Wubetumi Akɔsom wɔ Baabi a Wohia Ahenni Adawurubɔfo Pii?

“Ná yedi yiye wɔ United States, nanso yehui sɛ sɛnea nkurɔfo di honam fam nneɛma akyi wɔ hɔ no betumi anya yɛne yɛn mmabarima baanu no so nkɛntɛnso bɔne. Ná me ne me yere asom sɛ asɛmpatrɛwfo pɛn, na na yɛpɛ sɛ yɛsan yɛ yɛn ho awiɛmfoɔ na yenya anigye a na yɛwɔ saa bere no bio.”

ƆPƐ a Ralph ne Pam nyae no kanyan wɔn ma wɔ afe 1991 mu no, wɔyɛɛ wɔn adwene sɛ wɔbɛkyerɛw baa dwumadibea ahorow aka akyerɛ wɔn sɛ wɔpɛ sɛ wɔkɔsom wɔ baabi a wohia Ahenni adawurubɔfo pii. Baa dwumadibea a ɛwɔ Mexico no kyerɛw wɔn sɛ wohia Ahenni adawurubɔfo a wobetumi aka asɛm no akyerɛ nnipa a wɔka Borɔfo kasa wɔ saa ɔman no mu denneennen. Nokwarem no, baa dwumadibea no kae sɛ na saa asasesin no “ahoa sɛ wotwa.” (Yoh. 4:35) Ankyɛ koraa na Ralph ne Pam ne wɔn mmabarima a wɔadi mfe 8 ne 12 no penee so sɛ wɔbɛkɔ, enti wofii ase yɛɛ ahoboa sɛ wobetu akɔ ɔman foforo so.

Asasesin Kɛse Bi

Ralph ka sɛ: “Ansa na yɛrefi United States no, anuanom mmarima ne mmea a wɔpɛ yɛn asɛm binom ka kyerɛɛ yɛn sɛ: ‘Obi man so tena yɛ hu dodo!’ ‘Na sɛ woyare nso ɛ?’ ‘Dɛn nti na ɛsɛ sɛ wutu kɔ baabi kɔka asɛm no kyerɛ wɔn a wɔka Borɔfo kasa? Ɛnyɛ ade a nnipa a wɔka Borɔfo kasa wɔ hɔ no ani begye nokware no ho!’ Nanso, na yɛayɛ yɛn adwene sɛ yɛbɛkɔ. Efisɛ na yɛasusuw ho yiye ahu sɛ yɛasi gyinae pa. Ná yɛde mfe pii na ayɛ ho nhyehyɛe. Ɛno nti yɛamfa ɛka a ebegye bere tenten ansa na yɛatua awie anto yɛn ho so, yesiee sika, na yɛn abusua no susuw nsɛnnennen a yebetumi ahyia nso ho mpɛn pii.”

Ralph ne n’abusua dii kan kɔɔ Mexico baa dwumadibea. Anuanom a wɔwɔ hɔ no de ɔman mũ no nyinaa asase mfonini kyerɛɛ wɔn, na wɔka kyerɛɛ wɔn sɛ, “Mo asasesin ni!” Ralph ne n’abusua kɔtenaa San Miguel de Allende. Ɛyɛ kurow bi a emu nnipa pii fi aman horow so, na efi Mexico City atifi fam atɔe rekɔ hɔ yɛ kilomita 240. Bere a wɔkɔɔ hɔ akyi mfe abiɛsa no, wɔtew asafo a wɔka Borɔfo kasa a emufo yɛ adawurubɔfo 19 wɔ saa kurow no mu. Ná ɛno ne asafo a edi kan wɔ Mexico a wɔka Borɔfo kasa, nanso na adwuma pii da so ara wɔ hɔ.

Wɔkyerɛ sɛ United States ɔmamma bɛyɛ ɔpepem biako na wɔte Mexico. Bio nso, Mexicofo a wɔyɛ nhomanimfo ne sukuufo pii wɔ hɔ a wɔte Borɔfo kasa ka wɔn ankasa kasa ho.  Ralph ka sɛ: “Yɛbɔɔ mpae sɛ adwumayɛfo pii mmra hɔ. Bere nyinaa na yegyaw ɔdan biako to hɔ ma anuanom a wɔba baabi a yɛwɔ sɛ ‘wɔrebɛhwɛ sɛnea asase no te’ no.”—Num. 13:2.

