Sɛ worebɛyɛ biribi a, ebia asɛm a wobɛbisa ara ne sɛ, ‘Dɛn na mɛnya afiri mu?’ Sɛ obi bisa asɛm sei fa mpaebɔ ho a, ɛyɛ bɔne anaa? Sɛ obi bisa saa a, ɔnyɛɛ bɔne, na mmom ɔpɛ sɛ ɔhu sɛ mpaebɔ bɛtumi aboa no ampa. Bere bi, onipa pa te sɛ Hiob mpo bisaa sɛ: “Sɛ mefrɛ no a, ɔbɛgye me so anaa?”—Hiob 9:16.

Nsɛmti mmiɛnsa a ɛdi wei anim no maa yɛn nnyinasoɔ a ɛkyerɛ sɛ mpaebɔ nyɛ ɔsom mu amanneɛ bi anaa biribi a ɛma yɛnya ahotɔ kɛkɛ. Ɛmaa yɛhuu sɛ nokware Nyankopɔn no tie mpaebɔ. Enti sɛ yɛbɔ mpae wɔ ɔkwampa so na sɛ yɛbisa biribi a ɛne n’apɛdeɛ hyia a, ɔtie yɛn. Ɔno ara mpo ka sɛ yɛmmɛn no. (Yakobo 4:8) Enti, sɛ yɛbɔ mpae daa a, dɛn na yɛbɛnya? Momma yɛnhwɛ mfaso a yɛbɛnya no bi.

Sɛ nneɛma nkɔ yie w’asetena mu a, ɛyɛ a ɛma wo boto anaa? Bible hyɛ yɛn nkuran sɛ mmere a ɛte saa mu no, mma ‘yɛnnnyae mpaebɔ da’ na yɛmfa yɛn “adesrɛ nto Onyankopɔn anim.” (1 Tesalonikafoɔ 5:17; Filipifoɔ 4:6) Bible ka sɛ, sɛ yɛkɔ Onyankopɔn anim wɔ mpaebɔ mu a, ‘Onyankopɔn asomdwoeɛ a ɛboro adwene nyinaa so no bɛbɔ yɛn akoma ne yɛn adwene nsusuiɛ ho ban.’ (Filipifoɔ 4:7) Sɛ yɛka yɛn komam asɛm kyerɛ yɛn soro Agya no a, ɛbɛma yɛn koma atɔ yɛn yam. Yɛn soro Agya no pɛ sɛ yɛdane yɛn haw to no so. Dwom 55:22 ka sɛ: “Dane w’adesoa to Yehowa so, na ɔbɛsɔ wo mu.”

Wokɔ wiase baabiara a, wobɛhu sɛ nnipa bebree wɔ saa asomdwoe no bi. Hee Ran fi South Korea,  na ɔka sɛ: “Ɔhaw a ɛgu me so no, ɛnyɛ ebi ni, nanso sɛ menya bɔ mpae a, mete nka sɛ adesoa bi afiri me so na menya ahoɔden a mede bɛgyina ano.” Cecilia nso fi Philippines, na n’anom asɛm ne sɛ: “Meyɛ ɔbaatan a mewɔ mma mmaa, na me maame nso, ɔnyini ne yareɛ nti ɔhu me mpo a, ɔnkae me. Wei nyinaa ayɛ me adwendwene. Nanso mpaebɔ nti, metumi yɛ biribiara a memmfa adwendwene pii nha me ho. Menim yie sɛ Yehowa bɛboa me ma matumi ahwɛ wɔn.”

Wo haw paa ne sɛn? Woreko yareɛ bi anaa? Anaasɛ asɛnkɛse bi na ato wo? Sɛ wobɔ Yehowa, “awerɛkyekyerɛ nyinaa Nyankopɔn” no mpaeɛ a,  wobɛtumi anya akomatɔyam. Bible ka sɛ: “ɔkyekyere yɛn werɛ yɛn ahohia nyinaa mu.” (2 Korintofoɔ 1:3, 4) Nhwɛso bi ni, bere bi a Yesu kɔɔ ahohia mu no, “ɔbuu nkotodwe firii aseɛ bɔɔ mpaeɛ.” Ɔnyaa mmoa bi anaa? “Ɔbɔfoɔ bi firi soro yii ne ho adi kyerɛɛ no hyɛɛ no den.” (Luka 22:41, 43) Bere bi nso, na ɔnokwafo Nehemia reyɛ Onyankopɔn adwuma, na nnipabɔnefo bi hunahunaa no. Ná wɔpɛ sɛ Nehemia gyae adwuma a ɔreyɛ no, enti Nehemia bɔɔ mpae sɛ: “Mesrɛ wo, hyɛ me nsam den.” Asɛm a ɛsii no ma yɛhu sɛ Onyankopɔn boaa no maa ɔtumi yɛɛ adwuma no, na wamma ehu anni ne so. (Nehemia 6:9-16) Reginald fi Ghana, na ɔno nso kaa sɛ mpaebɔ aboa no. Ɔkaa sɛ: “Sɛ ɔhaw hyɛ me so na mebɔ mpae a, ɛma mete nka sɛ maka me haw akyerɛ obi a ɔbɛtumi aboa me, na ɔma me awerɛhyem sɛ ɛnsɛ sɛ mebɔ hu.” Ampa, sɛ yɛbɔ Onyankopɔn mpae a, ɔbɛtumi akyekye yɛn werɛ.

