“E ite atura vau i te hoê raˈi apî e te hoê fenua apî, ua mou hoi te raˈi tahito e te fenua tahito, e aita faahou te miti.”—Apokalupo 21:1, Huriraa o te ao apî.

 “E ite atura vau i te raˈi apî e te fenua apî; ua mou hoi tei mutaa iho raˈi, e tei mutaa ihora fenua; e aore aˈera e miti.”—Apokalupo 21:1, Te Bibilia Moˈa ra.

 I roto i teie irava, te faahohoˈahia ra mea nafea te Faatereraa arii a te Atua i te raˈi e mono ai i te mau faatereraa taata atoa. E haamou tera Faatereraa i te feia ino e e faatere oia i nia i te hoê nunaa taata apî o te farii i te auraro i ta ˈna huru faatereraa.

 E taipe te mau parau i faahitihia i roto i te buka Apokalupo. (Apokalupo 1:1) Mea tano ïa ia parau i roto i teie irava, e ere te raˈi e te fenua i te mea mau, e taipe râ. Hau atu â, te faahitihia ra “te raˈi apî” e “te fenua apî” i roto i te tahi atu mau irava Bibilia. (Isaia 65:17; 66:22; Petero 2, 3:13) E hiˈopoa anaˈe i tera mau parau e i ta te tahi atu mau irava Bibilia e parau ra. E tauturu mai te reira ia taa i te auraa.

 “Te raˈi apî.” I te tahi taime i roto i te Bibilia, e faahitihia te parau “raˈi” no te hoê arii aore ra faatereraa. (Isaia 14:12-14; Daniela 4:25, 26) Ia au i te tahi buka, i roto i te mau parau tohu, “te faahohoˈa ra te parau raˈi i te mau faatereraa aore ra hau o te faatere ra.” a I roto i te Apokalupo 21:1, “te raˈi apî,” o te Basileia aore ra Faatereraa arii ïa a te Atua. E itehia te parau o teie Faatereraa i te raˈi e rave rau taime i roto i te buka Apokalupo e i roto i te tahi atu mau buka o te Bibilia e e parauhia te reira i te tahi taime “te Faatereraa arii o te raˈi.” (Mataio 4:17; Ohipa 19:8; Timoteo 2, 4:18; Apokalupo 1:9; 5:10; 11:15; 12:10) E mono te Faatereraa arii a te Atua, o Iesu hoi te arii, i “te raˈi tahito,” oia hoi te mau faatereraa tia ore atoa a te taata.—Daniela 2:44; Luka 1:31-33; Apokalupo 19:11-18.

 “Te fenua apî.” Te parau ra te Bibilia e vai noa te fenua e a muri noa ˈtu e eita o ˈna e haamouhia. (Salamo 104:5; Koheleta 1:4) Eaha ïa te auraa o te parau “fenua”? Pinepine te Bibilia i te faahiti i te parau “fenua” no te huitaata. (Genese 11:1; Paraleipomeno 1, 16:31; Salamo 66:4; 96:1) No reira, “te fenua apî,” o te hoê ïa nunaa taata apî o te farii i te auraro i te Faatereraa a te Atua i te raˈi. Area te mau taata o te patoi i te Faatereraa arii a te Atua, o ratou “te fenua tahito” o te haamouhia.

 “E aita faahou te miti.” E auraa taipe atoa to “te miti” e faahitihia ra i roto i te Apokalupo 21:1. Pinepine te miti i te arepurepu, e tano maitai ïa tera faahohoˈaraa i te taata e rave rahi o te faatupu nei i te fifi rahi e te arepurepuraa. Eaha te tumu? Eita ratou e hinaaro e haapii no nia i te Atua e e haapao i ta ˈna mau faaueraa. (Isaia 17:12, 13; 57:20; Apokalupo 17:1, 15) E haamou-atoa-hia ratou mai ta te Salamo 37:10 e parau ra: “Tau taime â, e aita faahou te feia ino. E hiˈo oe i to ratou vahi, eita râ oe e ite ia ratou i reira.”

 Te tohu ra te buka Apokalupo eaha te tupu i te roaraa o “te mahana o te Fatu.” (Apokalupo 1:10) Ia au i te tahi parau tohu Bibilia, ua haamata tera mahana i te matahiti 1914 a haamata ˈi Iesu i te faatere ei arii i roto i te Faatereraa arii a te Atua. b Eita râ oia e faatere oioi i te fenua. No reira te tahi atu mau parau tohu Bibilia e parau ai e ino roa te tupuraa na te ao nei i te omuaraa o “te mahana o te Fatu.” E parauhia tera tuhaa matamua, “te mau mahana hopea.” (Timoteo 2, 3:1-5, 13; Mataio 24:3, 7; Apokalupo 6:1-8; 12:12) Ia hope tera tau ino mau e te fifi ia faaruru, e haamou te Faatereraa arii a te Atua i te raˈi tahito e te fenua tahito e e hopoi mai te reira i te hau e te auhoêraa. I raro aˈe i te Faatereraa arii a te Atua, e fanaˈo te mau mero o “te fenua apî” i te hoê oraraa e te hoê ea maitai roa.—Apokalupo 21:3, 4.

 A mataitai i teie video poto o te faaite mai i te tahi mau tuhaa o te buka Apokalupo.