Wɔyɛɛ Wɔn Ho Awiɛmfoɔ De Nyaa Bere Pii Kaa Asɛm No

Ankyɛ na anuanom mmarima ne mmea bebree a wɔpɛ sɛ wɔde wɔn bere pii ka asɛm no bae. Ná Bill ne Kathy a wofi United States ka wɔn ho. Ná wɔde mfe 25 asom wɔ mmeae a wohia adawurubɔfo pii dedaw. Ná wɔredwen ho mpo sɛ wobesua Spania kasa, nanso bere a wotu kɔɔ Ajijic a ɛwɔ Ɔtare Chapala ho a ɛyɛ baabi a ɛhɔ dwo na nkurɔfo a wofi United States a wɔakɔ pɛnhyen ani gye hɔ asetena ho no, wɔn adwene sesae. Bill ka sɛ, “Yɛyeree yɛn ho hwehwɛɛ wɔn a wɔka Borɔfo kasa a na wɔpɛ sɛ wosua nokware no wɔ Ajijic no.” Bere a Bill ne Kathy kɔɔ kurom hɔ no, wɔtew asafo wɔ hɔ wɔ mfe abien ntam. Ná ɛno ne asafo a ɛto so abien wɔ Mexico a wɔka Borɔfo kasa.

Ná Ken ne Joanne a wofi Canada no pɛ sɛ wɔyɛ wɔn ho awiɛmfoɔ na wɔde bere pii ka asɛm no. Wɔn nso tu kɔtenaa Mexico. Ken ka sɛ: “Egyee bere ansa na yɛretumi ahu baabi a ɛtɔ mmere bi a wunnya nsuhyew ne anyinam ahoɔden, na telefon nso nyɛ adwuma wɔ hɔ asetena.” Nanso sɛ yɛkɔ asɛnka a, na yɛn ani gye. Ankyɛ na wɔpaw Ken sɛ asafo mu somfo, na mfe abien akyi no, wɔpaw no sɛ ɔpanyin. Mfiase no, na ɛyɛ den ma wɔn babea Britanny sɛ n’ani bɛka asafo ketewa a wɔka Borɔfo kasa a mmabun pii nni mu no mu. Nanso, bere a ɔde ne ho hyɛɛ Ahenni Asa a wɔresisi mu no, onyaa nnamfo pa pii wɔ ɔman no mu nyinaa.

Patrick ne Roxanne a wofi Texas a ɛwɔ United States ani gyei sɛ wɔtee sɛ asɛmpatrɛw asasesin bi bɛn hɔ a nnipa a wɔwɔ hɔ no ka Borɔfo kasa. Patrick ka sɛ, “Bere a yɛkɔɔ Monterrey a ɛyɛ kurow bi a ɛwɔ Mexico atifi fam apuei mu no, yehui sɛ Yehowa reka akyerɛ yɛn sɛ yɛnkɔboa wɔ hɔ.” Wotumi tɔnee wɔn dan a na wɔwɔ wɔ Texas no wɔ nnanum ntam, na sɛ yɛbɛka a, ‘wotwa kɔɔ Makedonia.’ (Aso. 16:9) Mexico asetena yɛ den ma wɔn, nanso wɔ mfe abien pɛ ntam no, wohuu sɛnea Adansefo kakra a wɔyɛ 17 a wɔwɔ hɔ no bɛyɛɛ asafo a emu adawurubɔfo yɛ 40.

Jeff ne Deb yɛ awarefo foforo a wɔyɛɛ wɔn ho awiɛmfoɔ de wɔn bere pii kaa asɛm no. Wɔtɔn wɔn dan kɛse a ɛwɔ United States, na wotu kɔtenaa ɔdan ketewaa bi mu wɔ Cancún a ɛyɛ kurow bi a ɛwɔ Mexico apuei fam mpoano. Bere bi a atwam no, na wɔtaa kɔ amansin nhyiam wɔ adan a mfiri a ɛma ɔdan mu dwo wom mu, na na wontwa kwantenten nso. Nanso afei de, na ɛsɛ sɛ wotwa kwan nnɔnhwerew awotwe kɔ Borɔfo kasa nhyiam a ɛbɛn wɔn a wɔyɛ wɔ petee mu. Nanso bere a wɔtew asafo a adawurubɔfo a wɔwom yɛ 50 wɔ Cancún no, wɔn ani gyei ankasa.

