“A tiaturi ia Iehova ma to aau atoa, e eiaha e turui i nia i to oe iho maramarama. A haapao i to ˈna manaˈo i roto i ta oe mau ohipa atoa e rave, e na ˈna e faatitiaifaro i to oe mau eˈa.”—Maseli 3:5, 6, Huriraa o te ao apî.

 “E tiaturi ia Iehova ma to aau atoa ra; eiaha râ e tiaturi i to oe ihora haapao. Eiaha e haamoe ia ˈna i to oe atoa ra mau haerea; e na ˈna e faaite ia oe i to oe ra mau haerea.”—Maseli 3:5, 6, Te Bibilia Moˈa ra.

 E titauhia ia imi tatou i te aratairaa a te Atua ra o Iehova a no te rave i te mau faaotiraa faufaa roa, eiaha ra ia turui i nia ia tatou iho.

 “A tiaturi ia Iehova ma to aau atoa.” E faaite tatou e tiaturi ra tatou i te Atua ia rave tatou i te mau mea ia au i to ˈna hinaaro. E titauhia ia tiaturi i te Atua ma to tatou aau atoa. I roto i te Bibilia, e faaohipahia te taˈo “aau” no te faataa to tatou huru o roto. E ô atoa mai te parau o to tatou huru aau, to tatou hinaaro, to tatou feruriraa e haerea. No reira, ia tiaturi tatou i te Atua ma to tatou aau atoa e ere noa râ i te hoê huru o te aau, o te hoê ïa faaotiraa ta tatou e rave. No te mea, ua papu ia tatou mea ite aˈe to tatou Atua poiete eaha te mea maitai roa no tatou.—Roma 12:1.

 “Eiaha e turui i nia i to oe iho maramarama.” No to tatou huru taata tia ore, e nehenehe e hape to tatou huru feruriraa. No reira, mea faufaa ia tiaturi i te Atua. Mai te peu e turui tatou i nia ia tatou iho aore ra nia i to tatou huru aau no te rave i te mau faaotiraa, e manaˈo paha tatou e mea maitai te reira. Tera râ, i muri aˈe e ite tatou e mea ino teie mau faaotiraa ravehia. (Maseli 14:12; Ieremia 17:9) Mea teitei aˈe to te Atua paari i to tatou. (Isaia 55:8, 9) Ia arataihia tatou e to ˈna mau manaˈo, e oaoa ïa to tatou oraraa.—Salamo 1:1-3; Maseli 2:6-9; 16:20.

 “A haapao i to ˈna manaˈo i roto i ta oe mau ohipa atoa e rave.” E imi anaˈe i te aratairaa a te Atua i roto i to tatou oraraa e ia rave tatou i te mau faaotiraa faufaa roa. E nafea ïa? A pure ia ˈna no te ani i te aratairaa e ia pee tatou i ta ˈna mau faaueraa i roto i ta ˈna Parau, te Bibilia.—Salamo 25:4; Timoteo 2, 3:16, 17.

 “Na ˈna e faatitiaifaro i to oe mau eˈa.” Na te Atua e faatitiaifaro i to tatou eˈa ma te tauturu ia tatou ia ora ia au i to ˈna mau ture aveia tia. (Maseli 11:5) Ia na reira, e fanaˈo tatou i te hoê oraraa oaoa mau.—Salamo 19:7, 8; Isaia 48:17, 18.

 I roto i te buka Maseli, e itehia te mau faaueraa tumu no te hoê oraraa oaoa e ia mauruuru te Atua ia tatou. Ua papaihia na iva pene matamua mai te huru ra na te hoê metua tane e aˈo ra ta ˈna tamaiti here. I roto i te pene 3, e itehia te mau haamaitairaa e noaa mai ia haafaufaa tatou e ia haapao i te paari no ô mai i to tatou Atua poiete.—Maseli 3:13-26.