Ehia iˈoa to te Atua?

FAAROO NA ROTO TE REO

Te pahonoraa a te Bibilia

Hoê noa iˈoa to te Atua, papaihia יהוה na roto i te reo Hebera e hurihia “Iehova” na roto i te reo Tahiti. a Ua parau te Atua na roto i ta ˈna peropheta Isaia: “O vau o Iehova, o to ˈu ïa iˈoa.” (Isaia 42:8) E itehia taua iˈoa ra hau i te 7 000 taime i roto i te mau papai tahito o te Bibilia, ua hau ïa te reira i te tahi atu tiaraa o te Atua e no te tahi atu iˈoa. b

E iˈoa ê atu anei to Iehova?

Noa ˈtu e te parau ra te Bibilia e hoê noa iˈoa to te Atua, te faaohipa ra te reira e rave rahi tiaraa e parau faataaraa no ˈna. Teie te hoê tapura o te tahi mau tiaraa e parau faataaraa o te faaite ra i te huru o Iehova.

Tiaraa	Irava	Auraa
*Allah*	(Aita e irava)	E taˈo Arabia, e ere i te iˈoa, e tiaraa noa râ, “te Atua” te auraa. E faahiti te mau huriraa reo Arabia e te tahi atu mau reo i te parau “Allah” o “te Atua” te auraa.
Arii hau ê e Fatu	Genese 15:2, New World Translation	To ˈna te mana hau ê, Hebera Adonai.
Arii mure ore	Apokalupo 15:3	Aita e haamataraa e e hopea to ta ˈna faatereraa.
Atua	Genese 1:1	Tei tia ia haamori, Tei puai roa. Te faaite ra te taˈo Hebera Elohima i to Iehova hanahana, tura e huru tia roa.
Atua no te mau atua	Deuteronomi 10:17	Te Atua hau ê, e ere ïa mai te mau “idolo” aore ra atua faufaa ore haamorihia e te tahi mau taata.—Isaia 2:8.
Atua oaoa	Timoteo 1, 1:11	No ˈna te oaoa.—Salamo 104:31.
Atua tahoo	Exodo 34:14	Eita oia e farii ia haamorihia te tahi atu. Ua huri-atoa-hia teie parau “tei titau ra ia haamorihia o ˈna anaˈe.”—New World Translation.
Faaora	Isaia 45:21, Te Bibilia Moˈa, V.C.J.S., 1976	O ˈna te faaora ia tatou i te mau fifi aore ra te haamouraa.
Fatu	Salamo 135:5	Hebera Adona e Adonima, e fatu te auraa.
Fatu o te mau nuu, Iehova sabaota	Isaia 1:9, Te Bibilia Moˈa, V.C.J.S., 1976; Roma 9:29, Te Bibilia Moˈa ra.	Te raatira o te rahiraa nuu melahi. Nehenehe atoa te tiaraa “Iehova sabaota” e hurihia “Iehova o te mau nuu [o te raˈi].”—Roma 9:29, Huriraa o te ao apî o te mau Papai Heleni Kerisetiano.
Manahope	Genese 17:1	E puai faito ore to ˈna. E hitu taime e itehia ˈi i roto i te Bibilia i te parau Hebera Eli Sadai, “te Atua Manahope” te auraa.
Mato	Salamo 18:2, 46	Tei ia ˈna te haapuraa e te faaoraraa.
Metua	Mataio 6:9	Na ˈna e horoa i te ora.
Orometua	Isaia 30:20, 21	E horoa oia i te haapiiraa e te aratairaa faufaa no te taata.—Isaia 48:17, 18.
Potera	Isaia 64:8, New World Translation	E mana to ˈna i nia i te taata e te mau nunaa, mai te potera e mana to ˈna i nia i te araea.—Roma 9:20, 21.
Te Alepha e te Omega	Apokalupo 1:8; 21:6; 22:13	“Te haamataraa e te hopea” aore ra “te matamehai e te faahopea,” te auraa, aita e Atua Manahope hou Iehova e aita i muri aˈe ia ˈna. (Isaia 43:10) O te reta matamua e te hopea o te piapa Heleni te alepha e te omega.
Tei faaroo i te pure	Salamo 65:2	Na ˈna e faaroo i te mau pure atoa o te faataehia ia ˈna ma te faaroo.
Tei Hamani	Koheleta 12:1; Isaia 40:28	Na ˈna i hamani i te mau mea atoa.—Apokalupo 4:11.
Tei Hau ê	Daniela 7:18, 27, New World Translation	Te Fatu hau ê.
Tei hoo faahou mai	Isaia 41:14, New World Translation	Ua hoo faahou mai oia i te huitaata i te hara e te pohe na roto i te hoo, oia hoi te tusia o Iesu Mesia.—Ioane 3:16.
Tei Moˈa roa	Hosea 11:12	Mea moˈa roa ˈˈe oia i te tahi atu, i te faataaraa eaha te mea maitai e eaha te mea ino.
Tei Teitei	Salamo 47:2	To ˈna te tiaraa teitei roa ˈˈe.
Te vai nei au o vau e vai nei	Exodo 3:14	E riro oia i ta ˈna atoa e hinaaro no te faatupu i ta ˈna i opua. Ua huri-atoa-hia teie parau “E riro vau i ta ˈu e maiti i te riro.” (New World Translation) Na teie faataaraa e tatara i te auraa o te iˈoa o te Atua, Iehova, faahitihia i roto i to muri iho irava.—Exodo 3:15.
Tiai	Salamo 23:1	E aupuru oia i te feia e haamori ra ia ˈna.
To te mau mahana tahito ra	Daniela 7:9, 13, 22	Aita to ˈna e haamataraa. I vai noa na oia hou te mau mea atoa a poietehia ˈi.—Salamo 90:2.

