Afe 2011 asasewosow a esii Lorca kurom wɔ Spain anafo fam a ekunkum nnipa nkron maa bebree nso pirapirae no, nyansahufo bi gye di sɛ nnipa nneyɛe bi na ɛbɛyɛ sɛ ɛkɔfa bae. Wɔn a wɔhwehwɛɛ asɛm no mu no hui sɛ nkurɔfo atutu nsu pii wɔ mmeae bi a wɔde gugu mfuw so, na ɛbɛyɛ sɛ ɛno na ɛkɔfaa asasewosow no bae.

Sika a Chinafo de tutuu akwan kɔhwehwɛɛ aman foforo so wɔ afe 2012 mu no, ano si Amerika dɔla ɔpepepem 102. Amanaman Nkabom no nkorabata a ɛhwɛ akwantu ho nsɛm so no ka sɛ, sika puduo yi ma yehu sɛ, sɛ yɛreka akwantu a ɛte saa a, China twaa ɔman biara; Germany ne United States mpo mma. Eyi ne bere a edi kan a China ayɛ biribi saa. Sika a Germany ne Amerikafo de tutuu akwan no, wɔkyerɛ mu sɛ ɔman biara deɛ ano si Amerika dɔla ɔpepepem 84.

Amanneɛbɔ bi a wɔde too dwa wɔ Britain kowaa krataa bi a yɛfrɛ no BMJ mu kyerɛ sɛ, animdefo bi de mfe 23 ahwɛ Japan man no mu nnipa bɛyɛ 68,000 abrabɔ. Nea ɛbɛtɔɔ dwa ne sɛ, mmea a yɛwoo wɔn afe 1920 ne 1945 ntam no, sɛ yɛka wɔn nyinaa bom a, wɔn a wɔnom sigaret ansa na wɔredi mfe 20 no, wɔn nkwa so tee mfe du; mmarima nkwa so tee mfe nwɔtwe.

Aban ahyɛ mmara sɛ obiara nni kwan sɛ ɔyɛ rɔba bag, anaa ɔkra bi anaa ɔde yɛ biribiara wɔ ɔman no mu. Wɔkyerɛ mu sɛ, sɛ mmoa a wɔwɔ po mu ne mmoa a wɔnenam asase so no we rɔba bag no bi a, esiane sɛ entumi nyam nti, wobɛhwɛ na akunkum wɔn. Enti seesei aban de ato ɔmanfo anim sɛ, nneɛma a anka wɔde rɔba bag bɛyɛ no, wɔmfa ade a etumi porɔ nyɛ.

Yɛka ne nyinaa bom a, atoyerɛnkyɛm ma nsiakyibaa (insurance) adwumakuw no bɔ ka Amerika dɔla no ɔpepepem 50 afe biara. Yɛahwɛ mu ahu sɛ efi afe 1980 reba no, sɛ adwumakuw no de nneɛma boɔ a ɛkɔ soro no nyinaa ka ho a, ɛka a wɔbɔ no bu bɔ ho koraa mfe du biara.