No Beresilia o Maria Lúcia, e maˈi fetii ino mau to ˈna parauhia syndrome de Usher. No e rave rahi taata tei roohia i tera maˈi, aita ratou e nehenehe e faaroo maitai a rito atu ai ei taata tariˈa turi. E mohimohi atoa to ratou mata a matapo roa ˈtu ai. Ua fanauhia o Maria Lúcia ei taata tariˈa turi e i to ˈna tamariiraa, ua haapii mai o ˈna i te reo apǎraa rima. I muri aˈe, i te 30raa o to ˈna matahiti, ua haamata to ˈna mata i te mohimohi. Noa ˈtu te mau fifi, aita o Maria Lúcia i faataa ê ia ˈna ia vetahi ê. I teie nei, ua hau o ˈna i te 70 matahiti, e te tamau ra o ˈna i te oaoa i roto i to ˈna oraraa.

 I 1977, hou o ˈna a riro ai ei matapo, ua farerei o Maria Lúcia i te mau Ite no Iehova. Te faataa ra o ˈna: “Ua farerei au i te hoê hoa haapiiraa, o Adriano to ˈna iˈoa e tei bapetizo-noa-hia ˈtura ei Ite no Iehova. Ua faaite o ˈna ia ˈu i te hoê parau fafau a te Atua, oia hoi e faarirohia te fenua ei paradaiso e e oaoa te taata atoa a fanaˈo atu ai i te ea maitai. Ua oaoa roa vau i te faarooraa i tera parau fafau a farii atu ai au i te hoê haapiiraa Bibilia. Oioi au i te apiti i te hoê amuiraa i Rio de Janeiro. Ua hurihia ta ratou mau putuputuraa na roto i te reo apǎraa rima. Maoti te tauturu a Iehova, ua tamau vau i te faafatata ˈtu ia ˈna e ua bapetizohia vau i Tiurai 1978.”

 I muri aˈe, ua haere o Maria Lúcia i roto i te tahi atu amuiraa. Tera râ, aita hoê aˈe Ite no Iehova i roto i ta ˈna amuiraa apî tei ite i te reo apǎraa rima. I te omuaraa, mea fifi no ˈna no te mea aita o ˈna i taa i tei parauhia i te mau putuputuraa. Ua tauturu râ e piti tuahine ia ˈna. I te mau putuputuraa, ua parahi raua i pihai iho ia ˈna e ua rave raua i te mau nota no te faataa eaha tei parauhia. Te na ô ra o Maria Lúcia: “I te fare, ua tamau vau i te taio i ta raua mau nota no te taa maitai i tei haapiihia. I muri aˈe, ua haapii na tuahine e piti i te reo apǎraa rima e ua riro raua ei taata huri na ˈu.”

 Ua haamata te mata o Maria Lúcia i te mohimohi e aita o ˈna i nehenehe faahou e ite i te apǎraa rima ravehia e te feia huri. Ua nafea ïa o ˈna? Teie ta Maria e faataa ra: “E tuu vau i to ˈu na rima i nia i to te taata huri. E nehenehe ïa vau e taa i te apǎraa rima ta ˈna e faaohipa.”

 Ua mauruuru roa Maria Lúcia i te ohipa ravehia e na tuahine huri. Te na ô ra o ˈna: “Ua riro raua ei ô faufaa mau no ǒ mai ia Iehova. Maoti ta raua tauturu, e nehenehe au e fanaˈo i te mau putuputuraa a te amuiraa e te mau tairururaa.”

 Te haa rahi nei Maria Lúcia i roto i te taviniraa. Maoti te apǎraa rima ma te tapea i to te tahi atu rima, te poro ra o ˈna i te feia tariˈa turi tei faahiahia roa i ta ˈna mau tutavaraa no te faaite atu i te parau apî oaoa. I te roaraa o te maˈi pee COVID-19, ua papai Maria Lúcia i te mau rata no te poro i te feia tariˈa turi. Ua na reira o ˈna maoti te tauturu a to ˈna taeae José Antônio, e taata tariˈa turi atoa o ˈna e te matapo. a

 Ua nafea ïa o ˈna? Te na ô ra o ˈna: “E faaohipa vau i te hoê mauhaa parahurahu e e au i te reta ‘L’ ra te huru. E tauturu tera ravea ia afaro noa ta ˈu papairaa. Mea aravihi roa José Antônio no te tamau aau i te mau irava Bibilia e te mau tumu parau. E faaohipa ïa vau i te reira i roto i ta mâua mau rata. E tutava vau i te faaohie roa i ta ˈu huru papairaa ia taa maitai te feia tariˈa turi i te reira. No te mea, ua matau aˈe ratou i te reo apǎraa rima.”

 Noa ˈtu ua matapo roa o Maria Lúcia i teie nei, te tamau ra o ˈna i te haa rahi. Te na ô ra o Karoline, hoê o na tuahine huri: “Na Maria Lúcia iho â e rave i ta ˈna ohipa i te fare. E haapao o ˈna ia vai mâ noa to ˈna vahi nohoraa. Mea au roa na ˈna e tunu i te maa e e titau manihini i to ˈna mau hoa.”

 Te na ô atoa ra o Jefferson, hoê matahiapo i roto i ta Maria Lúcia amuiraa: “Mea here roa na Maria Lúcia ia Iehova. Oia atoa i to ˈna taata tupu. E rave noa o ˈna i te ohipa ia faufaahia vetahi ê. E imi noa o ˈna i to vetahi ê maitai.”—Philipi 2:4.