Sɛnea Yebetumi Adi Yɛn Nkate So

ƐTƆ da a atenka bɔne hyɛ wo so? Ɛyɛ a ɛnkyɛ na nsɛm haw wo, na wo bo afuw, anaa w’abam abu? Asetra mu dadwen tumi hyɛ wo so? Dɛn na ɛbɛboa wo?

Nkate ahorow mpa nnipa asetra mu. Sɛ obi hu sɛnea wodi nkate so yiye a, ɛde anigye ba n’asetra mu. Ɛwom, Bible no gye tom sɛ “amimyɛ bɔ onyansafo dam.” (Ɔsɛnkafo 7:7) Wɔ wiase a nsɛmmɔnedi ne akwanhyia adɔɔso wom yi mu no, hena na obetumi aka sɛ nea ɛrekɔ so no nka no? Nanso Kyerɛwnsɛm no san ka sɛ: “Adepa bi nni hɔ gye sɛ onipa ani gye ne nnwuma mu.” (Ɔsɛnkafo 3:22) Enti sɛ yebenya abrabɔ mu anigye a, ɛsɛ sɛ yesua sɛ yɛde yɛn adwene besi nneɛma pa so. Yɛbɛyɛ dɛn ahu sɛnea yeyi atenka pa adi na ama yɛakwati atenka bɔne?

Sɛ yɛyɛ nneɛma a mfaso wɔ so a, ɛtaa brɛ atenka bɔne no ase. Sɛ nhwɛso no, sɛ nsɛm bi a yentumi nyɛ ho hwee ho dadwen haw yɛn a, ɛrenyɛ papa mmom sɛ yɛbɛsakra yɛn akwan mu anaa yɛn atrae sen sɛ yɛbɛma ɔhaw no ahyɛ yɛn so? Mpase a yebetu, nnwom a edwudwo koma a yebetie, yɛn apɔw mu a yɛbɛteɛteɛ, anaa obi a ahia no a yɛbɛyɛ no adɔe betumi ama yɛn ho atɔ yɛn na yɛanya anigye nso.—Asomafo Nnwuma 20:35.

Nanso ɔkwan a eye koraa a yebetumi afa so atu adwemmɔne ne sɛ yɛde yɛn werɛ bɛhyɛ Ɔbɔadeɛ no mu. Sɛ nsusuwii bɔne no kɔ so a, ɛsɛ sɛ yɛfa mpaebɔ so ‘tow yɛn dadwen nyinaa gu Onyankopɔn so.’ (1 Petro 5:6, 7) Bible no ma yɛn awerɛhyem sɛ: ‘Yehowa bɛn wɔn a wɔn koma abubu. Ɔtreneeni amane dɔɔso, na Yehowa gye no ne nyinaa mu.’ (Dwom 34:18, 19) Yɛbɛyɛ dɛn atumi anya awerɛhyem sɛ Onyankopɔn betumi ayɛ yɛn ‘boafo ne yɛn Gyefo’? (Dwom 40:17) Ɔkwan a yebetumi afa so ayɛ eyi ne sɛ yebesua Bible no na yɛasusuw emu nhwɛso a ɛkyerɛ sɛnea Onyankopɔn ani kũ n’asomfo ho no ho.