Gyinae bi wɔ hɔ a yɛsi a, yɛne yɛn adɔfo bɛtwa so aba. Yɛbɛyɛ dɛn asisi gyinae papa? Asɛm bi wɔ Bible mu a sɛ yɛkɔ ahokyerɛ mu a, ɛbɛtumi aboa yɛn. Ɛka sɛ: “Sɛ ɛka mo mu bi nyansa a, ma no nkɔ so ara mmisa Onyankopɔn ɛfiri sɛ ɔyi ne yam ma nnipa nyinaa adeɛ a ahohora biara nnim, na ɔde bɛma no.” (Yakobo 1:5) Sɛ yɛbɔ mpae srɛ Onyankopɔn hɔ nyansa a, ɔde ne honhom no bɛboa yɛn ama yɛasi gyinae pa. Yesu maa yɛn awerɛhyem sɛ: “Agya a ɔwɔ soro no de honhom kronkron bɛma wɔn a wɔbisa no!” (Luka 11:13) Enti yɛbɛtumi abɔ mpae asrɛ sɛ Onyankopɔn mma yɛn honhom kronkron.

Yesu mpo huu sɛ, sɛ ɔrebɛsi gyinae kɛse bi a, ɛsɛ sɛ ɔbɔ n’Agya mpae ma ɔboa no. Bible ma yɛhu sɛ, bere bi a na Yesu pɛ sɛ ɔyi mmarima 12 ma wɔbɛyɛ n’asomafo no, “ɔbɔɔ Onyankopɔn mpaeɛ anadwo mũ no nyinaa.”—Luka 6:12.

Ɛnnɛ, nnipa pii te nka te sɛ Yesu. Sɛ wɔbɔ mpae na wɔhu sɛ Onyankopɔn atie wɔn, na waboa wɔn ama wɔasi gyinae pa a, ɛma wɔn akomatɔyam. Regina wɔ Philippines, na ɔkaa ɔhaw a ɔhyiae ho asɛm: Ne kunu wu gyaa no, n’adwuma nso fii ne nsa, na na ɛsɛ sɛ ɔtete ne mma. Ɛyɛɛ dɛn na ɔtumi sisii gyinae papa? Ɔka sɛ: “Mebɔ Yehowa mpae daa ma ɔboa me.” Kwabena nso wɔ Ghana, na wakyerɛ nea enti a ɔbɔ Onyankopɔn mpae hwehwɛ mmoa. Ɔkyerɛɛ mu sɛ: “Ná meyɛ adansi adwuma bi, na na sika wom paa, nanso adwuma no fii me nsa.” Afei na ɔbɛyɛ ne ho dɛn? Ɔkaa sɛ: “Da biara na mebɔ Yehowa mpae sɛ ɔmmoa me mma mensi gyinae pa.” Ɔtoaa n’asɛm no so sɛ: “Megye di paa sɛ Yehowa na ɔboaa me ma mehuu adwuma a ɛsɛ sɛ meyɛ. Adwuma yi boa me ma menya nea mehia wɔ asetenam, na metumi som Onyankopɔn nso.” Wo nso, sɛ woresi gyinae bi, na wohu sɛ ɛbɛtumi atwitware wo som mu a, wobɛtumi abɔ Onyankopɔn mpae ama waboa wo na woasi gyinae pa.

Nneɛma a mpaebɔ bɛtumi ayɛ ama wo no, emu kakraa bi na yɛaka ho asɛm. (Sɛ wopɛ nea mpaebɔ bɛtumi ayɛ ama wo no ho nsɛm pii a, hwɛ adaka a wɔato din “ Mpaebɔ so Mfaso.”) Nanso sɛ wobɛnya saa mfaso yi a, ɛsɛ sɛ wodi kan hu Onyankopɔn na wohu n’apɛde nso. Sɛ w’ani gye ho a, ɛnneɛ yɛsrɛ wo hwehwɛ Yehowa Adansefo na wɔbɛboa wo ama woasua Bible no. * Sɛ wosua Bible a, na woafiri ase retu anammɔn a ɛbɛma woabɛn “Mpaebɔ Tiefoɔ” no.—Dwom 65:2.