Anuanom a wofi Mexico no bi nso fii ase de Borɔfo kasa yɛɛ asɛnka adwuma no. Sɛ nhwɛso no, bere a Rubén ne n’abusua tee sɛ wɔatew asafo a wɔka Borɔfo kasa a edi kan wɔ San Miguel de Allende, na Mexico man no  nyinaa yɛ wɔn asafo no asasesin no, ntɛm ara na wɔyɛɛ wɔn adwene sɛ wɔbɛkɔ akɔboa. Ná eyi hwehwɛ sɛ wosua Borɔfo kasa, wosua amammerɛ foforo, na wotwa kwan kilomita 800 nnawɔtwe biara kɔ asafo nhyiam. Rubén ka sɛ: “Yɛn ani gyei sɛ yɛkaa asɛm no kyerɛɛ nkurɔfo a wofi aman foforo so a wɔatena Mexico mfe pii, a na eyi ne bere a edi kan a wɔrete asɛm no wɔ wɔn ankasa kasa mu no. Ebinom de nusu kyerɛɛ ho anisɔ.” Bere a Rubén ne n’abusua boaa asafo a ɛwɔ San Miguel de Allende akyi no, wɔkɔyɛɛ akwampae adwuma wɔ Guanajuato kurow a ɛwɔ Mexico mfinimfini fam no mu. Na wɔboae ma wɔtew asafo a wɔka Borɔfo kasa a emu adawurubɔfo boro 30 wɔ hɔ. Ɛnnɛ, wɔresom wɔ adesua kuw bi a wɔka Borɔfo kasa a ɛwɔ Irapuato, kurow bi a ɛbɛn Guanajuato mu.

Wɔreka Asɛm no Kyerɛ Wɔn a Ɛyɛ Den sɛ Wobenya Wɔn

Ahɔho a wɔte Mexico akyi no, Mexicofo ankasa pii nso te Borɔfo. Mpɛn pii no, ɛyɛ den sɛ wubenya wɔn aka Ahenni no ho asɛm akyerɛ wɔn efisɛ wɔtete asikafo atenae, na sɛ obi bɔ wɔn apon mu a, mmaawa na wobebue. Na sɛ afiewuranom ankasa bebue pon no mpo a, ebia wɔrempɛ sɛ wotie asɛm a yɛreka no efisɛ wosusuw sɛ Yehowa Adansefo yɛ matew-me-ho kuw ketewa bi a ɛwɔ ɔman no mu. Nanso, sɛ Adansefo a wofi aman foforo so ka asɛm no kyerɛ saafo yi a, ebinom tie.

Susuw Gloria a ɔwɔ kurow Querétaro a ɛwɔ Mexico mfinimfini fam no asɛm no ho hwɛ. Ɔkyerɛkyerɛ mu sɛ: “Adansefo a wɔka Spania kasa aba me nkyɛn da nanso mantie wɔn. Nanso, bere a m’abusua ne me nnamfo fii ase  sɛ wɔrehyia ɔhaw no, ɛhaw me paa ma mebɔɔ Onyankopɔn mpae srɛɛ no sɛ ɔmmoa me. Ɛno akyi bere tiaa bi no, ɔbea bi a ɔka Borɔfo kasa baa me fie. Obisae sɛ ebia obi te fie hɔ a ɔte Borɔfo anaa. Esiane sɛ na omfi ɔman no mu nti, na mepɛ sɛ mihu nipa kõ a ɔyɛ, enti meka kyerɛɛ no sɛ mete Borɔfo. Ogu so rekasa no, na mereka wɔ me tirim sɛ, ‘Na dɛn koraa na saa Amerikani bea yi repɛ wɔ me mpɔtam ha?’ Nanso na maka akyerɛ Onyankopɔn sɛ ɔmmoa me. Enti ebia na saa ɔbea yi na Onyankopɔn nam no so rebua me mpaebɔ.” Gloria penee so ma wɔne no yɛɛ Bible adesua, na onyaa nkɔso ntɛmntɛm bɔɔ asu ɛmfa ho sɛ n’abusua sɔre tiaa no no. Ɛnnɛ, Gloria som sɛ daa ɔkwampaefo, na ne kunu ne ne babarima nso som Yehowa.

