, 40; Luka 6:29) * Nea ɛbɛboa paa ne sɛ yɛrenyɛ biribi a ɛbɛma nnipabɔnefo adwene aba yɛn so. Sɛ yɛamfa yɛn ‘asetena mu nneɛma anhoahoa yɛn ho,’ na nkurɔfo nim yɛn sɛ Yehowa Adansefo a wɔpɛ asomdwoe a, ebia nsɛmmɔnedifo remfa wɔn ani nsi yɛn so.​—1 Yoh. 2:16; Mmeb. 18:10.

Kristofo kyerɛ obu ma afoforo ahonim. (Rom. 14:21) Sɛ ɛbɛda adi sɛ asafo no muni bi wɔ tuo a ɔde bɔ ne ho ban fi nnipa ho a, anhwɛ a anuanom bi ho bedwiriw wɔn paa anaa ɛbɛto wɔn hintidua mpo. Sɛ mmara ma kwan sɛ yenya tuo mpo a, ɔdɔ nti yebedwen yɛn nuanom ho na yɛanyɛ biribi a ɛbɛhaw wɔn ahonim.​—1 Kor. 10:32, 33; 13:4, 5.

Kristofo bɔ mmɔden sɛ wɔbɛyɛ nhwɛso pa. (2 Kor. 4:2; 1 Pet. 5:2, 3) Sɛ Kristoni bi wɔ tuo a ɔde bɔ ne ho ban fi nnipa ho a, wɔde Kyerɛwnsɛm no betu no fo. Nanso sɛ wantie a, yebebu no sɛ ɔnyɛ nhwɛso pa. Enti ɔremfata mma ɔsom hokwan anaa asɛyɛde titiriw biara wɔ asafo no mu. Bio, sɛ Kristoni bi kɔ so yɛ adwuma a ɛma okura tuo a, ɔno nso remfata mma ɔsom hokwan anaa asɛyɛde titiriw biara wɔ asafo no mu. Ɛbɛyɛ papa sɛ ɔhwehwɛ adwuma foforo. *

Nea Kristoni bɛyɛ de abɔ ɔno, n’abusua, anaa n’agyapade ho ban no yɛ n’ankasa asɛm. Saa ara na adwuma a ɔpɛ sɛ ɔyɛ nso te. Nanso, Bible nnyinasosɛm ma yehu sɛ Onyankopɔn dɔ yɛn na ɔwɔ nyansa. Enti Kristofo a wɔn ho akokwaw de saa nnyinasosɛm yi yɛ adwuma, na wɔmfa tuo mmɔ wɔn ho ban mfi nnipa ho. Wonim sɛ, wɔn a wɔde wɔn ho to Onyankopɔn so na wɔde Bible nnyinasosɛm bɔ wɔn bra no benya ahobammɔ daa.​—Dw. 97:10; Mmeb. 1:33; 2:6, 7.