E iˈoa o te tahi mau vahi i roto i te mau Papai Hebera

Te vai ra te iˈoa o te Atua i roto i te iˈoa o te tahi mau vahi ta te Bibilia e faahiti, e ere râ i te tahi mau iˈoa no te Atua.

Iˈoa o te vahi	Irava	Auraa
Iehova-irae	Genese 22:13, 14	“Na Iehova e horoa mai.”
Iehova-nisi	Exodo 17:15	“O Iehova to ˈu pou tapao,” aore ra “to ˈu reva.” Ua riro Iehova ei Atua e imi ai to ˈna nunaa i te paruru e te tauturu ia ˈna ra.—Exodo 17:13-16.
Iehova-saloma	Te mau tavana 6:23, 24	“E hau Iehova.”

Te mau tumu mea faufaa ˈi ia ite e ia faaohipa i te iˈoa o te Atua

Papu maitai e mea faufaa no te Atua to ˈna iˈoa, Iehova, inaha hoi ua tuu oia i te reira i roto i te Bibilia e rave rahi tausani taime.—Malaki 1:11.
Mea pinepine to Iesu, te Tamaiti a te Atua, haamanaˈoraa i te faufaaraa o te iˈoa o te Atua. Ei hiˈoraa, ua pure oia ia Iehova a na ô ai: “Ia moˈa to oe iˈoa.”—Mataio 6:9; Ioane 17:6.
Te feia o te haapii ra o vai te iˈoa o te Atua e o te faaohipa ra i te reira, te haamata ra ïa i te faahoa ˈtu ia Iehova. (Salamo 9:10; Malaki 3:16) Ia riro ratou ei hoa no te Atua, teie ïa te haamaitairaa ta ˈna e fafau ia ratou: “No te mea, te hinaaro maira oia ia ˈu, e faaora vau ia ˈna; e faateitei au ia ˈna i nia, no te mea te haapao ra oia i to ˈu nei iˈoa.”—Salamo 91:14.
Te na ô ra te Bibilia: “e rave rahi o tei parauhia ra e atua, i te raˈi anei e i te fenua, e parau mau hoi e rave rahi iho â ‘atua’ e e rave rahi atoa ‘fatu.’” (Korinetia 1, 8:5, 6) Te haapapu maitai ra te Bibilia e o Iehova te iˈoa o te Atua mau hoê roa.—Salamo 83:18.

a Mea au aˈe na te tahi mau aivanaa reo Hebera i te iˈoa “Iave” no te huri i te iˈoa o te Atua.

b E itehia te haapotoraa o te iˈoa o te Atua “Ia” piri i te 50 taime i roto i te Bibilia, mai i roto i te taˈo “Haleluia,” o “Arue ia Ia” te auraa.—Apokalupo 19:1.