Wɔn a Wɔde Bere Pii Ka Asɛm no Nya Nhyira

Ɛwom sɛ sɛ wokɔsom wɔ baabi a wohia Ahenni no ho adawurubɔfo pii a wubehyia ɔhaw de, nanso nhyira pii wom. Ralph a yedii kan kaa ne ho asɛm no ka sɛ: “Yɛne nkurɔfo a wofi Britain, China, Jamaica, Sweden, ne Ghanafo a wodi yiye mpo yɛɛ Bible adesua. Saa Bible asuafo yi bi de wɔn ho hyɛɛ bere nyinaa som adwuma no mu. Yɛn abusua no ahu asafo a wɔka Borɔfo kasa ason a wɔatew wɔ mfe du a atwam no mu. Yɛn mmabarima baanu no nyinaa ne yɛn na efii akwampae adwuma no ase, na seesei wɔresom wɔ United States Betel.”

Seesei asafo a wɔka Borɔfo kasa 88 ne adesua akuw pii wɔ Mexico. Dɛn na ama nkɔso aba ntɛmntɛm saa? Nea ɛde aba ne sɛ, ná nnipa a wɔka Borɔfo kasa a wɔwɔ Mexico no mu pii ne Adansefo no nkasae da. Ebinom nso wɔ hɔ a nea ɛma wotiee asɛm no ne sɛ wɔanhyia nhyɛso a sɛ wɔwɔ wɔn man mu a anka ebetumi asiw wɔn kwan a ɛremma wontie asɛm no. Ebinom nso de, esiane sɛ wɔakɔ pɛnhyen na wɔwɔ bere a wɔde besua Bible no nti na wɔpenee so ma wɔne wɔn yɛɛ Bible adesua. Bio nso, adawurubɔfo a wɔwɔ asafo a wɔka Borɔfo kasa mu no bɛboro baasa biara mu biako yɛ ɔkwampaefo, na ɛno nso ka ho bi paa na ɛma asafo no mu yɛ hyew, na ɛde nkɔso a ɛte saa ba asafo ahorow no mu no.

Wubenya Nhyira Pii

Akyinnye biara nni ho sɛ sɛ nnipa a wɔwɔ wiase baabiara te Ahenni no ho asɛm wɔ wɔn ankasa kasa mu a, wɔn mu pii betie no aso pa mu. Enti ɛhyɛ nkuran sɛ yebehu sɛ anuanom mmarima ne mmea—mpanyin ne mmofra, asigyafo ne awarefo—bebree a wɔpɛ sɛ wɔyɛ pii wɔ Yehowa som mu no wɔ ɔpɛ sɛ wobetu akɔ baabi a wohia Ahenni adawurubɔfo pii. Nokwarem no, ebia wobehyia nsɛnnennen, nanso sɛ yɛde nsɛnnennen no toto sɛnea wɔn ani gye bere a wonya nnipa a wɔwɔ koma pa ma wobegye Bible mu nokware tom no ho a, anigye no boro so koraa. So wubetumi ayɛ nsakrae a ebetumi ama woatu akɔtena baabi wɔ w’ankasa wo man mu anaa ɔman foforo a wohia Ahenni adawurubɔfo pii wɔ hɔ? * (Luka 14:28-30; 1 Kor. 16:9) Sɛ saa a, wubetumi anya awerɛhyem sɛ wubenya nhyira pii.

[Ase hɔ asɛm]

[Adaka wɔ kratafa 21]

Pɛnhyenfo a Wɔwɔ Anigye Twetwe Nkurɔfo

Beryl tu fii Britain kɔtenaa Canada. Ɔkɔɔ hɔ no, ɔne amanaman ntam nnwumakuw pii yɛɛ adwuma sɛ adwuma so panyin. Obehuu pɔnkɔ so tena nso yiye paa, na wɔpaw no ma okogyinaa Canada man no ananmu wɔ afe 1980 Olimpik akansi no mu. Bere a Beryl kɔɔ pɛnhyen no, ɔkɔtenaa Chapala a ɛwɔ Mexico, na na ɔtaa ne ne kunu pue kodidi. Sɛ ohu nkurɔfo a wɔakɔ pɛnhyen a wɔka Borɔfo kasa a ɛte sɛ nea wɔn ani agye a, na ɔbɔ ne din kyerɛ wɔn, na afei wabisa wɔn nea wɔreyɛ wɔ Mexico. Ɛkame ayɛ sɛ bere nyinaa na nkurɔfo a wɔde anigye redidi no yɛ Yehowa Adansefo. Beryl ne ne kunu nyaa adwene sɛ sɛ obi hu Onyankopɔn ne nea enti a ɔte ase na ɛma n’ani gye a, ɛnde wɔn nso pɛ sɛ wohu no bi. Bere a Beryl kɔɔ Kristofo nhyiam asram bi no, ɔpenee so sɛ wɔne no nsua Bible no, na ɔbɛyɛɛ Ɔdansefo. Beryl tumi somee sɛ ɔkwampaefo mfe pii.

