E. Te aupuru ra te Atua i ta ˈna mau tavini tei maˈihia ra. Te parau ra te Bibilia no te tahi tavini haapao maitai: “Na Iehova e faaetaeta mai ia ˈna i tana roi maˈi ra.” (Salamo 41:3) Mai te peu e maˈi tamau to oe, e tauturu mai teie e toru manaˈo ia oe ia faaruru i te reira:

1. A ani na roto i te pure i te puai no te faaoromai tamau. E noaa ia oe “te hau o te Atua, tei hau ê i te mau manaˈo atoa.” E iti mai ïa to oe hepohepo e e tauturu te reira ia oe.—Philipi 4:6, 7.

2. Ei manaˈo maitai noa to oe. Te na ô ra te Bibilia: “E maitai to te aau rearea mai te raau maˈi atoa ra; e mǎrô râ te ivi i te aau taiâ.” (Maseli 17:22) A faaataata i te taata, mea anaanatae hoi i roto i te taime hepohepo e mea maitai atoa no to oe ea.

3. A tiatonu i to oe tiaturiraa no a muri aˈe. E tauturu te tiaturiraa papu ia oe ia oaoa noa ˈtu te maˈi tamau. (Roma 12:12) Te tohu ra te Bibilia i te hoê tau “e ore . . . to reira e parau e, Ua paruparu vau i te maˈi.” (Isaia 33:24) E faaora te Atua i te mau maˈi tamau eita e ora i te mau ravea o teie tau. Ei hiˈoraa, te parau ra te Bibilia e apî-faahou-hia te ruhiruhia e te oraora maitai a na ô ai: “E hoˈi oia i tana apîraa ra.”—Ioba 33:25.

Nota: Noa ˈtu te farii nei te mau Ite no Iehova i te tauturu a te Atua, te imi atoa nei râ ratou i te mau ravea rapaauraa i te mau maˈi tamau. (Mareko 2:17) Eita matou e turu i te tahi ravea rapaauraa taa maitai, na te taata tataitahi râ e faaoti no to ˈna iho ea.