[Adaka wɔ kratafa 22]

“Wɔboa Yɛn Paa”

Anuanom a wɔwɔ aman a adawurubɔfo tu kɔ hɔ kɔboa Ahenni adwuma no kɛse no ani sɔ wɔn paa. Baa dwumadibea biako a ɛwɔ Caribbean ɔman bi so kyerɛwee sɛ: “Sɛ anuanom a wofi aman foforo so no nni ha a, anka asafo no renyɛ den saa. Wɔboa yɛn paa.”

Onyankopɔn Asɛm ka sɛ “mmea a wɔka asɛmpa no yɛ asafodɔm kɛse.” (Dw. 68:11) Enti ɛnyɛ nwonwa sɛ mmea a wɔyɛ asigyafo pii ka wɔn a wɔresom wɔ amannɔne no ho. Saa anuanom mmea a wɔwɔ ahofama no boa yɛn paa. Baa dwumadibea bi a ɛwɔ Europa Apuei fam kae sɛ: “Anuanom mmea dɔɔso paa wɔ asafo ahorow pii a ɛwɔ ha no mu, na ɛtɔ mmere bi a wɔboro adawurubɔfo dodow a wɔwɔ asafo no mu fã. Wɔn mu dodow no ara huu nokware no nkyɛe, nanso anuanom mmea akwampaefo a wɔyɛ asigyafo a wofi aman foforo so bae no retete saafo a wɔyɛ abɛɛfo no de reboa yɛn paa. Yɛn ani sɔ anuanom mmea a wofi amannɔne bae no paa!”

Anuanom mmea a wɔte saa no te nka dɛn wɔ aman foforo a wɔresom wɔ hɔ no ho? Angelica a ɔyɛ onuawa a wadi bɛyɛ mfe 35 a ɔyɛ osigyani a ɔsomee wɔ amannɔne sɛ ɔkwampaefo mfe pii no ka sɛ, “Ɔhaw a ɛwom no dɔɔso. Wɔ beae bi a mesomee no, da biara da na mefa atɛkyɛ mu, na mihuu nnipa pii a na wɔrehu amane, na na ɛyɛ awerɛhow. Nanso nkurɔfo a meboaa wɔn wɔ asɛnka mu no ma minyaa akomatɔyam. Afei nso, sɛnea na anuanom mmea a wɔwɔ hɔ no taa da me ase sɛ maba hɔ abɛboa wɔn no kaa me koma paa. Onuawa biako ka kyerɛɛ me sɛ sɛnea matu kwantenten aba ne kurom rebɛsom sɛ ɔkwampaefo no na ahyɛ ɔno nso nkuran ma ɔde ne ho ahyɛ bere nyinaa som adwuma no mu.”

Sue a ɔyɛ ɔkwampaefo a wadi bɛyɛ mfe 51 no ka sɛ: “Woyɛ dɛn ara a wubehyia ɔhaw, nanso nhyira a wunya no dɔɔso sen ɔhaw no koraa. Asɛnka adwuma no yɛ dɛ! Esiane sɛ me ne anuanom mmea nkumaa taa kɔ asɛnka nti, meka sɛnea yebetumi agyina tebea a emu yɛ den ano a mahu afi Bible ne yɛn nhoma ahorow mu ho asɛm kyerɛ wɔn. Wɔtaa ka kyerɛ me sɛ sɛnea matumi agyina ɔhaw ano mfe pii a mede ayɛ ɔkwampaefo a onni kunu no aboa wɔn ma wohu sɛ wɔn nso betumi adi nsɛnnennen biara a wohyia wɔ asetena mu no so. Saa anuanom mmea yi a meboa wɔn no ma minya akomatɔyam ankasa.”

[Asase mfonini wɔ kratafa 20]

(Wopɛ nsɛm a wɔahyehyɛ awie no a, hwɛ nhoma no mu)

MEXICO

Monterrey

Guanajuato

Irapuato

Ajijic

Chapala

Ɔtare Chapala

San Miguel de Allende

Querétaro

MEXICO CITY

Cancún

[Mfonini wɔ kratafa 23]

Ebinom ani gye sɛ wɔka asɛmpa no kyerɛ nkurɔfo a wofi aman foforo so a afei na wɔrete asɛmpa no bere a edi kan